لاہور : وفاقی وزیر اطلاعات و نشریات سینیٹر پرویز رشید نے کہا ہے کہ رینجرز کے آپریشن کے باعث گزشتہ سالوں کی نسبت کراچی شہر میں امن و امان کی صورتحال بہتر ہوئی۔
دھاندلی کے الزامات پر عمران خان کا اصل چہرہ پوری دنیا نے دیکھ لیا ہے، دہشت گردوں کے ساتھ ساتھ انتہا پسندانہ رویوں کا خاتمہ بھی ضروری ہے، جب تک دہشت گردی ختم نہیں ہوتی آپریشن ضرب عضب جاری رہے گا۔
تفصیلات کے مطابق لاہور میں منعقدہ تقریب سے خطاب کرتے ہوئے وفاقی وزیر اطلاعات پرویز رشید نے کہا کہ جب تک کالعدم تنظیموں کا خاتمہ نہیں ہوتا دہشت گردوں کے خلاف آپریشن جاری رہے گا۔
کراچی آپریشن کے باعث گذشتہ سالوں کی نسبت امن و امان کی صورتحال بہتر ہورہی ہے جبکہ بھتہ خوری کے واقعات میں بھی خاطر خواہ کمی ہوئی ہے ۔
پینتیس پنکچر کے سوال پر وزیراطلاعات نے تحریک انصاف کے سربراہ کو مشورہ دیا کہ وہ انہیں چھوڑیں اور اپنے وکیل کا مشورہ مان لیں۔
عمران خان کی جانب سے دھاندلی کے الزامات لگانے اور عدالت میں الزامات ثابت نہ کر سکنے کے حوالے سے وفاقی وزیر اطلاعات ونشریات کا کہنا تھا کہ جھوٹا ثابت ہونے پر بھی عمران خان کو شرم محسوس نہیں ہوئی۔
دھاندلی کے الزامات اور عمران خان کا اصل چہرہ پوری دنیا نے دیکھ لیا ہے۔ پرویز رشید کہتے ہیں کہ اب تو لوگ عمران خان کو الزام خان کے نام سے جاننے لگے ہیں۔انہیں جھوٹا ثابت ہونے پر بھی شرم آنی چاہیے اور کم از کم رمضان میں تو انہیں جھوٹ بولنے سے پرہیز کرنا چاہیے۔
ایک سوال کے جواب میں ان کا کہنا تھا ہندوستانی قیادت کو یہ بات سمجھ لینا چاہئیے کہ بھارت کو بھی امن کی اتنی ہی ضرورت ہے جتنی پاکستان کو ہے۔
امن کی تلاش میں دونوں ملکوں کی قیادت کو انتہاپسندانہ رویوں سے جان چھڑانا ہوگی۔ وزیراطلاعات نے اس موقع پر آل پاکستان نیو ز پیپرز سوسائٹی اور صحافیوں کو درپیش مسائل کے حل کی یقین دہانی کروائی۔
