Tag: آل پارٹیز کانفرنس

فوجی عدالتوں کی مدت میں توسیع پر تحفظات ہیں: بلاول بھٹو زرداری

اسلام آباد: پاکستان پیپلز پارٹی کی جانب سے بلائی جانے والی آل پارٹیز کانفرنس اختتام پذیر ہوگئی۔ بلاول بھٹو زرداری نے کہا کہ ہمیں فوجی عدالتوں پر تحفظات ہیں۔ اگر ضرورت پڑی تو قانونی مشاورت کے بعد نیا ڈرافٹ تیار کریں گے۔

تفصیلات کے مطابق پاکستان پیپلز پارٹی کی آل پارٹیز کانفرنس اختتام پذیر ہوگئی۔ کانفرنس کے بعد پیپلز پارٹی کے چیئرمین بلاول بھٹو زرداری نے کہا کہ 13 جماعتوں نے آل پارٹیز کانفرنس میں شرکت کی۔

انہوں نے کہا کہ فوجی عدالتوں کی مدت میں توسیع پر تحفظات ہیں۔ اگر ضرورت پڑی تو اس بارے میں ہم وکلا سے مشورہ کر کے ایک ڈرافٹ تیار کریں گے۔

فاٹا کے انضمام پر بات کرتے ہوئے انہوں نے کہا کہ یہ انضمام فوری طور پر ہونا ضروری ہے۔

بلاول بھٹو نے کانفرنس میں شرکت کرنے والی پارٹیوں کا شکریہ بھی ادا کیا۔ اس موقع پر پیپلز پارٹی کے رہنما اور سینیٹر فرحت اللہ بابر نے کہا کہ جن دہشت گردوں کے خلاف کارروائی کا کہا جارہا ہے ان کی شناخت کیسے ہوگی۔

واضح رہے کہ اے پی سی میں تحریک انصاف کے علاوہ تیرہ سیاسی جماعتیں شریک ہوئیں جن میں آٹھ سیاسی جماعتوں نےفوجی عدالتوں کی حمایت جبکہ تین جماعتوں نے مدت میں توسیع پر تحفظات کا اظہار کیا۔

خیال رہے پیپلز پارٹی کی جانب سے بلائی گئی کُل جماعتی کانفرنس میں فوجی عدالتوں کے قیام میں تحفظات کا اظہار کرنے والوں میں میزبان پیپلزپارٹی، جےیوآئی اور بی این پی (عوامی) شامل ہیں جب کہ تحریک انصاف نے دعوت ملنے کے باوجود کانفرنس میں شرکت نہیں کی۔

مارچ 4, 2017
آل پارٹیز کانفرنس: پیپلز پارٹی کے سیاسی رابطے تیز

اسلام آباد: پیپلز پارٹی کی آل پارٹیز کانفرنس کے لیے ملاقاتیں جاری ہیں۔ آصف علی زرداری کی جانب سے کانفرنس میں شرکت کے لیے تمام پارٹی رہنماؤں کو خط بھی بھیج دیا گیا۔

پیپلز پارٹی نے اے پی سی میں شرکت کے لیے سیاسی رابطے تیز کر دیے۔

پارٹی رہنما فرحت اللہ بابر نے اسلام آباد میں میڈیا سے گفتگو کرتے ہوئے بتایا کہ کانفرنس میں شرکت کے لیے سیاسی جماعتوں سے ملاقاتیں کی ہیں اور شریک چیئرمین آصف زرداری نے تمام پارٹی رہنماؤں کو خط بھی بھیج دیا ہے۔

پیپلز پارٹی کے رہنما نیئر حسین بخاری کا کہنا تھا کہ اے پی سی میں نیپ پر عملدر آمد کا جائزہ لیا جائے گا۔ ایجنڈے میں فوجی عدالتوں میں توسیع کا معاملہ بھی شامل ہے۔

یاد رہے کہ پیپلز پارٹی نے 4 مارچ کو نیشنل ایکشن پلان کا جائزہ اور فوجی عدالتوں میں توسیع کے معاملے پر آل پارٹیز کانفرنس بلائی ہے۔

مارچ 2, 2017
پی پی کی متحدہ کو اے پی سی میں شرکت کی دعوت

کراچی : پیپلز پارٹی نے ایم کیو ایم کو چار مارچ کو ہونے والی اے پی سی میں شرکت کی باضابطہ دعوت دے دی، متحدہ رہنما عامر خان کہتے ہیں کہ ایک مربوط نیشنل کاؤنٹر ٹیرر ازم پالیسی اور نیشنل ایکشن پلان پر مکمل عمل درآمد کی ضرورت ہے۔

تفصیلات کے مطابق پیپلز پارٹی کی جانب سے آل پارٹیز کانفرنس میں سیاسی رہنماؤں کی شرکت کے لیے دعوت دینے کا سلسلہ جاری ہے، اس حوالے سے پیپلز پارٹی کا پانچ رکنی وفد نثار کھوڑو کی قیادت میں ایم کیو ایم کے عارضی مرکز پی آئی بی کالونی پہنچا۔

ملاقات میں صوبے کی سیاسی صورتحال، امن و امان اور ایم کیو ایم پیپلز پارٹی تعلقات پر بات ہوئی، ساتھ ساتھ پیپلز پارٹی کے وفد نے ایم کیو ایم کو چار مارچ کو اسلام آباد میں ہونے والی آل پارٹیز کانفرنس میں باضابطہ طور پر شرکت کی دعوت بھی دی۔

اس موقع پر میڈیا سے گفتگو کرتے ہوئے نثار کھوڑو نے کہا کہ ملک حالت جنگ میں ہے تمام سیاسی جماعتوں کو مشاورتی عمل میں شامل کیا جائے،پارلیمینٹ سب سے بالاتر ادارہ ہے، ملک میں سیاسی نظام چلنا چاہیے اگر ہم الگ الگ رہے تو دہشت گرد مزید طاقت ور ہوں گے۔

ایم کیو ایم رہنما عامر خان نے کہا کہ نیشنل ایکشن پلان پر عمل درآمد کے حوالے سے صوبائی و وفاقی حکومتیں ناکام رہی ہیں، امن و امان کے لیے پہلے مدرسوں کی اصلاحات ضروری ہیں۔ ان کا کہناتھا کہ اے پی سی میں شرکت کا فیصلہ رابطہ کمیٹی میں مشاورت کے بعد کیا جائے گا۔

اس موقع پر دونوں جماعتوں کے رہنماؤں نے اس بات پر اتفاق کیا کہ سیاسی مشاورتی عمل کے بغیر ملک سے دہشت گردی کا خاتمہ اور ٹیرارزم پالیسی کا قیام ممکن نہیں۔

فروری 27, 2017
پی پی نے اے پی سی طلب کرلی، ن لیگ کے سوا سب کو دعوت

کراچی: پیپلزپارٹی نے فوجی عدالتوں کے قیام سے متعلق آل پارٹیز کانفرنس طلب کرلی جس میں ن لیگ کے سوا تمام سیاسی جماعتوں کو شرکت کی دعوت دی گئی ہے۔

تفصیلات کے مطابق فوجی عدالتوں کے قیام سے متعلق پارلیمانی کمیٹی کے اجلاس اور ذیلی کمیٹی کے اجلاس جاری ہیں تاہم سیاسی جماعتیں متفق نہیں ہوپارہیں، پیپلز پارٹی نے اس ضمن میں آل پارٹیز کانفرنس طلب کرلی۔

پیپلز پارٹی کے رہنما نوید قمر کا کہنا ہے کہ فوجی عدالتوں کا فیصلہ اے پی سی میں ہی ہوگا، حکومت نے فوجی عدالتوں کی مدت 3 کی بجائے 2 سال کرنے پر رضامندی ظاہر کردی ہے جبکہ ریاست کے خلاف کارروائی کے الفاظ میں بھی ترمیم کردی گئی ہے، حکومتی مسودہ پارٹی قیادت کے سامنے پیش کریں گے۔

نوید قمر کا مزید کہنا تھا کہ پیپلز پارٹی فوجی عدالتوں کے معاملے پر آل پارٹیز کانفرنس بلانے پر قائم ہے، آل پارٹیز کانفرنس 4 مارچ کو اسلام آباد میں ہوگی جس میں تمام سیاسی جماعتوں کے رہنماؤں کو شرکت کی دعوت دی جائے گی۔

دہشت گردی کی ذمہ دار ن لیگ ہے اس لیے دعوت نہیں دی، سینیٹر عبدالقیوم

اسی ضمن میں پیپلز پارٹی کے سینیٹر عبدالقیوم نے اے آر وائی نیوز سے بات کرتے ہوئے کہا کہ پارلیمنٹ کے اندر اور باہرموجود تمام جماعتوں کو اے پی سی میں شرکت کی دعوت دے دی ہے ابھی دعوت زبانی دی ہے تاہم یقینی شرکت کے لیے پی پی کا وفد سیاسی جماعتوں سے ملاقاتیں کرے گا۔

انہوں نے کہا کہ موجودہ حالات میں تمام جاعتوں کو اپنا کردار ادا کرنا ہوگا، ہمیں حکومت کی ناکام پالیسی کی وجہ سے مشکلات کا سامنا ہے، کانفرنس میں پی پی کی اعلیٰ قیادت موجود ہوگی، شریک چیئرمین زرداری کانفرنس کی صدارت کریں گے۔

انہوں نے تصدیق کی کہ ن لیگ کے سوا تمام جماعتوں کو شرکت کی دعوت دی ہے، دراصل تمام تر حالات کی خرابی،ملک پر قرضوں کا بڑھنا، دہشت گردی اور بے روزگاری کی ذمہ دار ن لیگ ہے اس لیے انہیں دعوت نہیں دیں گے۔

فروری 24, 2017
گوادر بندرگاہ منصوبے کا اختیار بلوچستان کو دیا جائے، آل پارٹیز کانفرنس

اسلام آباد : پاک چین اقتصادی راہداری سے متعلق آل پارٹیز کانفرنس میں وزیراعظم سے اے پی سی کا وعدہ پورا کرنے کا مطالبہ کیا گیا۔ یہ بھی کہا گیا گوادر بندرگاہ منصوبے کا اختیار بلوچستان کو دیا جائے۔

اسلام آباد میں پاک چین اقتصادی راہداری سے متعلق آل پارٹیز کانفرنس بلوچستان نیشنل پارٹی کے سربراہ سردار اختر مینگل کی زیرصدارت ہوئی۔

کانفرنس میں بی این پی نے اپنے مطالبات پیش کئے ۔بلوچ رہنماؤں کا کہنا تھا حکومت نے اے پی سی نہیں بلائی اس لئے ہمیں بلانی پڑی۔ وزیراعلیٰ کے پی کے پرویز خٹک نے کہا کہ ہم پاکستان کی ترقی چاہتے ہیں لیکن ہمیں ہمارا حصہ ملنا چاہیئے۔

وفاقی وزیر منصوبہ بندی و ترقیات احسن اقبال نے کہا راہداری منصوبے میں کسی صوبے کے ساتھ امتیازی سلوک نہیں کیا جا رہا۔

مولانا فضل الرحمان کا کہنا تھا کہ کانفرنس بلائی تو گوادر کیلئے گئی تھی لیکن اس کا رخ اقتصادی کوریڈور کی طرف ہو گیا۔

پاک چین اقتصادی راہداری سے متعلق آل پارٹیز کانفرنس میں وزیراعظم سے گوادر پر اے پی سی کا وعدہ پورا کرنے کا مطالبہ کیا گیا۔

کانفرنس میں یہ بھی کہا گیا کہ گوادر کے رہائیشیوں کا معاشی تحفظ یقینی بنایا جائے۔ گوادر کے لوگوں پر سیاسی سرگرمیوں پر عائد پابندی ختم کی جائے۔

جنوری 11, 2016
اقتصادی راہداری منصوبے میں صوبوں سے امتیازی سلوک نہیں کیا گیا، احسن اقبال

اسلام آباد : وفاقی وزیر برائے ترقی و منصوبہ بندی احسن اقبال نے کہا ہے کہ پاک چین اکنامک کوریڈور منصوبے میں کسی مرحلے پر کسی صوبے سے کوئی امتیازی سلوک نہیں کیا گیا۔ یہ پورے ملک کا منصوبہ ہے۔

ان خیالات کا اظہار انہوں نے اسلام آبا د میں آل پارٹیز کانفرنس سے خطاب کرتے ہوئے کیا۔ وفاقی وزیر نے کہا کہ پاک چین اقتصادی راہداری کی وجہ سے پوری دنیا کی توجہ پاکستان کی طرف ہو گئی ہے اور منصوبے پر شفافیت سے کام جاری ہے۔

اقتصادی راہداری منصوبے کے تحت بلوچستان کے حصے میں 7.1 ارب ڈالر کے منصوبوں پر کام ہورہا ہے جو کل رقم کا 21 فیصد بنتا ہے۔ توانائی منصوبوں میں کوئلےکے منصوبوں کو ترجیح دی گئی ہے.

کوئلے کے منصوبوں سے سستی اورجلد بجلی دستیاب ہوسکتی ہے۔ 46ارب ڈالر کی سرمایہ کاری میں سے35ارب ڈالرتوانائی جبکہ 11ارب ڈالر انفراسٹرکچر پر خرچ ہونگے اور توانائی منصوبوں سے 17ہزار میگا واٹ بجلی حاصل ہوگی۔

جنوری 10, 2016
تمام سیاسی جماعتیں بیرونی سازشوں کو ناکام بنائیں گی، آل پارٹیز کانفرنس

کوئٹہ : وزیر اعظم نواز شریف کی زیرصدارت منعقدہ آل پارٹیز کانفرنس کا اعلامیہ جاری کردیا گیا ہے۔

اعلامیہ میں کہا گیا ہے کہ سانحہ مستونگ ،پشاور اور صفورا گوٹھ کی طرح المناک واقعہ ہے اور اس سلسلے میں ذمہ داروں کو کیفر کردار تک پہنچانے میں کوئی کسر نہیں اٹھائی جائے گی۔

اعلامیہ میں کہا گیا ہے کہ ملک دشمن قوتیں اپنے بیرونی آقاؤں کے اشارے پر بلوچستان کے حالات خراب کررہی ہیں لیکن تمام سیاسی جماعتیں اور سیکورٹی ادارے دہشت گردی کی کارروائیوں اور بیرونی سازشوں کو ہرقیمت پر ناکام بنائیں گے۔

اعلامیہ میں کہا گیا ہے کہ گوادر کاشغر اقتصادی راہداری پاکستان دشمنوں کی نظر میں کانٹے کی طرح کھٹک رہی ہے ۔

اعلامیہ میں سیاسی قیادت کو اقوام اور قبائل کو باہم دست وگریباں کرنے کی گھناؤنی سازش ناکام بنانے پر خراج تحسین پیش کیا گیاہے۔

جون 2, 2015
گڈ اور بیڈ ایم کیو ایم کا چکر اب ختم ہوجانا چاہیئے، لیاقت بلوچ

کراچی : جماعت اسلامی کے مرکزی سیکریٹری جنرل لیاقت بلوچ نے کہا ہے کہ وفاقی حکومت دہشت گردوں کی سرپرستی بند کرے ۔

کراچی میں دہشت گردی کے ماسٹر مائنڈ کو بے نقاب کرکے قانون کے کٹہرے میں لایا جائے۔ ان خیالات کا اظہار انہوں نے کراچی میں ادارہ نور حق میں جماعت اسلامی کے زیر اہتمام سانحہ بارہ مئی کے حوالے سے آل پارٹیز کانفرنس سے خطاب کرتے ہوئے کیا۔

لیاقت بلوچ کاکہنا تھا کہ سندھ میں غیر جانبدار گورنر لایا جائے ۔ گڈ اور بیڈ ایم کیو ایم کا چکر اب ختم ہوجانا چاہیے ۔

تقریب کے دیگر شرکا نے اپنے خطاب میں کہا کہ سانحہ بارہ مئی کی مذمت اور تحقیقات کی اپیل کرتے ہیں،انہوں نے کہا کہ کراچی آپریشن بلاتفریق ہونا چاہیئے اور جرائم کے مکمل خاتمے تک جاری رہنا چاہیے۔

مئی 13, 2015
فرنس آئل کی عدم دستیابی بحران کی وجہ بنی، خورشید شاہ

سکھر: خورشید شاہ نے کہا ہے کہ عابد شیر علی نے بلوچستان میں دھماکوں کی وجہ سے بجلی بند ہونے کا کہا ہے اگر دھماکوں سے بجلی بند ہوتی تو بلوچستان میں ہوتی پورے ملک میں بجلی بند نہیں ہوتی۔

قائد حزب اختلاف سید خورشید احمد شاہ نے سکھر میں میڈیا سے بات کر تے ہوئے کہا کے حکومت اگراداروں کی نجکاری کرے گی تو مزرور روڈوں پر نکل آئیں گے ملک میں 30سے 40لاکھ مزرور ہیں ،جو ایک بڑی طاقت ہو کر حکومت کے سامنے آجائیں گے ارباب غلام رحیم کا دماغ خراب ہو گیا ہے ،بلاول بھٹو ذرداری پاکستان پیپلز پارٹی کا چیئر مین ہے اور رہے گا۔

انکا کہنا تھا کہ 15روز قبل میں نے نشاندہی کی تھی کے پیٹرول کے بحران کے بعد ایک بڑا بحران آنے والا ہے وہ بحران بجلی کی شکل میں حکومت کے سامنے آیا بجلی چلانے کے لئیے فرنس آئل نہیں ہے اور 90فیصد فرنس آئل کی کمی کے باعث بجلی کا بحران پیدا ہوا ہے حکومت کو اس جانب سنجیدا ہونا چاہئے انھوں نے کہا کہ فارین منسٹر تاحال نہیں ہیں ۔

ایک سوال کے جواب میں انکا کہنا تھا کہ پاکستان سپر پاور ملکوں میں جو شمار ہوا ہے وہ شہید ذوالفقار علی بھٹو کی وجہ سے ہے۔

انھوں نے کہا کے سانحہ پشاور کئے شہیدوں کے چہلم کے فوراَ بعد عمرے کا خیال آگیا اگر انہیں عمرہ کرنا ہی تھا تو کچھ دن بعد چلے جاتے سعودیہ عرب کے شاہ عبداللہ انتقال ہو گئے ،عمران خان ان کے غم میں شریک ہونے کے بجائے سعودی عرب سے پریس کانفرس کر رہے ہیں۔

جنوری 25, 2015
آل پارٹیز کانفرنس میں فوجی عدالتوں سے متعلق کوئی بات نہیں ہوئی، خورشید شاہ

اسلام آباد: قائد حزب اختلاف خورشید شاہ نے کہا ہے کہ چوبیس دسمبرکو آل پارٹیز کانفرنس میں فوجی عدالتوں سے متعلق کوئی بات نہیں ہوئی تھی۔

چوبیس دسمبر کو سیاسی و عسکری قیادت کی طویل بیٹھک کے بعد وزیرِاعظم کا رات قوم سےخطاب میں فوجی عدالتوں کے قیام کا اعلان اور ایک دن کی سنجیدگی پر حسبِ سابق پھر سیاست غالب آگئی۔

قائد حزبِ اختلاف نے انکشاف کیا ہے کہ آل پارٹیزکانفرنس میں ملٹری کورٹ سے متعلق کوئی بات ہی نہیں ہوئی، اے پی سی میں خصوصی عدالتوں کے قیام پر مشاورت ہوئی، سانحۂ پشاورکے بعد دہشتگردوں کے خلاف بھرپور کارروائی کا عزم اپنی جگہ لیکن سیاسی قیادت ایک بار پھر الفاظ کی ہیرا پھیری میں مصروف ہے۔

انھوں نے کہا کہ اے پی سی میں بات ملٹری کورٹس کی ہوئی یا خصوصی عدالتوں کی لیکن یہ بات ضرور ہوئی کہ عدالتوں کی سربراہی فوجی افسر کرے گا۔

پھر لفظوں کی جنگ میں الجھ کر قومی اتفاق رائے کو اختلاف رائے بنانےکی کوشش کیوں کی جارہی ہے؟ خورشید شاہ کے بیان کے بعد اندازہ لگانا مشکل ہوگیا کہ وزیرِاعظم کا رات گئے قوم سے خطاب قومی اتفاق رائے تھا یا اختلاف رائے۔

جنوری 1, 2015