لاہور: ذرائع کا کہنا ہے کہ گندم 4 ہزار روپے فی من پر آ گئی ہے، لیکن آٹا ملوں نے آٹے کی قیمت کم نہیں کی ہے۔
تفصیلات کے مطابق لاہور میں 15 کلو آٹے کا تھیلا دکانوں پر 1800 اور 1900 روپے پر فروخت ہو رہا ہے، جب کہ گندم کی قیمت چار ہزار روپے فی من ہو گئی ہے۔
ذرائع نے بتایا کہ مل مالکان نے آٹے کی قیمت کم نہیں کی، چکی آٹا کی قیمت بھی کم نہ ہو سکی، چکی مالکان 150 روپے کلو آٹا بیچ رہے ہیں۔
روٹی اور نان کا وزن بھی کم کر دیا گیا، روٹی 14، نان 25 روپے کا ہو گیا، ضلعی انتظامیہ سرکاری نرخ نامے پر عمل میں ناکام نظر آ رہی ہے۔
ذرائع کے مطابق چکن کی فی کلو قیمت آج پھر 16 روپے کلو بڑھا دی گئی ہے، اور نئی قیمت 501 روپے کلو ہو گئی۔ دوسری طرف لاہور میں پیاز کی قیمت میں بھی مسلسل اضافہ ہو رہا ہے، سبزی فروشوں کا کہنا ہے کہ پیاز درآمد نہ ہونے کے باعث قیمتوں میں کمی نہیں آ رہی ہے۔
واضح رہے کہ صوبہ بلوچستان میں بھی عوام آٹا کی قیمت سے پریشان ہیں، صوبے میں 20 کلو آٹے کا تھیلا 2900 روپے میں فروخت ہو رہا ہے، اور 50 کلو آٹے کا تھیلا 7100 روپے میں فروخت ہو رہا ہے۔
100 کلو آٹے کا تھیلا 14 ہزار 200 روپے تک جا پہنچا، جب کہ 20 کلو سرکاری آٹے کا تھیلا 1510 روپے کا ہو گیا ہے۔
