وزیراعظم شہباز شریف نے قومی سلامتی کمیٹی کا اہم اجلاس کل طلب کیا ہے جس میں ایران اسرائیل اور امریکا تنازع پر مشاورت کی جائے گی۔
اے آر وائی نیوز کو ذرائع سے ملنے والی اطلاعات کے مطابق اسرائیل کے بعد امریکا کی جانب سے ایرانی کی ایٹمی تنصیبات پر حملوں کے بعد خطے میں پیدا ہونے والی کشیدہ صورتحال پر وزیراعظم شہباز شریف نے قومی سلامتی کمیٹی کا اہم اجلاس کل (پیر) طلب کر لیا ہے۔
ذرائع کے مطابق قومی سلامتی کمیٹی کا اجلاس دوپہر 12 بجے وزیراعظم ہاؤس میں ہوگا جس میں عسکری اور سول قیادت شرکت کرے گی۔
ذرائع نے یہ بھی بتایا کہ اس موقع پر ایران، اسرائیل اور امریکا تنازع پر مشاورت کی جائے گی جب کہ اجلاس میں ایران کی حمایت سمیت دیگر اہم امور پر بڑے فیصلوں کا بھی امکان ہے۔
اجلاس میں فیلڈ مارشل عاصم منیر اپنے دورہ امریکا پر شرکا کو اعتماد میں لیں گے جب کہ ملکی داخلی اور سرحدی سیکیورٹی صورتحال کا بھی جائزہ لیا جائے گا۔
ایران، اسرائیل اور امریکی تنازع سے متعلق تمام خبریں جاننے کے لیے کلک کریں
واضح ہے کہ امریکا کی جانب سے ایران کی جوہری تنصیبات پر حملوں کے بعد وزیراعظم شہباز شریف نے ایران کے صدر مسعود پزیشکیان سے ٹیلیفون پر رابطہ کیا تھا۔
وزیراعظم نے ایران پر امریکی حملوں کی شدید مذمت کرتے ہوئے پاکستان کی جانب سے ایرانی عوام اور حکومت کے ساتھ غیر متزلزل یکجہتی کا اعادہ کیا۔
https://urdu.arynews.tv/iran-israel-pm-shahbaz-sharifs-telephone-conversation-with-iranian-president/