Tag: آمدن سے زائد اثاثے

سکھر: قومی احتساب بیورو سکھر نے پاکستان پیپلز پارٹی کے ایم این اے رمیش لال کو کل طلب کر لیا ہے۔

اے آر وائی نیوز کے مطابق ایم این اے رمیش لال پر نیب کی جانب سے آمدن سے زائد اثاثے بنانے کا الزام عائد کیا گیا ہے، جس پر انھیں اہل خانہ سمیت طلب کر لیا گیا ہے۔

نیب ذرائع کا کہنا ہے کہ رمیش لال کی والدہ، 2 بھائی، اور دیگر رشتہ داروں کو بھی آمدن سے زائد اثاثوں کی تفتیش میں شامل کیا گیا ہے، رمیش لال سمیت مجموعی طور پر خاندان کے 19 افراد کو طلب کیا گیا ہے۔

ذرائع نے بتایا کہ نیب نے جواب مانگا ہے کہ انھوں نے ایک ارب روپے سے زائد کے اثاثے کیسے بنائے؟ پی پی ایم این اے سے 50 کروڑ سے زائد کی میڈیسن کمپنی، ریزیڈنسی اور اپارٹمنٹس کی تفصیلات طلب کی گئی ہیں۔

مشتعل ایم این اے نے موٹر وے کے درمیان کار کھڑی کر کے ٹریفک روک دی

نیب نے رمیش لال کو نوٹس جاری کر دیا ہے، جس میں مدن لعل رائس ملز اور دیگر اثاثوں کی تفصیلات مانگی گئی ہیں۔

لاہور: ذرایع نے کہا ہے کہ اپوزیشن لیڈر شہباز شریف نے اپنے کیس کی پیروی کے لیے وکیل نہ کرنے کا فیصلہ کر لیا ہے۔

تفصیلات کے مطابق شہباز شریف آج آمدن سے زائد اثاثہ جات کیس میں احتساب عدالت میں پیش ہوئے، اس سے قبل انھوں نے فیصلہ کیا تھا کہ وہ وکیل نہیں کریں گے اور عدالت میں وکیل پیش نہیں ہوں گے۔

ذرایع ن لیگ نے بتایا کہ شہباز شریف نے کہا ہے کہ وہ اپنا کیس اللہ کی عدالت میں چھوڑ رہے ہیں، نیب جتنے دن چاہے ریمانڈ لے لے، اپنا کیس خود لڑوں گا کسی سے مدد نہیں لوں گا۔

دریں اثنا، جسمانی ریمانڈ کیس کی سماعت کے لیے عدالت میں پیش ہو کر شہباز شریف نے کہا انصاف کی دھجیاں اڑائی جا رہی ہیں، نیب نیازی گٹھ جوڑ کی وجہ سے انصاف نہیں ہو رہا، جب والد کی جانب سے اثاثے تقسیم ہوئے تو اس وقت ہم جلا وطن تھے، جب میں ملک واپس آیا تو 100 فی صد اثاثے بچوں کومنتقل کر دیے۔

ضمانت مسترد ، نیب نے شہبازشریف کو گرفتار کرلیا

شہباز شریف نے کہا جن کمپنیوں کی بات کی جا رہی ہے ان کا میں ڈائریکٹر تھا نہ ہی پارٹنر، کبھی کمپنیوں سے پیسہ نہیں لیا، کہا جا رہا ہے کہ یہ میرے بے نامی اثاثے ہیں، 2017 میں میرے سب سڈی نہ دینے کے فیصلے سے میرے بیٹے کی مل کو 90 کروڑ کا نقصان ہوا، میں نے پورے ہوش و حواس میں رہ کر یہ فیصلہ کیا تھا، میں اپنے بچوں کے معاملات کا جواب دہ نہیں۔

انھوں نے عدالت کو بتایا کہ میں نے ایتھنول پر 2 روپے ٹیکس لگایا تھا جب کہ میرے خاندان کی بھی اس کی فیکٹریاں تھیں، موجودہ حکومت نے ایتھنول پر جو خط لکھا وہ میری دیانت داری کا ثبوت ہے، پی ٹی آئی کی موجودہ حکومت نے اس 2 روپے لیٹر ٹیکس کو واپس لے لیا، میرے خاندان کی فیکٹریوں کو 1972 میں نیشنلائز کر دیا گیا، میرے والد اور چچا نے 6 ماہ میں 6 مزید فیکٹریاں لگائیں، اس وقت ہم کون سا اقتدار میں تھے۔

ادھر نیب عدالت سے شہباز شریف کا جسمانی ریمانڈ چاہتی ہے، ذرایع کا کہنا ہے کہ شہباز شریف اور ان کے 2 بیٹوں نے 9 صنعتی یونٹس سے 10 برس میں اربوں کے اثاثے بنائے، شہباز شریف نے فرنٹ مین، ملازمین اور منی چینجرز سے اربوں کے اثاثے بنائے، انھوں نے متعدد بے نامی اکاونٹس سے اربوں کی منی لانڈرنگ کی۔

ذرایع کا یہ بھی کہنا ہے کہ 1990 میں شہباز شریف کے اثاثے 2 اعشاریہ 212 ملین روپے تھے، 2018 میں شہباز شریف کے اثاثے 7 اعشاریہ 32 ارب تک پہنچ گئے، 376 اعشاریہ 22 ملین، 11 صنعتی یونٹس، 4 بے نامی کمپنیاں شہباز شریف نے بنائیں۔

سکھر/کراچی: جوائنٹ انویسٹی گیشن ٹیم نے آمدن سے زائد اثاثہ جات کیس میں 8 سال قبل انتقال کر جانے والے شخص کو طلب کر لیا ہے۔ دوسری طرف سابق چیئرمین اسٹیل مل معین آفتاب شیخ و دیگر کی بریت کا فیصلہ چیلنج کر دیا گیا۔

تفصیلات کے مطابق پی پی رہنما خورشید شاہ سمیت 18 افراد کے خلاف آمدن سے زائد اثاثوں کے کیس میں جے آئی ٹی نے آٹھ سال قبل انتقال کرنے والے شخص کو بلا لیا۔

جے آئی ٹی نے خورشید شاہ کے مرحوم بھائی کو 3 مارچ کو طلب کیا ہے، جب کہ سید علی نواز کا 8 سال قبل انتقال ہو چکا ہے۔ خیال رہے کہ نیب ملتان کے ڈی جی کی سربراہی میں 5 رکنی جے آئی ٹی تشکیل دی گئی تھی۔

ادھر سندھ ہائی کورٹ میں سابق چیئرمین اسٹیل مل معین آفتاب شیخ و دیگر کی بریت کا فیصلہ چیلنج کر دیا گیا ہے، 90 کروڑ سے زائد کرپشن ریفرنس فیصلے کے خلاف چیئرمین نیب نے اپیل دائر کی، احتساب عدالت نے عدم شواہد پر معین آفتاب سمیت 3 ملزمان کو بری کیا تھا۔

ڈائریکٹر کمرشل پاکستان اسٹیل مل ثمین اصغر اور کانٹریکٹر عبد الرشید بھی اس کیس میں شامل ہیں، نیب کی اپیل میں کہا گیا ہے کہ معین آفتاب شیخ اور ثمین اصغر پر اختیارات کے ناجائز استعمال کا الزام تھا، معین آفتاب نے عبدالرشید کو کوئلہ خریدنے کا غیر قانونی ٹھیکا دیا، معین آفتاب نے مارکیٹ ریٹ سے مہنگے داموں کوئلہ خریدا، ملزموں نے قومی خزانے کو 90 کروڑ سے زائد کا نقصان پہنچایا۔