(18 اگست 2025): کے پی میں بارش کی صورت قدرتی آفات نے تباہی مچا دی ہے سب سے زیادہ متاثرہ بونیر میں پورے پورے گاؤں دفن ہو گئے۔
موسمیاتی تبدیلیوں نے اس بار سب سے زیادہ گلگت بلتستان اور صوبہ خیبر پختونخوا کو متاثر کیا۔ بالخصوص حالیہ چند روز میں ہونے والے کلاؤڈ برسٹ سے ہونے والی تباہی کبھی تاریخ میں نہیں دیکھی گئی۔ اب تک 500 کے قریب افراد سیلابی ریلوں میں بہہ کر جاں بحق ہو چکے ہیں جب کہ اربوں روپے مالیت کی عوامی املاک اور سرکاری انفرااسٹرکچر تباہ ہوچکا ہے۔
خیبر پختونخوا میں سب سے زیادہ متاثر ضلع بونیر ہے جہاں پورے پورے گاؤں صفحہ ہستی سے مٹ گئے اور پورے پورے خاندان اجڑ گئے۔ صرف بونیر میں ہی اب تک 290 اموات کی تصدیق ہوچکی ہے۔ تباہی کے سنگین اور دلخراش مناظر حساس دلوں کو رنجیدہ کر رہے ہیں۔
بونیر میں ہر جگہ ملبے اور کیچڑ کا ڈھیر ہے اور لاشیں ملبے تلے دب کر اجتماعی قبریں بن چکی ہیں۔ سینکڑوں اموات کے ساتھ 120 سے زائد اب بھی لاپتہ ہیں اور 230 سے زائد زخمی ہیں۔ لاشیں اسپتالوں میں موجود ہیں، مگر انہیں شناخت کرنے والا کوئی نہیں۔
بونیر سمیت کے پی میں سوات، مینگورہ اور دیگر علاقوں میں سیلابی ریلا جہاں بھی آیا۔ اپنے سامنے آنے والے ہر انسان، مویشی گاڑیوں، مکانات، عمارات اور بڑے بڑے پل تک بہا کر لے گیا۔ امدادی سرگرمیوں جاری ہیں تاہم جاری بارش اس میں رکاوٹ بن رہی ہے اور رابطہ سڑکیں بھی نہیں کھولی گئی ہیں۔
