کراچی : آن لائن منشیات فروخت کرنے والا ایک اور نیٹ ورک بے نقاب ہوگیا، پولیس نے 2 ملزمان کو گرفتار کرکے ایک کلو سے زائد منشیات برآمد کرلی۔
تفصیلات کے مطابق کراچی میں ایس آئی یو اور سی آئی اے پولیس نے خفیہ اطلاع پر کارروائی کرتے ہوئے آن لائن منشیات کی ڈیلیوری میں ملوث دو ملزمان کو گرفتار کر لیا۔
ایس ایس پی ایس آئی یو امجد احمد شیخ نے بتایا کہ گرفتار ملزمان کی شناخت عبدالغنی اور ذیشان کے نام سے ہوئی ہے، جنہیں پریڈی اور شاہ لطیف ٹاؤن کے علاقوں سے حراست میں لیا گیا۔
پولیس کا کہنا تھا کہ ملزمان سے ایک کلو سے زائد منشیات برآمد کی گئی، جس میں آئس، کرسٹل اور ہیروئین شامل ہیں
ابتدائی تحقیقات میں انکشاف ہوا ہے کہ ملزمان حب اور وندر سے منشیات خرید کر کراچی میں سپلائی کرتے تھے۔
ایس ایس پی امجد احمد شیخ نے مزید بتایا کہ منشیات کی آن لائن ڈیلیوری کے لیے لوکیشن اور ایڈوانس پیمنٹ وصول کی جاتی تھی، جس کے بعد مختلف علاقوں میں آرڈر ڈیلیور کیے جاتے تھے۔
پولیس نے گرفتار ملزمان کے خلاف مقدمہ درج کر کے تفتیش شروع کر دی ہے۔