اسلام آباد : سابق صدر آصف زرداری ، فریال تالپور سمیت دیگر اہم شخصیات کے خلاف تحقیقات کرنے والے افسر کو تبدیل کردیا گیا ، محمد علی ابڑو کو تحقیقات کے لیے ڈیپوٹیشن پر بلایا گیا تھا۔
تفصیلات کے مطابق سابق صدر آصف زرداری، فریال تالپور سمیت دیگر اہم شخصیات کےخلاف نیب کی تحقیقات جاری ہے ، تحقیقات کےلیےڈیپوٹیشن پر بلائے گئےتفتیشی افسرمحمد علی ابڑو کو تبدیل کردیا گیا۔
ذرائع کا کہنا ہے کہ محمد علی ابڑو واپس ایف آئی اے چلے گئے ہیں ، محمد علی نے زرداری، فریال تالپور، عبد الغنی مجیدسمیت دیگر سےتفتیش کی جبکہ ملزمان کی منی ٹریل سے متعلق اہم تحقیقات کی تھیں۔
ذرائع کے مطابق نیب نےمنی لانڈرنگ اور جعلی اکاؤنٹس کیس میں محمدعلی ابڑو کی خدمات لی تھیں تاہم میگا منی لانڈرنگ، جعلی بینک اکاونٹس کیسز میں دوسرے تفتیشی افسر کو نامزد نہیں کیاگیا۔
یاد رہے چند روز قبل جے وی اوپل کیس میں بڑی اہم پیش رفت سامنے آئی تھی، بلاول بھٹو، آصف زرداری اور فریال تالپور کے خلاف تحقیقات میں مزید تیزی لائی گئی تھی اور جے وی اوپل کیس کی انکوائری کا مرحلہ مکمل کر لیا گیا تھا۔
مزید پڑھیں : بلاول، آصف زرداری، فریال کے خلاف تحقیقات میں تیزی
نیب راولپنڈی کی جانب سے انکوائری کو انویسٹی گیشن میں تبدیل کرنے کی سفارش کی گئی تھی، جس پر چئیرمین نیب نے انکوائری کو انویسٹی گیشن میں تبدیل کرنے کی منظوری دی تھی۔
خیال رہے کہ چیئرمین پیپلز پارٹی بلاول بھٹو زرداری جے وی اوپل میں 25 فی صد شیئر ہولڈر ہیں، نیب ذرائع کے مطابق 1.224 بلین روپے نجی بینک سے جے وی اوپل کو ٹرانسفر ہوئے تھے، بعد ازاں جے وی اوپل کے اکاؤنٹ سے یہ رقم نکلوائی بھی گئی تھی۔