اسلام آباد: مریم اورنگزیب نے کہا ہے کہ عوام شکست خوردہ اور سازشی عناصرکو مسترد کر چکے ہیں، پاکستان میں اب صرف کارکردگی کی سیاست ہوگی.
ان خیالات کا اظہار وزیر مملکت برائے اطلاعات نے اسلام آباد میں میڈیا سے گفتگو کرتے ہوئے کیا.
ان کا کہنا تھا کہ لاہور میں تین سیاسی کزن کا اجتماع جاری ہے، نامعلوم افراد اور کٹھ پتلیوں کوعوام نے مستردکر دیا 2018 میں عوام جس کوووٹ دیں گے، وہی اقتدارمیں آئے گا.
مریم اورنگزیب کا کہنا تھا کہ طاہرالقادری ہمیشہ خاص وقت پرانتشار پھیلانے پاکستان آتے ہیں، آج کنٹینرمیں نامعلوم افراد کی پیش گوئیاں ہورہی ہیں، قومی اسمبلی میں اتنےاہم بل پاس ہوئے، اس وقت عمران خان کہاں تھے.
ایک طرف سی پیک اوردوسری طرف کنٹینرسیاست جاری ہے‘ مریم اورنگزیب
وزیر مملکت نے کہا کہ یہ کیسے احتساب کا نعرہ ہے، تمام جماعتیں صرف ن لیگ کے خلاف جمع ہوگئی ہیں، جس وقت پاکستان میں سی پیک آرہاتھا، تب بھی ایک کنٹینرتیارہورہا تھا، آج بھی یہی معاملہ ہے. جو آدمی دن کی روشنی میں پارلیمنٹ پر حملہ کرتا ہے، اس کے خلاف بھی عدالت کوکارروائی کرنی چاہیے.
احتجاج کا مقصد حصول انصاف نہیں، حصول اقتدارہے: رانا ثنا اللہ
انھوں نے مخالفین پر تنقید کرتے ہوئے کہا کہ جس جذبے سے کنٹینر تیار کرتے ہیں، عوام کی خدمت بھی کرلیں. پاکستان اس وقت دہشت گردی کے خلاف حالت جنگ میں ہے.
یاد رہے کہ طاہر القادری کے احتجاج پر تبصرہ کرتے ہوئے وزیر قانون پنجاب رانا ثنا اللہ نے کہا تھا کہ گذشتہ تین سال سے ہمارے مخالفین سڑکوں پر ہیں، یہ لوگ چاہتے ہیں کہ ملک میں عدم استحکام اور انتشار ہو، احتجاج کا مقصد حصول انصاف نہیں، حصول اقتدارہے.
