ریاض: رواں برس حج کے ایام قریب آنے کے بعد سعودی حکام نے اجازت نامے کے بغیر مکہ مکرمہ میں داخلے پر پابندی عائد کردی ہے، پرمٹ رکھنے والے افراد کے علاوہ کسی شخص کو مکہ مکرمہ نہیں جانے دیا جائے گا۔
عرب میڈیا کے مطابق انتظامیہ نے حج 2025 کے موقع پر مکہ میں غری ضروری رش کو روکنے کے پیشِ نظر یہ فیصلہ کیا گیا ہے، جن غیر ملکیوں کے اقامے مکہ مکرمہ شہر سے جاری ہوئے ہیں وہ اس پابندی سے مستثنی ہوں گے۔
وزارت داخلہ اور امن عامہ کی جانب سے کہا گیا ہے کہ 23 اپریل 2025 سے ’مکہ پرمٹ ‘ پر عمل درآمد کا آغاز کیا جائے گا، غیر ملکی اجازت نامے کے بغیر مکہ مکرمہ نہیں جا سکتے۔
حج 2025 کی تیاریاں عروج پر پہنچ گئیں، ٹول فری نمبرز جاری
وہ غیر ملکی کارکن جنہیں پیشہ ورانہ ذمہ داریوں کے لیے مکہ مکرمہ یا مشاعر مقدسہ جانا ہوتا ہے اگر ان کے اقامے مکہ مکرمہ کے علاوہ کسی دوسرے شہر سے جاری ہوئے ہیں تو ان کے لیے لازمی ہے کہ وہ متعلقہ ادارے سے پرمٹ جاری کرائیں ورنہ انہیں شہر سے باہر چیک پوسٹوں سے لوٹا دیا جائے گا۔
سعوری حکام کے مطابق مکہ پرمٹ کے لیے وزارت داخلہ نے ابشر اور مقیم پلیٹ فارم پر ’تصریح پورٹل‘ لانچ کیا ہے جس کے ذریعے پرمٹ جاری کرایا جاسکتا ہے۔
خیال رہے حج سیزن کی وجہ سے مکہ مکرمہ میں عازمین حج کی سلامتی اور ان کی سہولت کے لیے عام افراد کے مکہ مکرمہ داخلے پر پابندی عائد کی جاتی ہے تاکہ شہر میں غیر ضروری رش نہ ہونے دیا جائے۔
سعودی حکام کا کہنا ہے کہ عازمین ِ حج کی سلامتی اور آارام پہنچانا ہماری اولین ترجیح ہے اس لیے ضوابط پرسختی سے عمل درآمد کیا جارہا ہے۔
