اسلام آباد : یوٹیلیٹی اسٹورز کارپوریشن میں کرپشن اور بے ضابطگیوں کا انکشاف ہوا، آڈٹ رپورٹ میں ہوشربا حقائق سامنے آگئے۔

تفصیلات کے مطابق یوٹیلیٹی اسٹورز کارپوریشن میں بڑے پیمانے پر کرپشن اور بے ضابطگیوں کا بھانڈا پھوٹ گیا، آڈٹ رپورٹ میں انکشاف ہوا ہے کہ ہری پور میں یوٹیلیٹی اسٹورز کے 99 لاکھ روپے مالیت کا سامان متعلقہ گارڈز کی غفلت کے باعث چوری ہوا۔

رپورٹ میں کہنا تھا کہ یوٹیلیٹی اسٹورز نے 16.4 ارب روپے کی غیر معیاری امپورٹڈ گندم خریدی جبکہ 1.6 ارب روپے کا غیر معیاری آٹا عوام کو فروخت کیا گیا۔

مزید یہ کہ جولائی 2023 میں مقامی کے بجائے مہنگی امپورٹڈ گندم خریدنے سے قومی خزانے کو 1.3 ارب روپے کا نقصان اٹھانا پڑا۔

آڈٹ رپورٹ میں یہ بھی انکشاف ہوا کہ 73 ہزار ٹن غیر معیاری آٹا فراہم کرنے والی 11 فلور ملوں پر صرف ایک لاکھ 38 ہزار روپے جرمانہ عائد کیا گیا، جبکہ چند یوٹیلیٹی اسٹورز ملازمین 74 کروڑ روپے کی چوری، فراڈ اور نان ریکوری سمیت دیگر بے ضابطگیوں میں ملوث پائے گئے۔

سبسڈی کے نام پر عوام کو ریلیف دینے کے بجائے یوٹیلیٹی اسٹورز میں اشیائے ضروریہ عام مارکیٹ سے بھی مہنگی بیچی گئیں۔

رپورٹ کے مطابق صارفین سے 17 کروڑ 92 لاکھ روپے اضافی وصول کیے گئے اور سستا آٹا فراہم کرنے کے بجائے مہنگا بیچا گیا۔

سندھ کا مری کہلانے والے تفریحی مقام گورکھ ہل اسٹیشن میں کروڑوں کے گھپلے سامنے آئے ہیں آڈٹ رپورٹ میں بدعنوانیوں کی نشاندہی کی گئی ہے۔

سندھ کے ضلع دادو کے قریب واقع گورکھ ہل اسٹیشن جس کو اس کے بلند جائے وقوع کی وجہ سے سندھ کا مری بھی کہا جاتا ہے اور اکثر وہاں برفباری بھی ہوتی ہے۔

گورکھ ہل اسٹیشن کو سیاحوں کے لیے بہترین تفریح مقام بنانے کے لیے بڑے فنڈز مختص کیے گئے۔ تاہم جاری آڈٹ رپورٹ کے مطابق 3 ارب سے زائد اخراجات کے باوجود گورکھ ہل اسٹیشن پر آج بھی سہولتیں نہ ہونے کے برابر ہیں۔

اس حوالے سے سامنے آنے والی آڈٹ رپورٹ میں گورکھ ہلز اتھارٹی میں بھرتیوں، ٹھیکوں اور خریداریوں میں بدعنوانیوں کی نشاندہی کی گئی ہے۔

آڈٹ رپورٹ میں یہ ہوشربا انکشاف بھی کیا گیا ہے کہ گورکھ ہلز کے لیے جن چار ٹھیکیداروں کو سب سے زیادہ ٹھیکے دیے گئے۔ ان کے گھر کا ایڈریس ایک ہی نکلا۔ ان ٹھیکیداروں میں مہوش شوکت، محمد علی چوہان، ماجد علی چوہان اور راشد علی چوہان شامل ہیں۔

رپورٹ کے مطابق تمام ٹھیکیداروں کے گھر کا پتہ کراچی پی آئی بی کالونی جیل روڈ ہاؤس نمبر ون ہے۔ چاروں ٹھیکیداروںکو تین کروڑ 85 لاکھ روپے کے ٹھیکے دیے گئے۔

آڈٹ رپورٹ میں گورکھ ہلز اتھارٹی کے 8 سال کے اکاؤنٹس کے حوالے سے بھی انکشافات کیے گئے ہیں۔

آڈٹ رپورٹ میں کہا گیا ہے کہ 10 اپریل کو اتھارٹی سے تحریری طور پر جواب مانگا گیا، لیکن نہیں دیا گیا۔ ٹھیکیداروں سے ٹیکس وصول نہ کر کے بھی انہیں فائدہ پہنچایا گیا۔

رپورٹ میں یہ بھی انکشاف کیا گیا ہے کہ اسٹامپ ڈیوٹی کی مد میں ایک کروڑ ٹیکس نہیں کاٹا گیا جب کہ دو کروڑ 43 لاکھ روپے کا جنرل سیلز ٹیکس بھی نہیں کاٹا گیا۔

لاہور: گریٹر اقبال پارک کی تعمیر میں کروڑوں کی مالی بےضابطگیوں کا انکشاف سامنے آیا ہے، آڈٹ رپورٹ پنجاب اسمبلی میں جمع کروادی گئی۔

تفصیلات کے مطابق پنجاب حکومت نے آڈٹ رپورٹ پنجاب اسمبلی میں جمع کرائی ہے، گریٹر اقبال پارک کی تعمیر میں بے ضابطگی سے متعلق رپورٹ میں بتایا گیا ہے کہ 21 کروڑ 98 لاکھ سے زائد کی رقم غیرضروری اشیا پر خرچ کی گئی۔

آڈٹ رپورٹ میں کہا گیا کہ نیشنل ہسٹری میوزیم ملازمین کو بغیر ریکارڈ 17 کروڑ تنخواہوں کی مد میں تقسیم کیے گئے، نیشنل میوزم میں ناقص معاہدے سے پی ایچ اے کو 16 کروڑ 47 لاکھ کا نقصان ہوا۔

8 کروڑ سے زائد اخراجات کا ریکارڈ فراہم نہیں کیا گیا، گریٹر اقبال پارک کے افتتاح پر رولز کی خلاف ورزی پر ایک کروڑ سے زائد خرچ کیے گئے۔

آڈٹ رپورٹ میں بتایا گیا ہے کہ پارک انتظامیہ نے 25 کروڑ روپے سے زائد رقم نجی فرمز کو بطور ایڈوانس غیرقانونی طور پر دیے۔