Tag: اترپردیش

اترپردیش: بھارت کے علاقے سہارنپور میں پولیس نے چار ایسے افراد کو گرفتار کیا ہے جو لوگوں کو ان کے گھروں سے سونا نکالنے کا جھانسہ دے کر لوٹ لیتے تھے۔

تفصیلات کے مطابق بھارتی ریاست اترپردیش میں ضلع سہارنپور کے علاقے کوتوالی میں چار افراد کو لوگوں کو ٹھگنے کے الزام میں گرفتار کر لیا گیا، ملزمان گھروں سے زمین کھود کر سونا نکالنے کا دعویٰ کرتے تھے اور اس کے لیے گھر والوں سے نقد رقم لے کر فرار ہو جاتے تھے۔

مقامی پولیس کے مطابق گرفتار ملزمان سے رقم بھی برآمد کی گئی، ملزمان متعدد قسم کے جرائم میں ملوث رہے ہیں، یہ مختلف علاقوں میں گھوم پھر کر لوگوں سے میل جول بڑھاتے تھے اور پھر گھر میں سونا دفن ہونے کا جھانسہ دے کر رقم نکلوا لیتے تھے۔

پولیس کا کہنا تھا کہ ملزمان کو کوتوالی علاقے کے گاؤں ناظرپور میں ایک واردات کے دوران گرفتار کیا گیا، شاطر ملزمان نے گاؤں کے ایک شخص پھول سنگھ کو اپنی چینی چپڑی باتوں سے پہلے شیشے میں اتارا، اور ایک نقشہ دکھا کر یقین دلایا کہ اس کے گھر کی زمین میں سونا دفن ہے، جس کے لیے پوجا پاٹ کرنی ہوگی اور نو گڑھے کھودے جائیں گے۔

ملزمان نے دیہاتی سے کہا کہ پہلے نوگزے پیر کی قبر پر کالا کپڑا، سرسوں کا تیل، ناریل اور 521 روپے کا چڑھاوا کریں، رات میں ملزمان پھول سنگھ کے مکان پر پہنچے اور پوجا پاٹ شروع کر دی اور 50 ہزار کا مطالبہ کیا۔

پولیس کے مطابق ملزمان نے ایک گڑھے سے ایک قسم کی دھات نکال کر پھول سنگھ کو دکھائی تو اسے شک ہو گیا، جس پر اس نے انھیں پکڑ کر پولیس کو اطلاع دے دی۔

معلوم ہوا کہ ملزمان نے چاکلیٹ پر چمکیلی پنی چڑھا کر اسے سونا بتایا تھا، تاہم ان کی تدبیر الٹی پڑ گئی اور وہ گرفتار ہو گئے۔

بارہ بنکی: بھارتی ریاست اترپردیش میں بجلی کا میٹر بدلنے کے نام پر شہریوں کے بینک اکاؤنٹ کا صفایا کرنے والے گروہ کا پردہ فاش ہو گیا۔

بھارتی میڈیا کے مطابق اتر پردیش کے ضلع بارہ بنکی کے علاقے حیدر گڑھ میں ایک ایسے گروہ کا پردہ فاش ہو گیا ہے جو گھروں میں بجلی کے میٹر تبدیل کرنے کے بہانے گھر والوں کے اکاؤنٹس سے رقم نکال لیتے تھے۔

بارہ بنکی پولیس نے بجلی میٹر درست کرنے کے نام پر دھوکا دہی کرنے والے گروہ کے 3 کارندوں کو گرفتار کر کے ان کے خلاف مقدمہ درج کر دیا، پولیس کا کہنا تھا کہ ملزمان میں سے ایک لاک ڈاؤن سے قبل بیرون ملک سے لوٹا تھا، ملزمان سے بجلی کے میٹر اور متعدد الیکٹرانک ڈیوائسز بھی برآمد کیے گئے۔

ملزمان کے متعلق یہ انکشاف ہوا کہ وہ خصوصی طور پر ان گھروں کو نشانہ بناتے تھے جن میں صرف خواتین موجود ہوتی تھیں، پولیس کے مطابق کوتوالی حیدر گڑھ کے گاؤں املہرا کی رہائشی خاتون دھن راجا کی شکایت پر ملزمان کے خلاف کارروائی کی گئی۔

خاتون نے شکایت درج کرائی تھی کہ 14 جولائی کو 2 افراد موٹر سائیکل پر اس کے گھر میٹر درست کرنے آئے اور تھمب امپریشن لیا تو اس کے کھاتے سے 10 ہزار روپے نکل گئے، پولیس نے شکایت کی تحقیقات کرتے ہوئے جمعے کو قاضی پور موڑ سے رائے بریلی کے رشبھ تیواری، شیوم سنگھ اور ہری کیش کو گرفتار کر لیا۔

ملزمان سے تفتیش میں انکشاف ہوا کہ وہ لمبے عرصے سے بجلی کا میٹر درست کرنے کے نام پر دھوکا دہی کرتے آ رہے ہیں، پولیس کے مطابق تینوں ملزمان پہلے ریکی کرتے تھے کہ کس گھر میں صرف عورتیں ہی رہتی ہیں، اس کے بعد دوپہر کے وقت یہ لوگ بجلی کے محکمے کے ملازم کے روپ میں وہاں پہنچ جاتے تھے۔

پولیس کے مطابق ملزمان خواتین سے شناختی کارڈ لے کر ایک مشین پر تھمب امپریشن لگواتے تھے، پھر بینک کا نام پوچھ کر اندازے کے لیے سو دو سو روپے نکالتے، رقم کا اندازہ ہونے پر اکاؤنٹ سے رقم نکال لیتے تھے۔