آندھرا پردیش: بھارتی ریاست میں ایک چور کو دوران ڈکیتی نیند کے آگے بے بس ہونے کے بعد سونا مہنگا پڑ گیا۔
تفصیلات کے مطابق ریاست آندھرا پردیش میں پولیس نے ایک ایسے چور کو گرفتار کر لیا ہے جو ڈکیتی کے دوران گھر میں سو گیا تھا، سوری بابو کا خیال تھا کہ وہ کچھ دیر جھپکی لے کر اٹھ جائے گا اور لوٹے مال کے ساتھ نکل جائے گا۔
دفاتر میں نیند کے غلبے کے باعث کام کے دوران ملازمین کا سونا تو آپ نے سنا ہوگا لیکن ڈکیتی کے دوران نیند کا غلبہ ہونے کے دوران اگر چور سو جائے تو اس کا کیا نتیجہ برآمد ہو سکتا ہے، ضلع ایسٹ گوڈاوری میں 21 سالہ چور سوری بابو نے گھر سے مال جمع کرنے کے بعد سوچا کہ تھوڑی دیر سونے کے بعد اٹھ جائے گا، لیکن سوتے حالت میں رنگے ہاتھوں پکڑا گیا۔
معلوم ہوا کہ چور ایئرکنڈیشنر کی ٹھنڈک میں نیند کے غلبے کے آگے مزاحمت نہیں کر سکا تھا اور سو گیا۔
پولیس کے مطابق گوکاورم سے تعلق رکھنے والے چور نے ایک پیٹرول پمپ کے مالک کے گھر ڈاکا ڈالنے کی کوشش کی تھی، چور کو جب گرفتار کیا گیا تو اس نے ماسک بھی پہن رکھا تھا لیکن کرونا وائرس والا نہیں، یہ بھی معلوم ہوا کہ چور نے کئی دن تک باقاعدہ گھر کی ریکی کی تھی۔
بتایا گیا کہ چور نے اپنے مالی حالات بہتر بنانے کے لیے منصوبہ بنایا تھا، 12 ستمبر کو وہ صبح سویرے چار بجے کھلے دروازے میں داخل ہوا، اور سیدھا گھر کے مالک ستی وینکٹ ریڈی کے کمرے میں گیا، جو اس وقت سو رہا تھا۔ دل چسپ بات یہ تھی کہ گھر کے مالک نے اس دن رقم الماری میں رکھنے کی بجائے باہر میز ہی پر رکھ دی تھی، کام بہت آسان ہو گیا تھا لیکن قسمت دیکھیے کہ سوری بابو کو نیند آ گئی۔
پولیس کا کہنا تھا کہ چور نے بتایا وہ تھکا ہوا تھا اور کمرا بھی بہت ٹھنڈا تھا تو وہ نیند کے آگے بے بس ہو گیا، اس نے سوچا کہ جھپکی لے کر اٹھ جائے گا اور یہ سوچ کر وہ گھر کے مالک کا کوٹ اوڑھ کر سو گیا، لیکن اس سے قبل کہ وہ جاگتا، مالک مکان پہلے جاگ گیا۔
مالک مکان نے کمرے میں ایک چور کو دیکھا تو خاموشی سے باہر نکلا اور دروازہ بند کر کے پولیس کو طلب کر لیا۔
پولیس کا کہنا تھا کہ بابو حلوائی کی دکان پر کام کرتا تھا اور اس پر قرضہ چڑھ گیا تھا، اس نے سوچا کہ اب چور بننے کے علاوہ وہ ان حالات سے باہر نہیں نکل سکے گا۔ اس نے دیکھا کہ پیٹرول پمپ کا مالک روز رقم لے کر گھر جاتا ہے، اس نے اس کا پیچھا کیا اور رقم چرانے کا منصوبہ بنا لیا۔
پولیس کا کہنا تھا کہ تفتیش کے بعد معلوم ہوا کہ بابو پیشہ ور چور نہیں تھا۔
