Tag: آسکر ایوارڈ

آپ کو نوے کی دہائی کی مشہور کارٹون سیریز کیپٹن پلینٹ اینڈ دا پلینٹیرز تو ضرور یاد ہوگی جس میں ایک سپر ہیرو زمین پر آلودگی پھیلانے والوں کے خلاف لڑتا تھا۔ اب خوش ہوجایئے کیونکہ اب وہی کیپٹن پلینٹ بہت جلد بڑی اسکرینوں پر بھی آنے والا ہے۔

آسکر ایوارڈ یافتہ مشہور اداکار لیونارڈو ڈی کیپریو اس منصوبے پر کام کر رہے ہیں۔ اس سلسلے میں ان کی پہلی کوشش اس سیریز کے کاپی رائٹس کو حاصل کرنا ہے۔

فلم کا اسکرپٹ لکھنے کے لیے ’سنز آف انارکی‘ میں کام کرنے والے جونو میٹ اور ’سکریم کوئینز‘ کے اداکار گلین پاول مشاورت اور تبادلہ خیال کر رہے ہیں۔

فلم میں مرکزی کردار کے لیے گلین پاول کو ہی لیے جانے کا امکان ہے تاہم ابھی اس کی تصدیق نہیں کی گئی۔

اگر اس پروجیکٹ پر مزید کام جاری رہتا ہے تو یہ ہالی ووڈ کے سپر ہیروز میں ایک اور اضافہ ہوگا جو ماحول کو بچانے کے لیے بچوں کو بھی اپنے ساتھ شامل کرے گا۔

واضح رہے کہ لیونارڈو ڈی کیپریو اقوام متحدہ کے نمائندہ برائے امن ہیں اور ان کا شعبہ ماحول سے متعلق موسمیاتی تغیرات کا ہے۔

لیو کی پروڈکشن میں ایک فلم ’بیفور دا فلڈ‘ بھی پیش کی جانے والی ہے جو موسمیاتی تبدیلیوں کے
بارے میں ہے۔ یہ فلم 21 اکتوبر کو ریلیز کردی جائے گی۔

کراچی: آسکر ایوارڈ یافتہ ڈائریکٹر شرمین عبید چنائے کی ایک اور ڈاکیومنٹری فلم ’سانگ آف لاہور‘ کو لندن انڈین فلم فیسٹیول میں آڈینس چوائس ایوارڈ دیا گیا۔

فلم کی تخلیق میں شرمین عبید چنائے کے ساتھ اینڈی شاکن نے حصہ لیا ہے۔

فلم کی کہانی سچل اسٹوڈیو کے گرد گھومتی ہے جو عزت مجید نے 2014 میں لاہور میں قائم کیا تھا۔

فلم کی ویب سائٹ پر دیے جانے والے اسکرپٹ کے مطابق یہ اسٹوڈیو پاکستان کی موسیقی کی روایات اور روایتی آلات موسیقی کو حیات نو بخشنے کے لیے بنایا گیا تھا۔ اس اسٹوڈیو نے پاکستانی معاشرے کی مردہ ہوجانے والی موسیقی کی روایات کو دوبارہ زندہ کرنے کا بیڑا اٹھایا۔

سچل اسٹوڈیو نے کئی موسیقاروں کو، جو اپنا کام چھوڑ چکے تھے، دوبارہ سے گانے پر مجبور کیا اور اس کے تحت کئی کلاسیکی اور اور لوک موسیقی کے البم ریلیز کیے۔

ان گانوں میں استعمال کیے جانے مشرقی ایشیائی آلات موسیقی نے پوری دنیا میں موسیقی کے چاہنے والوں کو اپنی طرف متوجہ کیا اور اس پلیٹ فارم کے ذریعہ کئی موسیقاروں کو بیرون ملک بھی مدعو کیا گیا جہاں انہوں نے اپنے فن کا مظاہرہ کیا۔

فلم کے ہدایتکاروں نے گفتگو کرتے ہوئے بتایا کہ انہیں خوشی ہے کہ یہ فلم موسیقی کے دیوانوں کو اپنی طرف متوجہ کر رہی ہے۔ یہ فلم پاکستانی ثقافتی ورثے کو خراج تحسین پیش کرنے کے لیے بنائی گئی ہے۔

اس ڈاکیومنٹری کو 2015 میں ٹریبیکا فلم فیسٹیول میں بھی پیش کیا گیا جہاں اسے بہترین ڈاکیومنٹری کے زمرے میں نامزد کیا گیا۔

واضح رہے کہ شرمین عبید چنائے پہلی پاکستانی ہیں جنہوں نے 2 بار آسکر ایوارڈ جیتا ہے۔ ان کی آسکر ایوارڈ یافتہ ڈاکیومنٹری ’سیونگ فیس‘ تیزاب سے جلائی جانے والی مظلوم خواتین جبکہ ’آ گرل ان دی ریور‘غیرت کے نام پر قتل کیے جانے کے موضوع پر بنائی گئیں۔