دفتر میں دن کا بڑا حصہ بیٹھ کر گزارنا بے شمار مسائل و طبی پیچیدگیوں کا سبب بنتا ہے۔

مستقل بیٹھے رہنے سے آپ سب سے پہلے موٹاپے کا شکار بنتے ہیں۔ اس کے بعد آپ کو کمر، پیٹھ اور گردن کا درد شروع ہوتا ہے۔

کچھ عرصہ بعد ورزش نہ کرنے اور خون کی روانی سست ہونے کے باعث آپ کی ٹانگوں میں بھی درد شروع ہوجاتا ہے۔ مزید آگے چل کر یہ امراض قلب اور فالج کا سبب بھی بنتا ہے۔

مزید پڑھیں: دفتر میں ورزش کرنے کی کچھ تراکیب

اس سے قبل طبی ماہرین تجویز دیتے تھے کہ آپ کو ان مسائل سے بچنے کے لیے اپنی کرسی پر 90 ڈگری کے زاویے سے بیٹھنا چاہیئے یعنی بالکل سیدھا، کرسی کی پشت سے ٹیک لگائے بغیر۔

لیکن جدید تحقیق سے ثابت ہوا کہ اس انداز سے بیٹھنا آپ کے لیے سخت نقصان دہ ہے اور اگر آپ اس انداز سے بیٹھنے کے عادی ہیں تو آپ کے تمام طبی مسائل کی جڑ بیٹھنے کا یہی انداز ہے۔

نیویارک کی کورنیل یونیورسٹی کے ڈاکٹر ایلن ہیج کہتے ہیں کہ اس انداز سے بیٹھنے پر آپ کو مختلف کاموں کے لیے اپنے جسم کی مطابقت کرنا مشکل کام ہوگا۔

مزید پڑھیں: دفتر میں 8 گھنٹے گزارنا کتنا ضروری؟

مثال کے طور پر اگر آپ کی کمپیوٹر اسکرین آگے رکھی ہے تو ایسے پوز میں بیٹھتے ہوئے آپ کو تھوڑا آگے جھکنا ہوگا جس سے آپ کی کمر، گردن، پیٹھ، اور کولہوں پر شدید دباؤ پڑے گا نتیجتاً آپ مختلف اقسام کے درد میں مبتلا ہوجائیں گے۔

ان کا کہنا ہے کہ دفتر میں کرسی پر زیادہ سے زیادہ آرام دہ حالت میں بیٹھنا چاہیئے یعنی کرسی کی پشت سے ٹیک لگا کر۔ اس طریقے سے آپ کے جسم کا زور کرسی پر ہوگا۔

انہوں نے بتایا کہ آرام دہ حالت میں بیٹھنے سے آپ کے کولہوں، کمر اور گردن پر زور نہیں پڑے گا۔ اس انداز میں آپ کی ٹانگیں بھی آرام دہ حالت میں رہیں گی اور آپ انہیں میز کے نیچے پھیلا سکیں گے جس سے ٹانگوں میں خون کی روانی بہتر ہوگی۔

اس طریقے سے بیٹھنے پر آپ 8 گھنٹوں کے علاوہ بھی مزید وقت کے لیے بیٹھ کر کام کرسکیں گے۔ یاد رہے کہ یہ عین وہی طریقہ ہے جو ڈرائیونگ سیٹ پر بیٹھنے کے لیے استعمال ہوتا ہے۔

اسی طرح جب آپ اپنی ڈیسک پر بیٹھیں تو چیزوں کو اپنے حساب سے ترتیب دیں۔ کمپیوٹر اسکرین، ماؤس اور کی بورڈ اگر دور رکھا ہے تو اسے قریب کرلیں تاکہ آپ بغیر دباؤ اور کھنچاؤ کے کام کرسکیں۔

اور ہاں دن میں ایک سے 2 بار چائے کے وقفے لینا نہ بھولیں تاکہ آپ اپنے پورے جسم میں خون کی روانی کو تیز کرسکیں۔

اوسلو: ماہرین کا کہنا ہے کہ وہ افراد جن کی دفتر میں شفٹ مستقل تبدیل ہوتی رہتی ہے اور ان کی شفٹوں کے درمیان 11 گھنٹے سے کم وقفہ ہوتا ہے انہیں بیماری کے باعث زیادہ چھٹیوں کی ضرورت پڑتی ہے۔

ناروے میں کیے جانے والی ایک تحقیقی سروے کے مطابق دفتر کے اوقات کار یعنی شفٹوں میں کم وقت کا وقفہ ملازمین میں بیماری کے امکان کو بڑھا دیتا ہے۔

مزید پڑھیں: دفتر میں 8 گھنٹے گزارنا کتنا ضروری؟

طبی ماہرین کی زبان میں اس مختصر وقفے کو ’جلد واپسی‘ کہا جاتا ہے۔ ماہرین کا کہنا ہے کہ روزانہ شفٹوں میں تبدیلی ملازمین کی صحت پر بدترین اثرات مرتب کرتا ہے۔

ماہرین کے مطابق دفتر میں رات کی شفٹ کو صحت کے لیے سخت نقصان دہ سمجھا جاتا ہے تاہم مستقل شفٹوں میں تبدیلی رات کی شفٹ سے بھی زیادہ نقصان دہ ہے اور یہ ملازمین کی نیند پر شدید منفی اثرات مرتب کرتی ہے۔

ماہرین نے اس سروے کے لیے اسپتال کی نرسوں کی شفٹوں اور ان کی بیماری کے لیے لی جانے والی چھٹیوں کا جائزہ لیا۔ انہوں نے دیکھا کہ 80 فیصد نرسوں کی کوئی مخصوص شفٹ نہیں تھی اور یہ مستقل تبدیل ہوتی رہتی تھی۔

مزید پڑھیں: دفتر میں زیادہ وقت گزارنے والوں کے لیے بری خبر

نتیجتاً انہیں ہر ماہ بیماری کے باعث ایک چھٹی لینی پڑتی تھی اور چھٹی کے بعد بھی کم از کم اگلے 2 دن تک وہ کم کارکردگی کا مظاہرہ کر پاتی تھیں۔

ماہرین نے تجویز کیا کہ ملازمین کے لیے دفتر کی شفٹ کے اوقات کار کو کم از کم ایک ماہ تک مستقل رکھا جائے اور ایک ماہ بعد اسے تبدیل کیا جائے۔

کیا آپ اپنے دفتر میں بہت زیادہ وقت گزارتے ہیں اور اس وجہ سے آپ کی نیند بھی پوری نہیں ہو پاتی؟ اگر آپ کا جواب ہاں میں ہے تو آپ کے لیے بری خبر ہے کہ بڑھتی عمر کے ساتھ آپ سنگین ترین طبی مسائل کا شکار ہوسکتے ہیں۔

فن لینڈ میں کی جانے والی ایک تحقیق میں کاروباری افراد کا مشاہدہ کیا گیا۔ تحقیق میں دیکھا گیا کہ وہ افراد جو اپنی درمیانی عمر میں اپنے کام کو ہفتے میں 50 سے زائد گھنٹے دیتے تھے اور سونے کے لیے 47 گھنٹوں سے کم وقت صرف کرتے تھے وہ عمر میں اضافے کے ساتھ ساتھ مختلف طبی پیچیدگیوں اور مسائل کا شکار ہوتے گئے۔

مزید پڑھیں: آفس میں کیک کاٹنا صحت کے لیے ایک بڑا خطرہ

ماہرین نے بتایا کہ نیند پوری نہ ہونا ویسے تو ہر عمر کے افراد کے لیے نقصان دہ عمل ہے لیکن اگر یہ عادت 40 سال کی عمر میں بھی برقرار رہے تو 60 سے 70 سال کی عمر کے دوران آپ مختلف امراض کا شکار ہوسکتے ہیں۔

ماہرین نے واضح کیا کہ یہ خطرہ ان افراد میں نہیں دیکھا گیا جنہوں نے اپنی وسطی عمر میں نیند پوری کی اور کام کے اوقات کو حد میں رکھا۔ ایسے افراد اپنے بڑھاپے میں نسبتاً کم بیماریوں کا شکار ہوئے۔

مزید پڑھیں: نیند کیوں رات بھر نہیں آتی؟

مزید پڑھیں: صرف آدھے منٹ میں نیند لانے کی تکنیک

طبی ماہرین نے تجویز کیا کہ ہفتے میں 50 گھنٹے سے کم کام کرنا مناسب ہے، اس سے زیادہ وقت کام کو دینا صحت کو نقصان پہنچا سکتا ہے۔

اسی طرح ہفتے میں 47 گھنٹے کی نیند ضروری ہے۔ جو لوگ اس سے کم گھنٹے سونے کے لیے صرف کرتے ہیں ان کو مختلف مسائل کا سامنا ہوسکتا ہے۔

واضح رہے کہ نیند پوری نہ ہونا ایک ایسا عمل ہے جو جسمانی، نفسیاتی اور دماغی صحت پر منفی اثرات مرتب کرتا ہے اور الزائمر، امراض قلب اور ہائی بلڈ پریشر سمیت مختلف بیماریوں میں مبتلا کرسکتا ہے۔

مزید پڑھیں: نیند کی کمی کے منفی اثرات