ARYNews.tv | Urdu – Har Lamha Bakhabar

Tag: آگ

  • کراچی یونیورسٹی کے قریب جھگیوں میں آگ لگ گئی

    کراچی یونیورسٹی کے قریب جھگیوں میں آگ لگ گئی

    کراچی: صوبہ سندھ کے دارالحکومت کراچی کی سب سے بڑی درسگاہ جامعہ کراچی کے قریب قائم خیمہ بستی میں آگ لگ گئی، آگ بجھانے کی کوششیں جاری ہیں۔

    تفصیلات کے مطابق کراچی یونیورسٹی کے قریب جھگیوں میں آگ لگ گئی، فائر بریگیڈ حکام کا کہنا ہے کہ 2 گاڑیاں آگ بجھانے کے لیے روانہ ہوگئیں۔

    فائر بریگیڈ حکام کا کہنا ہے کہ آگ لگنے کی وجوہات معلوم نہیں ہوسکیں۔

    پولیس حکام کا کہنا ہے کہ جھگیوں میں خانہ بدوش افراد رہائش پذیر ہیں، آگ لگتے ہی مکینوں نے سامان بچا کر محفوظ مقام پر منتقل کرنا شروع کردیا۔

    خیال رہے کہ آج صبح ہی خیرپور کے علاقے کوٹ ڈیجی کی خیمہ بستی میں قائم عارضی اسکول کو نامعلوم افراد نے آگ لگا دی تھی۔

    نامعلوم افراد نے رات گئے خیمہ بستی میں قائم اسکول کو آگ لگائی۔ اساتذہ کا کہنا ہے کہ خیمہ اسکول میں رکھی کتابیں اور دیگر سامان بھی جل گیا۔

  • خیمہ بستی میں قائم عارضی اسکول کو نامعلوم افراد نے آگ لگا دی

    خیمہ بستی میں قائم عارضی اسکول کو نامعلوم افراد نے آگ لگا دی

    خیرپور: صوبہ سندھ کے علاقے کوٹ ڈیجی میں خیمہ بستی میں قائم عارضی اسکول کو نامعلوم افراد نے آگ لگا دی، آتش زدگی سے اندر رکھی کتابیں اور سامان بھی جل گیا۔

    تفصیلات کے مطابق خیرپور کے علاقے کوٹ ڈیجی کی خیمہ بستی میں قائم عارضی اسکول کو نامعلوم افراد نے آگ لگا دی۔

    نامعلوم افراد نے رات گئے خیمہ بستی میں قائم اسکول کو آگ لگائی۔

    اساتذہ کا کہنا ہے کہ خیمہ اسکول میں رکھی کتابیں اور دیگر سامان بھی جل گیا، ایس ایس پی اور ڈپٹی کمشنر واقعے کا فوری نوٹس لیں۔

  • ویڈیوز: دل دہلا دینے والی آگ نے ماسکو کے بڑے شاپنگ مال کو نگل لیا

    ویڈیوز: دل دہلا دینے والی آگ نے ماسکو کے بڑے شاپنگ مال کو نگل لیا

    ماسکو: روسی دارالحکومت کے قریب ایک بڑے شاپنگ مال کو خوف ناک آگ نے نگل لیا۔

    میڈیا رپورٹس کے مطابق روسی دارالحکومت کے مضافات میں ایک بہت بڑے شاپنگ سینٹر میگا کھمکی میں بڑے پیمانے پر آتش زدگی سے تباہی پھیل گئی، جس میں کم از کم ایک شخص ہلاک ہو گیا ہے۔

    جمعہ کی صبح ماسکو کے شاپنگ سینٹر میگا کھمکی کو آگ نے بری طرح اپنی لپیٹ میں لے لیا تھا، 7 ہزار اسکوائر میٹر پر پھیلے شاپنگ سینٹر کے ایک حصے کی چھت دھماکے سے ٹوٹنے سے آگ فوری طور پر بڑے پیمانے پر پھیل گئی۔

    سوشل میڈیا پر آتش زدگی کی ویڈیوز بھی وائرل ہو گئی ہیں، جن میں دیکھا جا سکتا ہے کہ ایک دل دہلا دینے والے دھماکے سے شاپنگ سینٹر کی چھت منہدم ہوئی۔

    70 سے زائد فائر فائٹرز اور 20 فائر ٹرکوں کی مدد سے آگ بجھائی گئی، عمارت کے ڈیزائن کی وجہ سے آگ بھجانے کے عمل میں خاصی دشواری پیش آئی۔

    روسی حکام نے شبہ ظاہر کیا ہے کہ آگ جان بوجھ کر لگائی گئی ہے، روس کی بڑے جرائم کی تحقیقات کرنے والی کمیٹی نے کہا کہ وہ آگ لگنے کی وجہ تلاش کر رہی ہے، ماسکو ریجن کی ایمرجنسی سروسز ایجنسی کے سربراہ نے کہا کہ ایسا لگتا ہے کہ آگ عمارت میں مرمت کے کام کے دوران حفاظتی ضوابط کی خلاف ورزی کا نتیجہ تھا۔

  • ’آگ سے کھیلو گے تو جل جاؤ گے‘ چینی صدر کا تائیوان کے مسئلے پر جوبائیڈن کو جواب

    ’آگ سے کھیلو گے تو جل جاؤ گے‘ چینی صدر کا تائیوان کے مسئلے پر جوبائیڈن کو جواب

    واشنگٹن: چینی صدر شی جن پنگ نے امریکی صدر جو بائیڈن کو تائیوان کے مسئلے پر کھل کر کہہ دیا ہے کہ اگر ‘آگ سے کھیلو گے تو جل جاؤ گے۔’

    بین الاقوامی میڈیا کے مطابق امریکی صدر جو بائیڈن اور ان کے چینی ہم منصب شی جن پنگ نے جمعرات کو تائیوان کے مسئلے پر دونوں ممالک کے درمیان تناؤ بڑھ جانے کے بعد ایک طویل اور واضح گفتگو کی ہے۔

    سی این این کے مطابق تائیوان کے معاملے پر واشنگٹن اور بیجنگ کے درمیان تناؤ تیزی سے بڑھنے لگا ہے، جس پر دونوں رہنماؤں کی 2 گھنٹے بات ہوئی، جس میں دونوں نے ایک دوسرے کو دو ٹوک انداز میں خبردار کیا۔

    چینی صدر نے جو بائیڈن کو ‘ون چائنا پالیسی’ کی پاس داری کرنے کو کہا، اور دھکمی دی کہ جو آگ سے کھیل رہے ہیں وہ جل جائیں گے۔ دوسری طرف امریکی صدر نے بھی صاف بتا دیا کہ امریکا تائیوان کی حیثیت کو تبدیل کرنے کے کسی بھی یک طرفہ اقدام کی مخالفت کرتا ہے۔

    دریں اثنا، دونوں رہنماؤں نے آمنے سامنے ملاقات کے انتظامات شروع کرنے پر اتفاق کیا، خیال رہے کہ چینی صدر نے اس سے قبل ملاقات کے لیے کرونا وبا کے درمیان سفر سے انکار کر دیا تھا، اس کے بعد دونوں ممالک کے درمیان باہمی تعاون کے بعض شعبوں بشمول موسمیاتی تبدیلی کو ختم کر دیا گیا۔

    لیکن تائیوان کا مسئلہ سب سے زیادہ متنازعہ ثابت ہوا ہے، یہ مسئلہ تنازعے کے ایک سنگین نقطے کے طور پر ابھرا ہے، کیوں کہ ایک طرف امریکی حکام کو خود مختار تائیوان پر مزید چینی اقدامات کا خدشہ ہے، تو دوسری طرف ایوان کی اسپیکر نینسی پیلوسی کے ممکنہ دورے کے طور پر بیجنگ کی جانب سے سخت انتباہات اور ردِ عمل کا سامنا بھی ہے۔

    اس صورت حال کو قابو سے باہر ہونے سے روکنے کے لیے بائیڈن کی جانب سے چینی ہم منصب سے رابطے کو ایک ٹھوس کوشش قرار دیا جا رہا ہے۔

  • جنگلات میں آتش زدگی، محکمہ جنگلات کے 6 افسران معطل

    جنگلات میں آتش زدگی، محکمہ جنگلات کے 6 افسران معطل

    لاہور: صوبہ پنجاب میں جنگلات میں آتش زدگی کے واقعات کے بعد محکمہ جنگلات کے 6 افسران کو معطل کردیا گیا، افسران نے غفلت و لاپرواہی کا مظاہرہ کیا۔

    تفصیلات کے مطابق صوبہ پنجاب کے شہر کمالیہ میں جنگلات میں آگ لگنے کے معاملے پر سیکریٹری جنگلات نے فیصل آباد کے 6 افسران کو معطل کر دیا۔

    ذرائع کا کہنا ہے کہ افسران کو محکمانہ امور میں غفلت برتنے پر معطل کیا گیا، افسران کو کمشنر فیصل آباد اور ڈپٹی کمشنر ٹوبہ ٹیک سنگھ کی انکوائری رپورٹ کی روشنی میں معطل کیا گیا ہے۔

    رپورٹ کے مطابق افسران کی نااہلی اور لاپرواہی جنگل و جنگلی حیات کے زیادہ نقصان کا باعث بنی، افسران کو پیڈا ایکٹ کے سیکشن 6 کے تحت 3 ماہ کے لیے معطل کیا گیا۔

    سیکریٹری جنگلات کا کہنا ہے کہ معطل ہونے والے افسران میں ایس ڈی ایف او، 2 بلاک آفیسر اور 3 فاریسٹ گارڈز شامل ہیں۔

  • کتے کو گھر میں اکیلا چھوڑنے کا دل دہلا دینے والا انجام (ویڈیو دیکھیں)

    کتے کو گھر میں اکیلا چھوڑنے کا دل دہلا دینے والا انجام (ویڈیو دیکھیں)

    امریکی ریاست میسوری میں گھر پر اکیلے رہ جانے والے کتنے نے خود کو اور گھر کو بڑی مشکل میں ڈال دیا۔

    پالتو جانوروں کو گھر پر اکیلا چھوڑنے کا مشورہ نہیں دیا جاتا، خاص طور پر اگر وہ پریشانیاں پیدا کرتے ہوں، یا اکیلے رہ جانے پر پریشانی کا شکار ہو جاتے ہوں، بعض اوقات پالتو جانور اپنے آپ کو بہت مشکل میں ڈال سکتے ہیں اگر ان کی نگرانی نہ کی جائے، یہ واقعہ اس کی ایک بڑی مثال ہے۔

    امریکی ریاست میسوری میں ایک گھر کے اندر نصب سی سی ٹی وی کیمرے میں وہ خوف ناک لمحہ ریکارڈ ہوا جب ایک پالتو کتا باورچی خانے میں گیا اور گیس کا چولھا آن کر کے آگ لگانے کا باعث بن گیا۔

    فائر ڈیپارٹمنٹ کے مطابق آگ لگنے کے وقت گھر کے اندر کوئی شخص موجود نہیں تھا، اور اہل کاروں نے گھر سے دو کتوں کو نکال کر بچایا۔

    سی سی ٹی وی فوٹیج کا جائزہ لینے کے بعد، تفتیش کاروں نے کہا کہ دو میں سے ایک کتے نے کچن میں پچھلی ٹانگوں پر کھڑے ہو کر چولھے پر رکھے پین میں کھانے کی چیز دیکھنے کی کوشش کی، اور اس دوران غلطی سے شعلہ جل گیا۔

    اہل کاروں کے مطابق پین میں اب بھی کھانا موجود تھا اور آگ جلنے کے بعد پین میں موجود چکنائی نے آگ پکڑ لی، جو تقریباً آٹھ منٹ تک جلتی رہی۔

    خوش قسمتی سے اس واقعے میں کسی بھی کتے کو کوئی چوٹ نہیں آئی، تاہم اچانک آگ لگنے سے گھر کے کچھ حصوں کو نقصان پہنچا۔

  • سپر اسٹور میں آتشزدگی، ایس بی سی اے نے این ای ڈی یونیورسٹی سے مدد طلب کر لی

    سپر اسٹور میں آتشزدگی، ایس بی سی اے نے این ای ڈی یونیورسٹی سے مدد طلب کر لی

    کراچی: شہر قائد میں واقع ایک سپر اسٹور میں خوف ناک آتش زدگی کے باعث متاثرہ بلڈنگ بہ ظاہر ناقابل رہائش ہو چکی ہے، تاہم ایس بی سی اے نے اس بات کے باقاعدہ تعین کے لیے این ای ڈی یونیورسٹی سے مدد طلب کر لی ہے۔

    تفصیلات کے مطابق کراچی میں جیل چورنگی پر آگ سے متاثرہ بلڈنگ ابتدائی انسپیکشن میں ناقابل رہائش قرار دی گئی تھی، سندھ بلڈنگ کنٹرول اتھارٹی کے ڈائریکٹر جنرل نے این ای ڈی یونیورسٹی کے وائس چانسلر سے اس سلسلے میں مدد کی درخواست کر دی۔

    ڈی جی نے بتایا کہ یکم جون کو سمیعہ برج ویو میں آگ لگی جسے بجھانے میں تین روز لگے، بلڈنگ کے بیسمنٹ کو گودام کے طور پر استعمال کیا جا رہا تھا، تین دن مسلسل اگ لگی رہنے سے بلڈنگ اسٹرکچر شدید متاثر ہونے کا خدشہ ہے۔

    کراچی کے ڈیپارٹمنٹل اسٹور میں آتشزدگی ، بالائی منزل پر پھنسا نوجوان دم توڑ گیا

    ڈی جی ایس بی سی اے کے مطابق ابتدائی طور پر ٹیکنیکل کمیٹی نے بلڈنگ کو ناقابل رہائش قرار دیا تھا، تاہم این ای ڈی یونیورسٹی کے ماہرین، انجنئیر اسٹیل ٹیسٹ، کاپو ٹیسٹ اور کور ٹیسٹ وغیرہ کر کے نقصان کا تعین کریں، جس کے بعد اقدامات کیے جائیں گے۔

    ڈی جی نے درخواست میں کہا کہ ماہرین کی رپورٹ کے بعد فیصلہ کیا جا سکے گا کہ بلڈنگ رہنے کے قابل ہے یا نہیں۔

  • رئیلٹی شو کے دوران ایسا حادثہ جس نے سب کو خوف زدہ کر دیا (ویڈیو)

    رئیلٹی شو کے دوران ایسا حادثہ جس نے سب کو خوف زدہ کر دیا (ویڈیو)

    برطانوی رئیلٹی شو کے دوران ایک ایسا حادثہ پیش آیا جس نے سب کو خوف زدہ کر دیا۔

    گزشتہ رات معروف برطانوی رئیلٹی شو ‘بریٹینز گاٹ ٹیلنٹ’ کی امانڈا ہولڈن اس وقت سخت خوف زدہ رہ گئیں جب ایک ایکٹ کی پرفارمنس میں گڑ بڑ ہو گئی اور عملے کے ایک رکن کو آگ نے لپیٹ میں لے لیا۔

    ہفتے کی رات کے شو کے دوران جب اسٹیو رالنگز کی آنکھوں پر پٹی باندھ دی گئی اور اس نے آگ سے کھیلنا شروع کر دیا، اچانک وہ خود کو آگ لگوا بیٹھا، جس کی وجہ سے سب خوف زدہ ہو گئے۔

    سیکنڈوں کے اندر عملے کا ایک رکن اس کی مدد کے لیے پہنچ گیا لیکن وہ خود بہت بری طرح آگ کی لپیٹ میں آ گیا، آگ کے شعلوں نے اسے پوری طرح ڈھانپ دیا۔

    عملے کا رکن بھڑکتے شعلوں کو بجھانے کی کوشش میں فرش پر گرا، اور تب کیمرہ سامعین اور ججوں کی طرف گھوم گیا، جو سوال کر رہے تھے کہ کیا وہ جو کچھ دیکھ رہے تھے وہ حقیقی تھا۔

    یہ منظر دیکھ کر شو کے جج سائمن کوول نے صدمے میں اپنے ہاتھ چہرے پر رکھ دیے، جب کہ امانڈا ہولڈن چیخ رہی تھیں، اور الیشا ڈکسن سوال کر رہی تھی ‘یہ کیا ہو رہا ہے؟’

     یہ دیکھ کر عملے کے دیگر ارکان نے دوڑ کر  اس کے جسم پر لگی آگ بجھاتے ہوئے اس کی جان بچا لی۔

  • نئی دہلی: عمارت میں ہولناک آتشزدگی میں 27 افراد ہلاک

    نئی دہلی: عمارت میں ہولناک آتشزدگی میں 27 افراد ہلاک

    نئی دہلی: بھارتی دارالحکومت نئی دہلی میں ایک عمارت میں ہولناک آتشزدگی میں 27 افراد ہلاک اور درجنوں زخمی ہوگئے ہیں، واقعے کے بعد درجنوں افراد عمارت میں موجود تھے۔

    بھارتی میڈیا کے مطابق دارالحکومت نئی دہلی میں ایک عمارت میں آگ لگنے سے 27 افراد ہلاک اور درجنوں زخمی ہوگئے ہیں۔

    آتش زدگی کا واقعہ مغربی دہلی کی 4 منزلہ کمرشل عمارت میں پیش آیا ہے۔

    فائر ڈپارٹمنٹ کے ایک افسر کا کہنا ہے کہ آگ اب بجھا دی گئی ہے، ہلاک ہونے والے افراد کی تعداد 27 ہے جبکہ سرچ آپریشن جاری ہے۔

    آگ میں جھلس کر زخمی ہونے والے 40 افراد کو اسپتال لایا گیا ہے جہاں ان کا علاج جاری ہے، پولیس حکام کے مطابق 60 سے 70 افراد کو عمارت سے نکال لیا گیا ہے۔

  • کویت: مارکیٹ میں آگ سے متاثرہ دکان داروں کے لیے بڑی مدد

    کویت: مارکیٹ میں آگ سے متاثرہ دکان داروں کے لیے بڑی مدد

    کویت سٹی: کویت کی قدیم مارکیٹ سوق المبارکیہ میں لگنے والی آگ سے متاثرہ دکان داروں کو دوبارہ کاروبار شروع کرنے کے لیے بڑی پیشکش کردی گئی۔

    کویٹ خبر رساں ادارے کے مطابق نجی مواصلاتی کمپنی زین کا کہنا ہے کہ وہ کویت کی قدیم اور تاریخی مارکیٹ سوق المبارکیہ میں لگنے والی زبردست آگ سے متاثرہ درجنوں دکانوں کے مالکان کو دوبارہ کاروبار شروع کرنے میں ان کی مدد کرنے کے لیے اپنا حصہ ڈالے گی۔

    کمپنی کویت ریئل اسٹیٹ کی طرف سے جمع کروائے گئے بقیہ 6 ماہ کے لیے کرایے کی قیمت برداشت کرے گی اور تباہ شدہ دکانوں کے مالکان کو کویت مارکیٹ اور بڑی مارکیٹ دونوں میں ایک سال کے لیے رعایتی مدت کے ساتھ 6 ماہ مفت سہولت فراہم کرے گی۔

    زین نے اس بات پر زور دیا کہ اس طرح کے سماجی خطرات سے نمٹنے کے لیے نجی شعبے کے اداروں کے کندھوں پر قومی ذمہ داریاں ہیں، نجی شعبے ملک کی ترقی میں اس کی سرمایہ کاری کے ایک لازمی حصے کی نمائندگی کرتے ہیں۔

    کمپنی کی جانب سے مزید کہا گیا کہ نجی شعبے کے اداروں کی ذمہ داری، تجارتی سرگرمیوں اور لیبر مارکیٹ کو جدید بنا کر سماجی اور اقتصادی استحکام کو بہتر بنانے اور سماجی تحفظ فراہم کرنے پر عائد ہوتی ہے۔