دمشق: ابو محمد الجولانی نے کہا ہے کہ شام میں عام انتخابات کے انعقاد میں 4 سال کا عرصہ لگ سکتا ہے۔
حیات تحریر الشام گروپ کے سربراہ احمد الشرع المعروف ابو محمد الجولانی نے اتوار کو سعودی سرکاری نشریاتی ادارے العربیہ کو انٹرویو میں کہا کہ سابق صدر بشار الاسد کی انتظامیہ کے خاتمے کے بعد ملک میں انتخابات کے انعقاد میں چار سال لگ سکتے ہیں۔
انھوں نے شام میں ممکنہ انتخابات کے لیے پہلی بار ٹائم لائن دیتے ہوئے کہا کہ نئے آئین کی تیاری میں 3 سال، جب کہ انتخابات کے انعقاد میں چار سال لگ سکتے ہیں کیوں کہ اس کے لیے ایک جامع مردم شماری کی ضرورت ہے۔
الجولانی نے کہا کہ ملک میں اہل ووٹرز کی شناخت میں وقت لگے گا، خانہ جنگی کے دوران بہت سے شامی اندرونی طور پر بے گھر ہو گئے ہیں، یا انھوں نے دوسرے ملکوں میں پناہ لی ہے۔
شام میں پہلی بار خاتون انتہائی اہم منصب پر تعینات
احمد الشرع نے کہا کہ اسد حکومت کا تختہ الٹنے کے بعد شامی عوام کو ’عوامی سروسز‘ میں نمایاں تبدیلی اور بہتری دیکھنے میں ایک سال کا عرصہ لگ سکتا ہے۔ اس ماہ کے شروع سے ملک کی قیادت سنبھالنے کے بعد سے الشرع کی حکومت پر اس حوالے سے سوالات اٹھ رہے ہیں کہ وہ کثیر النسل ملک پر حکومت کیسے کریں گے، انھوں نے واضح کیا کہ شام کو اپنے نظام قانون کی تعمیر نو کی ضرورت ہے اور قانون کے مطابق انتخابات کرانے کے لیے ایک آبادی کی ایک جامع مردم شماری کرانی ہوگی۔
واضح رہے کہ شام بہت سے نسلی اور مذہبی گروہوں کا گھر ہے، جن میں کرد، آرمینیائی، آشوری (سُریانی)، عیسائی، دروز، علوی شیعہ اور عرب سنی شامل ہیں، عرب سنیوں کی اکثریت ہے۔
