ARYNews.tv | Urdu – Har Lamha Bakhabar

Tag: ابوظہبی ٹیسٹ

  • نیوزی لینڈ نے ابوظہبی ٹیسٹ جیت لیا، پاکستان سیریز1-2سے ہار گیا

    نیوزی لینڈ نے ابوظہبی ٹیسٹ جیت لیا، پاکستان سیریز1-2سے ہار گیا

    ابوظہبی : نیوزی لینڈ نے پاکستان کو تیسرے ٹیسٹ میں شکست دے کر سیریز جیت لی، قومی ٹیم 280 رنز کے تعاقب میں156 رنز بنا سکی، صرف بابراعظم نصف سنچری بنانے میں کامیاب رہے۔

    تفصیلات کے مطابق ابوظہبی میں کھیلے جارہے پاکستان بمقابلہ نیوزی لینڈ کے تیسرے ٹیسٹ کی دوسری اننگز میں نیوزی لینڈ نے پاکستان کو جیت کیلئے دو سو اسی رنز کا ہدف دیا تھا۔

    کیویز نے کھیل کے آخری روز7وکٹوں کے نقصان پر353رنز بناکر دوسری اننگز ڈیکلیئر کردی تھی۔ جواب میں بابر اعظم کے علاوہ قومی ٹیم کا کوئی کھلاڑی قابل ذکر کارکردگی دکھانے میں ناکام رہا، صرف55رنز پر آدھی ٹیم پویلین واپس لوٹ چکی تھی.

    بعد ازاں پوری ٹیم 156رنز پر پویلین لوٹ گئی۔ محمد حفیظ نیوزی لینڈ کے خلاف اپنے کیرئیر کا آخری ٹیسٹ میچ یادگار نہ بنا سکے، دوسری اننگز میں صرف 8رن بنا کر آؤٹ ہوگئے۔

    اوپننگ بلے باز امام الحق نے 22رنز بنائے، مایہ ناز بلے باز اظہر علی بھی زیادہ دیر وکٹ پر نہ ٹھہر سکے اور صرف پانچ رنز کے اسکور پر پویلین لوٹ گئے، ان کے بعد آنے والے کھلاڑی حارث سہیل نے بھی شائقین کو مایوس کیا اور محض نو رنز بنا کر چلتے بنے.

    اس کی اگلی ہی بول پر اسد شفیق بھی کوئی رن بنائے بغیر آؤٹ ہوگئے۔ کپتان سرفراز احمد بھی دھوکہ دے گئے انہوں نے28رنز بنائے، ان کے بعد بلال آصف اور یاسر شاہ بھی زیادی دیر وکٹ پر نہ ٹھہر سکے اور پویلین لوٹ گئے.

    قومی کے واحد کھلاڑی بابر اعظم تھے جنہوں نے نصف سنچری اسکور کی اور 51رنز بنا کر اعجاز پٹیل کی بول پر آؤٹ ہوگئے۔

  • ابوظہبی ٹیسٹ : پانچواں روز، نیوزی لینڈ نے پاکستان کو280رنز کا ہدف دے دیا

    ابوظہبی ٹیسٹ : پانچواں روز، نیوزی لینڈ نے پاکستان کو280رنز کا ہدف دے دیا

    ابو ظہبی : نیوزی لینڈ نے دوسری اننگز ڈکلیئر کرکے پاکستان ٹیم کو280رنز کا ہدف دے دیا، تین میچوں کی ٹیسٹ سیریز ایک ایک سے برابر ہے، محمد حفیظ اپنا آخری ٹیسٹ میچ یادگار نہ بنا سکے۔

    تفصیلات کے مطابق ابوظہبی میں کھیلے جارہے پاکستان بمقابلہ نیوزی لینڈ کے تیسرے ٹیسٹ کی دوسری اننگز کا کھیل جاری ہے، نیوزی لینڈ نے پاکستان کو جیت کیلئے دو سو اسی رنز کا ہدف دیا ہے۔

    کیویز نے دوسری اننگز تین سو تریپن رنز سات کھلاڑی آؤٹ پر ڈکلئیر کردی تھی۔ کھیل کے آخری دن پاکستان ٹیم کو سیریز بچانے کا چیلنج درپیش ہے، اناسی اوورز میں پاکستان کو دو سو اسی رنز بنانے ہیں۔

    تازہ ترین اطلاعات کے مطابق پاکستان کے اوپنر محمد حفیظ اور اظہرعلی آؤٹ ہوکر پویلین واپس چلے گئے ہیں، محمد حفیظ نیوزی لینڈ کے خلاف کیرئیر کا آخری ٹیسٹ میچ یادگار نہ بنا سکے، دوسری اننگز میں صرف 8رن بنا کر آؤٹ ہوگئے۔

    محمد حفیظ نے دوہزار تین میں ٹیسٹ ڈیبیو کیا۔ انہوں نے مجموعی طور پر پچپن ٹیسٹ میچز میں پاکستان کی نمائندگی کی۔ حفیظ نے طویل فارمیٹ میں دس سنچریاں اور بارہ نصف سنچریاں اسکور کیں۔

  • ابوظبی ٹیسٹ، چوتھے روز کیویز ڈٹ گئے، 198 رنز کی برتری حاصل کرلی

    ابوظبی ٹیسٹ، چوتھے روز کیویز ڈٹ گئے، 198 رنز کی برتری حاصل کرلی

    ابوظبی: پاکستان اور نیوزی لیںڈ کے درمیان فیصلہ کن ٹیسٹ میچ کے چوتھے روز نیوزی لینڈ کی ٹیم نے شاندار بیٹنگ کرتے ہوئے 198 رنز کی برتری حاصل کرلی اور اس کی چھ وکٹیں باقی ہیں۔

    تفصیلات کے مطابق ابوظبی ٹیسٹ کے چوتھے روز کا کھیل ختم ہوگیا ہے، چوتھے روز کے اختتام پر نیوزی لینڈ نے 4 وکٹ پر 272 رنز بنالیے اور پاکستان کے خلاف 198 رنز کی برتری حاصل کرلی۔

    نیوزی لینڈ کے کپتان کین ولیم سن نے شاندار سنچری اسکور کی، ولیم سن 139 رنز کے ساتھ وکٹ پرموجود ہیں جبکہ ہینری نیکولس نے 90 رنز بنا رکھے ہیں۔

    چوتھے روز کھیل کے آغاز پر پاکستان کو صرف دو وکٹیں ہی مل سکیں جب روس ٹیلر اور سمرویل آؤٹ ہوئے، ایک وکٹ یاسر شاہ اور ایک شاہین آفریدی کے حصے میں آئی۔

    یاسر شاہ نے کین ولیم سن کا 83 رنز پر کیچ ڈراپ کیا اس کے بعد انہوں نے سنچری اسکور کرتے ہوئے 139 رنز بنا ڈالے، پارٹنر شپ کو توڑنے کے لیے کپتان سرفراز احمد نے اظہر علی اور محمد حفیظ کو بھی آزمایا لیکن کامیابی نہ مل سکی۔

      تیسرے روز پاکستان اپنی پہلی اننگز میں 348 رنز بنا کر آؤٹ ہوگئی، نیوزی لینڈ نے دن کے اختتام پر 2 وکٹوں پر 26 رنز بنالیے، کیویز کو گرین شرٹس کی برتری ختم کرنے کے لیے مزید 48 رنز درکار ہیں۔

    پاکستان کی جانب سے شاہین آفریدی نے راول کو ایل بی ڈبلیو آؤٹ کیا، جبکہ یاسر شاہ نے ٹام لاتھم کو پویلین کی راہ دکھائی، یاسر شاہ کو تیز ترین 200 وکٹیں حاصل کرنے کے لیے مزید ایک وکٹ درکار ہے۔

    قبل ازیں اسد شفیق اور اظہر علی نے شاندار سنچریاں اسکور کیں اور پاکستان کا اسکور 348 رنز پہنچانے میں اہم کردار ادا کیا تاہم بعد مین آنے والے بلے باز خاطرہ خواہ کارکردگی دکھانے میں ناکام رہے، کپتان سرفراز احمد 25 اور بابراعظم 14 رنز بناسکے۔

    نیوزی لینڈ کی جانب سے سمر ویل نے 4 کھلاڑیوں کو پویلین کی راہ دکھائی جبکہ اعجاز پٹیل اور ٹرینٹ بولٹ نے دو وکٹیں حاصل کیں۔

    قبل ازیں دوسرے روز کے اختتام پر  پاکستان نے اپنی پہلی اننگز میں 3 وکٹوں کے نقصان پر 139 رنز بنالیے ہیں جبکہ نیوزی لینڈ کی سبقت ختم کرنے کے لیے مزید 135 رنز درکار ہیں۔

    نیوزی لینڈ کے 274 رنز کے جواب میں پاکستان نے اپنی اننگز شروع کی تو پہلے ہی اوور میں محمد حفیظ بغیر کوئی رن بنائے آؤٹ ہوئے، دوسرے وکٹ امام الحق کی گری جو 9 رنز بنا کر سلپ میں کیچ دے بیٹھے۔

    اس کے بعد اظہر علی اور حارث سہیل نے ٹیم کو سہارا دیا تاہم حارث سہیل بھی ٹم ساؤتھی کی گیند پر 34 رنز بنا کر پویلین لوٹ گئے۔

    دوسرے روز کا کھیل ختم ہوا تو اظہر علی 62 اور اسد شفیق 26 رنز پر کریز پر موجود تھے۔

    نیوزی لینڈ کی جانب سے تینوں وکٹیں فاسٹ بولر نے حاصل کی، ٹرینٹ بولٹ نے دو اور ٹم ساؤتھی نے ایک وکٹ حاصل کی۔

    اس سے قبل آج ابوظہبی ٹیسٹ میچ کے دوسرے روز نیوزی لینڈ نے 229 رنز 7 کھلاڑی آؤٹ سے اپنی اننگز کا آغاز تو صرف 45 رنز کے اضافے کے بعد پوری ٹیم 274 رنز پرآؤٹ ہوگئی۔

    قومی کرکٹ ٹیم کے نوجوان باؤلر بلال آصف نے نیوزی لینڈ کے خلاف شاندار باؤلنگ کا مظاہرہ کرتے ہوئے 5 وکٹیں حاصل کیں، یاسر شاہ نے 3 جبکہ حسن علی اور شاہین آفریدی نے ایک ایک کھلاڑی کو آؤٹ کیا۔

    ابوظہبی ٹیسٹ: نیوزی لینڈ نے7 وکٹوں پر229 رنز بنالیے

    یاد رہے کہ گزشتہ روز پاکستان اور نیوزی لینڈ کے درمیان جاری فیصلہ کن ٹیسٹ میچ کے پہلے روز نیوزی لینڈ نے 7 وکٹوں پر 229 رنز بنائے تھے۔

  • ابوظبی ٹیسٹ: پہلے دن کا کھیل ختم، نیوزی لینڈ نے 7 وکٹوں پر 229 رنز بنالیے

    ابوظبی ٹیسٹ: پہلے دن کا کھیل ختم، نیوزی لینڈ نے 7 وکٹوں پر 229 رنز بنالیے

    ابوظبی: پاکستان اور نیوزی لینڈ کے درمیان جاری فیصلہ کن ٹیسٹ میچ کے پہلے روز نیوزی لینڈ نے 7 وکٹوں پر 229 رنز بنالیے، یاسر شاہ نے تین کھلاڑیوں کو پویلین کی راہ دکھائی۔

    تفصیلات کے مطابق ابوظبی ٹیسٹ میچ کے پہلے دن کا کھیل ختم ہوگیا نیوزی لینڈ نے محتاط انداز میں بیٹنگ کرتے ہوئے 7 وکٹوں کے نقصان پر 229 رنز بنالیے، کپتان ولیم سن نے 89 رنز کی شاندار اننگز کھیلی، لیگ اسپنر یاسر شاہ نے تین وکٹیں حاصل کیں۔

    قبل ازیں نیوزی لینڈ کی جانب سے بیٹنگ کا آغاز راول اور ٹام لیتھم نے کیا شاہین شاہ آفریدی نے 4 رنز کے اسکور پر لیتھم کو ایل بی ڈبلیو آؤٹ کیا، ولیم سن اور راول کے درمیان شراکت قائم ہوئی تاہم یاسر شاہ نے اپنی جادوئی بولنگ سے راول کو ایل بی ڈبلیو آؤٹ کیا۔

    نیوزی لینڈ کی 70 رنز پر دوسری وکٹ گرنے کے بعد تیسری اور چوتھی وکٹ بھی دو رنز کے اضافے سے گر گئیں، ٹیلر بغیر کوئی رن بنائے پویلین لوٹے اور کرس نکولس کو بھی یاسر شاہ نے آؤٹ کیا۔

    کپتان ولیم سن اور بی جے واٹلنگ نے کچھ مزاحمت کی لیکن حسن علی نے کیوی کپتان کو 89 رنز پر پویلین روانہ کیا، آف اسپنر بلال آصف نے ٹم ساؤتھی اور گرینڈ ہوم کی وکٹ حاصل کی۔

    لیگ اسپنر یاسر شاہ نے تین وکٹیں حاصل کیں اور انہیں تیز ترین 200 وکٹیں حاصل کرنے کے لیے 2 وکٹیں درکار ہیں، بلال آصف نے دو وکٹیں حاصل کیں جبکہ شاہین شاہ آفریدی اور حسن علی کے حصے میں ایک وکٹ آسکی۔

    بی جے واٹلنگ 42 اور سومرویل 12 رنز کے ساتھ وکٹ پر موجود ہیں۔

    قبل ازیں ابوظہبی میں کھیلے جارہے پاکستان اوقر نیوزی لینڈ کے درمیان تیسرے اور آخری ٹیسٹ میں کیوی کپتان کین ولیمسن نے ٹاس جیت کر بیٹنگ کا فیصلہ کیا ہے۔

    اس موقع پر میڈیا سے گفتگو میں ان کا کہنا تھا کہ وکٹ پر گھاس ہے اور یہ چیز بیٹنگ کیلئے اچھی ہے۔ جبکہ قومی ٹیم کے کپتان سرفراز احمد کا بھی یہی کہنا تھا کہ وکٹ بیٹنگ کیلئے اچھی لگ رہی ہے، دبئی ٹیسٹ میں کامیابی سے بڑا حوصلہ ملا ہے اور یہ ٹیسٹ بہت اہمیت کا حامل ہے، نیوزی لینڈ کی ٹیم اہم حریف ہے تاہم ہم بھی جیت کیلئے پرعزم ہیں۔ ۔

    مزید پڑھیں: محمد عباس کے بعد اوپنر فخر زمان بھی ان فٹ، عامر کی واپسی کا امکان

    واضح رہے کہ قومی ٹیم میں ایک تبدیلی کی گئی ہے، پاکستان کے فاسٹ بولر محمد عباس انجری کے باعث تیسرے ٹیسٹ سے باہر ہیں جبکہ شاہین آفریدی ڈیبیو کریں گے، انہیں انجری کا شکار ہونے والے فاسٹ بولر محمد عباس کی جگہ شامل کیا گیا ہے۔

    قومی ٹیم کے دیگر کھلاڑیوں میں محمد حفیظ، امام الحق، اظہر علی، بابراعظم، اسد شفیق، حارث سہیل، کپتان سرفراز احمد، حسن علی، یاسر شاہ، بلال آصف، شاہین شاہ آفریدی اور فہیم اشرف شامل ہیں۔

  • ابوظہبی ٹیسٹ، تیسرے روز کا کھیل ختم، پاکستان کو جیت کے لیے 139 رنز درکار

    ابوظہبی ٹیسٹ، تیسرے روز کا کھیل ختم، پاکستان کو جیت کے لیے 139 رنز درکار

    ابوظہبی: پاکستان اور نیوزی لینڈ کے درمیان جاری پہلے ٹیسٹ میچ کے تیسرے روز کا کھیل ختم ہوگیا، قومی ٹیم کو جیت کے لیے مزید 139 رنز درکار ہیں۔

    تفصیلات کے مطابق ابوظہبی ٹیسٹ میچ کے تیسرے روز کا کھیل ختم ہوگیا ہے، دن کے اختتام پر پاکستان نے بغیر کسی نقصان کے 37 رنز بنالیے اور جیت کے لیے مزید 139 رنز درکار ہیں۔

    امام الحق 25 اور محمد حفیظ 8 رنز کے ساتھ کریز پر موجود ہیں۔

     نیوزی لینڈ کی ٹیم اپنی دوسری اننگز میں 249 رنز پر آؤٹ ہوگئی اور سرفراز الیون کو جیت کے لیے 176 رنز کا ہدف دے دیا، بی جے واٹلنگ 59 اور ہنری نکولز 55 رنز کی اننگز کھیلی۔

    تیسرے سیشن میں قومی بولرز نے شاندار بولنگ کی اور نیوزی لینڈ 6 وکٹیں حاصل کیں، گرینڈ ہوم 3 رنز بنا کر پویلین روانہ ہوئے، سودھی 18 رنز بنا کر آؤٹ ہوئے، ویگنر اور ٹرینٹ بولٹ بغیر کوئی رن بنائے پویلین لوٹ گئے

    پاکستان کی جانب سے حسن علی اور یاسر شاہ نے شاندار بولنگ کرتے ہوئے 5،5 وکٹیں حاصل کیں۔

    قبل ازیں ابوظہبی کے شیخ زید کرکٹ اسٹیڈیم میں نیوزی لینڈ نے پاکستان کے خلاف اپنی دوسری اننگز کا آغاز 56 رنز پرایک کھلاڑی آؤٹ سے کیا۔

    کپتان کین ولیمسن اور جیت راول نے ٹیم کا اسکور میں اضافہ کیا تاہم 86 رنز کے مجموعی اسکور پر کین ولیمسن 37 رنز بنا کر یاسر شاہ کا شکار بنے۔

    نیوزی لینڈ کی جانب سے اوپننگ بلے باز جیت راول اور روس ٹیلر اس وقت کریز پر موجود ہیں جبکہ مہمان ٹیم نے پاکستان کی 74 رنز کی برتری ختم کردی۔

    خیال رہے کہ اس سے قبل نیوزی لینڈ کی ٹیم پہلی اننگز میں 153 رنز پر ڈھیر ہوگئی تھی جس کے بعد پاکستانی ٹیم اپنی پہلی اننگز میں 227 رنز ہی بنا سکی تھی۔

    یاد رہے کہ ابوظہبی میں کھیلے جا رہے سیریز کے پہلے ٹیسٹ میچ کی پہلی اننگز میں نیوزی لینڈ کو 153 رنز پر آؤٹ کرکے نیا ریکارڈ قائم کیا تھا۔

    ابوظہبی میں اب تک کھیلے گئے ٹیسٹ میچ میں کسی بھی ٹیم کا پہلی اننگز میں سب سے کم اسکور تھا، اس سے قبل یہ ریکارڈ سری لنکا کے پاس تھا جو پاکستان کے خلاف 197 رنز پرآؤٹ ہوگئی تھی۔

  • ابوظہبی ٹیسٹ، دوسرے روز کا کھیل مکمل، نیوزی لینڈ کی 56 رنز ایک وکٹ گر گئی

    ابوظہبی ٹیسٹ، دوسرے روز کا کھیل مکمل، نیوزی لینڈ کی 56 رنز ایک وکٹ گر گئی

    ابوظہبی: پاکستان اور نیوزی لینڈ کے درمیان جاری پہلے ٹیسٹ میچ کے دوسرے روز کا کھیل مکمل ہوگیا، قومی ٹیم  پہلی اننگز میں 227 رنز بنا کر آؤٹ ہوئی جس کے جواب میں کیویز نے 1 وکٹ کے نقصان پر 56 رنز اسکور کرلیے۔

    ابوظہبی ٹیسٹ میچ کے پہلے روز نیوزی لینڈ کی ٹیم 153 رنز پر ڈھیر ہوئی تھی، پہلے روز کھیل کے اختتام پر پاکستان نے 2 وکٹوں کے نقصان پر 59 رنز بنائے تھے۔

    گرین شرٹس  نے دوسرے روز  59 رنز دو کھلاڑیوں کے نقصان پر اننگز کا آغاز کیا تو اظہر علی اور حارث سہیل میدان میں آئے اور وہ زیادہ دیر وکٹ پر ٹک نہ سکے، قومی ٹیم کی تیسری اور چوتھی وکٹ 91 کے مجموعے پر گر گئیں۔

    بعد ازاں کوئی بھی کھلاڑی زیادہ دیر وکٹ پر نہ رک سکا اور پوری ٹیم صرف 74 رنز سبقت حاصل کر کے 227 رنز پر آؤٹ ہوئی، سرفراز الیون کی جانب سے اسد شفیق 62 رنز بنا کر نمایاں بلے باز رہے جبکہ نیوزی لینڈ کے باؤلر ٹرینٹ بولٹ نے 54 رنز دے کر چار کھلاڑیوں کو پویلین کی راہ دکھائی۔

    ٹیسٹ  کےدوسرے دن کا کھیل ختم ہونے تک نیوزی لینڈ کی ٹیم نے 1 وکٹ کے نقصان پر 56 رنز اسکور کیے، کین ولمسن 27 اور جیت راول 26 کے ساتھ وکٹ پر موجود ہیں۔

    نیوزی لینڈ کو لیڈ برابر کرنے کے لیے مزید 18 رنز درکار ہیں۔

    قبل ازیں ابوظہبی ٹیسٹ میچ کے پہلے روز نیوزی لینڈ کی ٹیم 153 رنز پر آل آؤٹ ہوگئی تھی، کیوی کپتان کین ولیم سن کے علاوہ کوئی بلے باز خاطر خواہ کارکردگی نہ دکھا سکا تھا انہوں نے 63 رنز  اسکور کیے تھے۔

    کھانے کے بعد کیوی بلے باز ولیم سن اور نکولس نے شراکت قائم کرنے کی کوشش کی مگر وہ زیادہ دیر تک نہ چل سکی، نکولس 28 رنز بنا کر پویلین لوٹے اور گرینڈ ہوم بغیر کوئی رن بنائے حسن علی کا شکار بنے۔

    بی جے واٹلنگ 10 رنز بنا، سودھی 4 رنز،  واگنر  12 اور پٹیل صرف 6 رنز اسکور کرسکے تھے۔

    پاکستان کی جانب سے یاسر شاہ نے تین کھلاڑیوں کو پویلین کی راہ دکھائی، حسن علی، محمد عباس اور حارث سہیل نے دو، دو وکٹیں حاصل کیں۔

    مہمان ٹیم کی جانب سے ٹام لیتھم اور جیت روال نے اننگزکا آغاز کیا تو 20 کے مجموعی اسکور پر جیت راول 7 رنز بنا کر فاسٹ باؤلر محمد عباس کی گیند پر کیچ آؤٹ ہوئے۔

    ٹام لیتھم بھی کریز پر زیادہ دیر تک نہ رک سکے اور13 رنز بنا کر پویلین لوٹ گئے، روس ٹیلر 2 رنز بناسکے، دونوں بلے بازوں کو یاسر شاہ نے آؤٹ کیا۔

    یاد رہے کہ دونوں ٹیموں کے درمیان 4 سال قبل متحدہ عرب امارات میں ہونے والی ٹیسٹ سیریز 1-1 سے برابر رہی تھی۔

    پاکستان اور نیوزی لینڈ کے درمیان اب تک 55 ٹیسٹ میچز ہوئے ہیں جن میں پاکستان نے 24 اور نیوزی لینڈ نے 10 جیتے جبکہ 21 میچ ڈار رہے۔

    واضح رہے کہ پاکستان اور نیوزی لینڈ کے درمیان پہلے ٹیسٹ میچ میں فاسٹ باؤلر محمد عباس کو انتہائی اہم قرار دیا جا رہا ہے کیونکہ انہوں نے آسٹریلیا کے خلاف گزشتہ ٹیسٹ سیریز میں عمدہ باؤلنگ کا مظاہرہ کرتے ئوے 2 ٹیسٹ میچز میں 17 وکٹیں حاصل کی تھیں۔

  • ابوظہبی ٹیسٹ : پاکستان نے6 وکٹوں کے نقصان پر184 رنز بنالیے

    ابوظہبی ٹیسٹ : پاکستان نے6 وکٹوں کے نقصان پر184 رنز بنالیے

    ابوظہبی : ابوظہبی ٹیسٹ میچ کے دوسرے روز پاکستان کی مہمان ٹیم نیوزی لینڈ کے خلاف بیٹنگ جاری ہے۔

    تفصیلات کے مطابق ابوظہبی کے شیخ زید کرکٹ اسٹیڈیم میں آج پاکستان نے ٹیسٹ میچ کے دوسرے دن اپنی اننگز کا آغاز 59 رنز پر دو کھلاڑی آؤٹ سے کیا۔

    اظہرعلی نے 10 اور حارث سہیل نے 22 رنز سے اپنی اننگز کا آغاز کیا تو دونوں کھلاڑی زیادہ دیر تک کریز پرٹک نہ سکے اور 91 کے مجموعی اسکور پر اظہرعلی 22 اور حارث سہیل 38 رنز بنا کر پویلین لوٹ گئے۔

    پاکستان کی جانب سے اسد شفیق 26 اور نوجوان بلے باز بابراعظم 28 رنز بنا کر اس وقت کریز پر موجود ہیں۔

    ابوظہبی ٹیسٹ، پہلے روز کا کھیل ختم، پاکستان نے 2 وکٹ پر 59 رنز بنالیے

    یاد رہے کہ گزشتہ روز مہمان ٹیم نیوزی لینڈ پاکستان کے خلاف پہلے ٹیسٹ میچ میں ٹاس جیت کر بیٹنگ کرتے ہوئے 153 رنز بنا کر آؤٹ ہوگئی تھی۔

    پاکستان نے نیوزی لینڈ کے خلاف ٹیسٹ میچ کے پہلے روز دو وکٹوں کے نقصان پر 59 رنز بنائے تھے۔

    قومی کرکٹ ٹیم کی جانب سے یاسرشاہ نے 3 جبکہ محمد عباس، حسن علی اور حارث سہیل نے دو، دو وکٹیں حاصل کی تھیں۔ بلال آصف نے ایک کھلاڑی کو آؤٹ کیا تھا۔

  • ابو ظہبی ٹیسٹ: پاکستان نے آسٹریلیا کو 373 رنز سے شکست دے دی

    ابو ظہبی ٹیسٹ: پاکستان نے آسٹریلیا کو 373 رنز سے شکست دے دی

    ابو ظہبی: پاکستان نے دوسرے ٹیسٹ میں آسٹریلیا کو 373 رنز سے شکست دے دی جس کے بعد پاکستان نے 2 ٹیسٹ میچز کی سیریز 0-1 سے جیت لی۔

    تفصیلات کے مطابق ابو ظہبی میں جاری دوسرے ٹیسٹ میں آسٹریلوی ٹیم دوسری اننگز میں 164 رنز پر ڈھیر ہوگئی۔

    آسٹریلیا کی جانب سے چوتھے روز ایرون فنچ اور ٹریوس ہیڈ نے نامکمل اننگز کا آغاز کیا، ٹیم کا مجموعی اسکور 71 رنز بنا تو ٹریویس ہیڈ 38 رنز بنا کر آؤٹ ہوئے۔

    ایرون فنچ 31، شان مارش 5 اور کپتان ٹم پین بغیر کوئی رنز بنائے پویلین لوٹ گئے۔

    آسٹریلوی کھلاڑی مچل اسٹارک 27 رنز بنا کر یاسر شاہ کی گیند پر آؤٹ ہوئے جس کے بعد پیٹرسڈل بھی صرف 3 رنز بنا کر چلتے بنے۔

    پاکستان کی جانب سے تباہ کن باؤلنگ کا مظاہرہ کرنے والے محمد عباس نے 4 وکٹیں جبکہ یاسر شاہ نے 2 وکٹیں حاصل کیں۔

    میچ جیتنے کے بعد پاکستان نے آسٹریلیا کے خلاف ریکارڈ بھی بنا لیا۔ رنز کے اعتبار سے یہ پاکستان کی آسٹریلیا کے خلاف سب سے بڑی جیت ہے۔

    اس سے قبل پاکستان نے سنہ 2014 میں آسٹریلیا کو 356 رنز سے شکست دی تھی۔

    گزشتہ روز پاکستان نے ابو ظہبی ٹیسٹ میچ کے تیسرے دن کے آخری سیشن میں دوسری اننگز 400 رنز 9 کھلاڑی آؤٹ پر ڈکلیئر کر کے آسٹریلیا کو جیت کے لیے 538 رنز کا ہدف دیا تھا۔

    قومی کرکٹ ٹیم کی جانب سے آسٹریلیا کے خلاف پہلی اننگز میں محمد عباس نے تباہ کن باؤلنگ کا مظاہرہ کرتے ہوئے 5 جبکہ بلال آصف نے 3 کھلاڑیوں کو آؤٹ کیا تھا۔

    واضح رہے کہ 2 میچز پر مشتمل سیریز کے پہلے ٹیسٹ میچ میں آسٹریلوی بلے باز عثمان خواجہ کی شاندار بیٹنگ کی بدولت میچ ڈرا ہوگیا تھا۔

    میچ کے بعد شاندار بولنگ پر محمد عباس مین آف دی میچ قرار پائے۔ محمد عباس سیریز کے بھی بہترین کھلاڑی قرار پائے۔

    انہوں نے کہا کہ محنت کر رہا ہوں، ون ڈے کے لیے بھی دستیاب ہوں۔

    قومی کرکٹ ٹیم کے کپتان سرفراز احمد نے کہا کہ محمد عباس نے شاندار کارکردگی کا مظاہرہ کیا۔ تمام کھلاڑیوں نے بہترین کھیل پیش کیا۔

    انہوں نے کہا کہ نئے لڑکوں کو بھرپور موقع فراہم کیا جا رہا ہے، محمد عباس کی بولنگ سے دونوں ٹیموں میں فرق ثابت ہوا۔

  • ’اظہر علی کو کرکٹ تعلیم کی ضرورت ہے‘

    ’اظہر علی کو کرکٹ تعلیم کی ضرورت ہے‘

    ابوظہبی: آسٹریلیا کے خلاف کھیلے جانے والے ٹیسٹ میچ کے تیسرے روز اظہر علی مضحکہ خیز انداز میں رن آؤٹ ہوئے تو کھلاڑیوں اور شائقین نے انہیں آڑے ہاتھوں لیا۔

    تفصیلات کے مطابق ابوظہبی کے شیخ زید اسٹیڈیم میں پاکستان اور آسٹریلیا کی ٹیموں کے مابین دو ٹیسٹ میچوں کی سیزیز کا آخری میچ کھیلا جارہا ہے جس کا آج تیسرا روز تھا۔

    تیسرے روز انوکھا واقعہ اُس وقت پیش آیا کہ جب اظہر علی نے باؤلر پیٹر سڈل کی گیند پر سلپ میں شارٹ نکالا، گیند تیزی سے باؤنڈری لائن کی طرف جارہی تھی، بال کی اسپیڈ کو دیکھ کر قومی کرکٹ ٹیم کے دونوں بلے باز پر اعتماد انداز میں آدھی پچ پر آئے اور سکون سے بات چیت کرنے لگے۔

    پاکستانی بلے باز نےشارٹ کھیلنے کے بعد غور نہیں کیا کہ امپائر نے باؤنڈری کا اشار ابھی تک نہیں دیا، اسدشفیق اور اظہر علی وکٹ کے درمیان میں آکر مجموعی اسکور میں چار رنز کے اضافے کا جشن منا رہے تھے۔

    پڑھیں: پاکستان بمقابلہ آسٹریلیا، تیسرے روز کیا ہوا؟

    اظہر علی کو معلوم نہیں تھا کہ گیند باؤنڈری کے قریب جاکر رک گئی اسی اثناء فیلڈر نے فوراً گیند کو اٹھا کر وکٹ کیپر ٹم پین کی طرف پھینکا تو انہوں نے موقع کا فائدہ اٹھاتے ہوئے اسٹمپ اڑائے اور پھر امپائر سے اپیل کی۔

    وکٹ کیپر کی کال سُن کر امپائر نے 64 رنز پر کھیلنے والے اظہر علی کو آؤٹ قرار دیا مگر پاکستانی بلے باز کو اپنے آؤٹ ہونےکا یقین نہیں آیا اور وہ پچ پر کھڑے ہوکر ادھر اُدھر دیکھتے رہے۔

    پاکستانی بلے باز کی ویڈیو سوشل میڈیا پر وائرل ہوئی تو شائقین کرکٹ نے انہیں آڑے ہاتھوں لیا اور حد سے زیادہ خود اعتمادی پر شدید تنقید بھی کی۔

    قومی کرکٹ ٹیم کے سابق کپتان جو 66 ٹیسٹ اور 55 ایک روزہ میچز کھیل چکے ہیں ان پر صارفین نے تنقید کرتے ہوئے کہا کہ شاید اظہر علی کو یہ بات نہیں معلوم کہ جب تک گیند باؤنڈری لائن سے نہیں ٹکراتی اُس وقت تک چوکا نہیں ہوتا۔ انٹرنیٹ صارفین نے اسد شفیق کو بھی تنقید کا نشانہ بنایا۔

    دوسری جانب قومی کرکٹ ٹیم کے سابق کپتان اور معروف کامینٹیٹر رمیز راجہ نے اظہر علی کے آؤٹ کو انتہا کی بے وقوفی قرار دیتے ہوئے کہا کہ ’اس انداز سے تو اسکول کرکٹ کھیلنے والے بچے آؤٹ ہوتے ہیں‘۔

    رمیز راجہ کا کہنا تھا کہ ’انٹرنیشنل کرکٹ میں شاید اس طرح پہلا آؤٹ ہوا، اظہر علی کو کھیل کی تعلیم حاصل کرنے کی ضرورت ہے‘۔