آج کل غیر صحت مند اور غیر متحرک طرز زندگی کے باعث ذیابیطس کا مرض بے حد عام ہوتا جارہا ہے۔ ذیابیطس کا شکار افراد سینکڑوں مہنگی مہنگی دوائیاں کھانے پر مجبور ہوجاتے ہیں جبکہ انہیں کڑا پرہیز بھی کرنا پڑتا ہے۔
مگر حال ہی میں کی جانے والی ایک سائنسی تحقیق سے پتہ چلا کے آم کے پتے ذیابیطس کا قدرتی علاج ہیں۔
مزید پڑھیں: فوری توجہ کی متقاضی ذیابیطس کی 8 علامات
ذیابیطس دراصل اس وقت ہمارے جسم کو اپنا شکار بناتا ہے جب ہمارے جسم میں موجود لبلبہ درست طریقے سے کام کرنا چھوڑ دے اور زیادہ مقدار میں انسولین پیدا نہ کر سکے، جس کے باعث ہماری غذا میں موجود شکر ہضم نہیں ہو پاتی۔ یہ شکر ہمارے جسم میں ذخیرہ ہوتی رہتی ہے جو شوگر کی بیماری کے علاوہ بے شمار امراض پیدا کرنے کا سبب بنتی ہے۔
عالمی ادارہ صحت کے مطابق پاکستان کی آبادی کا 10 فیصد حصہ ذیابیطس یا شوگر کے مرض کا شکار ہے۔ ایک محتاط اندازے کے مطابق پاکستان اس وقت ذیابیطس کے مریضوں کا ساتواں بڑا ملک ہے جبکہ سنہ 2030 تک یہ چوتھا بڑا ملک بن جائے گا جو ایک تشویش ناک بات ہے۔
ذیابیطس کے علاج اور بچاؤ کے لیے کئی طریقے تجویز کیے جاتے ہیں جن میں زیادہ سے زیادہ جسم کو حرکت دی جاسکے۔ ایک متحرک جسم میں ذیابیطس پیدا ہونے کا امکان کم ہوتا ہے۔
مزید پڑھیں: سائیکل چلانا شوگر کے مرض کو روکنے میں مددگار
ایک تحقیق کے مطابق ایسے افراد جن میں ذیابیطس کا مرض ابتدائی مراحل میں ہو وہ اگر اپنے معمول سے صرف بیس منٹ زیادہ روزانہ پیدل چلیں تو ان میں ہارٹ اٹیک کا خطرہ بہت حد تک کم ہو سکتا ہے جبکہ دیگر امراض قلب میں بھی 8 فیصد تک کمی واقع ہوسکتی ہے۔
تاہم اس کا ایک آسان اور قدرتی علاج آم کے پتے بھی ہیں۔
ماہرین کے مطابق آم کے پتوں میں وٹامن، انزائم، اینٹی آکسیڈنٹس اور دیگر کئی عناصر موجود ہوتے ہیں جو جسم میں شوگر کی سطح کو معمول پر رکھتے ہیں۔
آم کے پتوں کی اس خاصیت سے فائدہ اٹھانے کے لیے اسے مندرجہ ذیل طریقے سے استعمال کریں۔
دس سے 15 آم کے پتے لیں۔
انہیں ایک گلاس پانی میں ابال لیں اور رات بھر کے لیے اسی پانی میں چھوڑ دیں۔
صبح اٹھ کر پانی کو چھان لیں اور نہار منہ پی لیں۔
بہترین نتائج کے لیے اسے 2 سے 3 ماہ تک استعمال کریں۔
اس کا ایک اور طریقہ استعمال یہ ہے کہ ان پتوں کو خشک کرلیں۔ اس کے بعد انہیں پیس کر پاؤڈر کی شکل میں پانی میں ڈال کر دن میں دو بار پیئں۔
اسی طرح چائے بناتے ہوئے آم کے پتوں کو شامل کرلیا جائے تو ذیابیطس کے علاوہ بخار، ڈائریا، دمہ، ٹھنڈ، اور بے خوابی وغیرہ میں بھی افاقہ ہوسکتا ہے۔ یہ جسم میں بلڈ پریشر کی سطح کو معمول پر رکھتے ہیں جبکہ خون کی نالیوں کی بھی صفائی کرتے ہیں جس سے دوران خون تیز ہوتا ہے۔
انتباہ: یہ مضمون قارئین کی معلومات میں اضافے کے لیے شائع کیا گیا ہے۔ مضمون میں دی گئی کسی بھی تجویز پر عمل کرنے سے قبل اپنے معالج سے مشورہ اور ہدایت ضرور حاصل کریں۔
