Tag: اجلاس

لاہور: پاکستان مسلم لیگ ن کے صدر میاں شہباز شریف کی زیرصدارت پارٹی کا اہم اجلاس جاری ہے جس میں ذیلی کمیٹی کے فیصلے پر مشاورت ہوگی۔

تفصیلات کے مطابق مسلم لیگ ن کے قائد نوازشریف کے بیرون ملک علاج کے حوالے سے ن لیگ کی پارٹی کا اہم اجلاس جاری ہے۔ شہباز شریف اور راجہ ظفرالحق اجلاس کی صدارت کر رہے ہیں۔ اجلاس میں حکومتی فیصلے کے بعد پیدا ہونے والی صورت حال پر غور کیا جائے گا اور مسلم لیگ ن اپنا آئندہ لائحہ عمل طے کرے گی۔

مسلم لیگ ن کے اجلاس میں احسن اقبال، ایازصادق، مریم اورنگزیب، عطااللہ تارڑ و دیگر شریک ہیں۔ اجلاس میں ذیلی کمیٹی کے فیصلے پرمشاورت ہوگی۔ اجلاس کے بعد قائد حزب اختلاف شہباز شریف سہہ پہر 3 بجے اہم پریس کانفرنس کریں گے۔ شہباز شریف پریس کانفرنس میں پارٹی پالیسی، نواز شریف کی صحت سے آگاہ کریں گے۔

نوازشریف کو 4 ہفتے کیلئے بیرون ملک جانے کی مشروط اجازت

خیال رہے کہ ذیلی کمیٹی نے وفاقی کابینہ کے فیصلے پر قائم رہتے ہوئے نوازشریف کو بیرون ملک جانے کے لیے عائد کردہ شرائط کو برقرار رکھا ہے۔

کابینہ کی ذیلی کمیٹی کے سربراہ فروغ نسیم نے گزشتہ روز پریس کانفرنس کرتے ہوئے کہا تھا کہ نوازشریف کو4 ہفتے کے لیے بیرون ملک جانے کی ون ٹائم اجازت ہوگی جبکہ نوازشریف یا شہبازشریف 7 ارب روپے کے سیکیورٹی بانڈزجمع کرائیں گے۔

اسلام آباد: وزیراعظم عمران خان کی زیرصدارت وفاقی کابینہ کا اجلاس جاری ہے، جس میں آزادی مارچ کا معاملہ، مذاکرات کی تعطلی سمیت دیگر معاملات زیرغور آئیں گے۔

تفصیلات کے مطابق وزیراعظم عمران خان کی زیرصدارت وفاقی کابینہ کا اجلاس وزیراعظم آفس میں جاری ہے۔اجلاس میں وفاقی کابینہ کو ملک میں امن و امان کی صورت حال پر بریفنگ دی جائے گی، آزادی مارچ کا معاملہ، مذاکرات کی تعطلی سمیت دیگر معاملات زیرغور آئیں گے۔

ذرائع کے مطابق نوازشریف کا نام ای سی ایل سے نکالنے کا معاملہ ایجنڈے میں شامل نہیں ہے، وزیراعظم کی اجازت سے کوئی بھی ایجنڈا آئٹم موقع پر شامل کیا جاسکتا ہے۔

اجلاس میں اوگرا کے ممبر گیس کی تقرری کی منظوری دی جائے گی، وزارتوں میں سی ای اوز، ایم ڈیزکی خالی پوسٹوں پر بریفنگ دی جائے گی، ہیلتھ کیئرریگولیشن ایکٹ کے تحت بورڈ آف اتھارٹی کے ممبرز کی تعیناتی بھی ایجنڈے میں شامل ہے، اوورسیز پاکستانیوں کی سٹیزن پورٹل کی شکایات کے حل پر بریفنگ ہوگی۔

وفاقی کابینہ اپنے فیصلوں پر عملدرآمد کا جائزہ لے گی، عوامی مفاد کے منصوبوں پر عملدرآمد کا بھی جائزہ لیا جائے گا، احساس پروگرام کے نئے پراجیکٹ کے حوالے سے آگاہ کیا جائے گا۔ اجلاس میں وزیراعظم پورٹل پروگرام کی ایک سالہ کارکردگی پر بریفنگ دی جائے گی۔

لاہور: وزیراعلیٰ پنجاب سردار عثمان بزدار کا کہنا ہے کہ تحریک انصاف کی حکومت اقلیتوں کے حقوق کی پاسبان ہے، اقلیتوں کے حقوق کے تحفظ کے لیے اقدامات کی مثال نہیں۔

تفصیلات کے مطابق صوبائی دارالحکومت لاہور میں وزیراعلیٰ پنجاب کی زیرصدارت صوبائی کابینہ کا 20واں اجلاس ہوا، اجلاس میں 22 نکاتی ایجنڈا زیرغور آیا۔

سردار عثمان بزدار کی زیر صدارت اجلاس میں صوبائی وزرا، مشیران، معاونین خصوصی، چیف سیکریٹری و دیگر نے شرکت کی۔

اجلاس میں پنجاب لوکل گورنمنٹ ایکٹ 2019 میں ترامیم، پنجاب ویلج پنچایت اینڈ نیبرہڈ کونسلز ایکٹ 2019 میں ترامیم، پنجاب ڈی مارکیشن آف لوکل ایریاز رولز 2019 کے تحت حد بندی اور ایکٹ 2019 کے تحت سکسیڈنگ لوکل گورنمنٹس کے قیام کی منظوری دی گئی۔

صوبائی کابینہ کے اجلاس میں سیاسی جماعت یا انتخابی گروپ بنا کر بلدیاتی الیکشن میں حصہ لینے کی اجازت اور اقلیتوں کا مخصوص نشستوں کے ساتھ عمومی نشستوں پر بھی ووٹنگ کے حق منظور کیا گیا، انتخابی نتائج کا اعلان ریٹرننگ آفیسر کرے گا۔

وزیراعلیٰ پنجاب کی زیرصدارت اجلاس میں فیصلہ کیا گیا کہ پنجاب بھر میں 455 مقامی حکومتیں بنیں گی۔ اجلاس میں پنجاب میونسپل سروسز پروگرام میں رد و بدل کا فیصلہ بھی کیا گیا۔

صوبائی کابینہ کے اجلاس میں شاہی قلعہ کے لیے ہیریٹج اینڈ اربن ری جنریشن پروگرام کی منظوری دی گئی، اس کے علاوہ لاہور اور آذر بائیجان کے شہر ناک چیوان جڑواں قرار دینے کا فیصلہ بھی کیا گیا۔

وزیراعلیٰ پنجاب نے کہا کہ تحریک انصاف کی حکومت اقلیتوں کے حقوق کی پاسبان ہے، اقلیتوں کے حقوق کے تحفظ کے لیے اقدامات کی مثال نہیں ہے۔

وزیراعلیٰ پنجاب کی زیرصدارت اجلاس، محکمہ مال سمیت دیگر امور کا جائزہ

یاد رہے کہ دو روز قبل وزیراعلیٰ پنجاب عثمان بزدار نے اعلیٰ سطح اجلاس کی صدارت کی تھی، اس دوران پنجاب میں پٹواری کے عہدے کا نام تبدیل کرنے کا فیصلہ کیا گیا تھا۔

اجلاس میں فیصلہ کیا گیا تھا کہ پٹواری کو ولیج آفیسر کے عہدے کا نام دیا جائے گا، جبکہ ولیج آفیسر کو 14واں اسکیل ملے گا، بھرتی پنجاب پبلک سروس کمیشن کے ذریعے ہوگی۔

ولیج آفیسر کے لیے بھرتی کے بعد 6 ماہ کی تربیت لازم ہوگی، وزیراعلیٰ نے ولیج آفیسر کو لیپ ٹاپ بھی دینے کی منظوری دے دی تھی، جبکہ لاہور کی ایک تحصیل کو ریونیو کے حوالے سے ماڈل تحصیل بنانے کا بھی فیصلہ کیا گیا تھا۔

وزیراعلیٰ پنجاب نے حکم دیا تھا کہ لینڈ ریکارڈ سینٹرز پر ادائیگی کے لیے بینک کا کاؤنٹر بنایا جائے، رشوت لینے والے افسروں واہلکاروں کی جگہ جیل ہے، کسی صورت پیسے لینے سے متعلق شکایت برداشت نہیں کروں گا۔

اسلام آباد: پرویزخٹک کی زیرصدارت حکومتی مذاکراتی کمیٹی کا اجلاس آج ہوگا جس میں صورت حال کا جائزہ لیا جائے گا۔

تفصیلات کے مطابق وزیر دفاع پرویز خٹک کی زیرصدارت مذاکراتی کمیٹی کا اجلاس آج شام طلب کرلیا گیا۔ اجلاس اسپیکر قومی اسمبلی اسد قیصر کی رہائش گاہ پر ہوگا۔

ذرائع کے مطابق اجلاس میں موجودہ صورت حال کا جائزہ لیا جائے گا، اس کے علاوہ کور کمیٹی فیصلوں کی روشنی میں لائحہ عمل پر مشاورت ہوگی۔

ذرائع کا کہنا ہے کہ اجلاس میں اپوزیشن کی پریس کانفرنس کا جائزہ لیا جائے گا اور اپوزیشن سے رابطوں پر حکمت عملی طے کی جائے گی۔

عوام کو اکسانے پر مولانا فضل الرحمان کے خلاف عدالت جا رہے ہیں: پرویز خٹک

یاد رہے کہ گزشتہ روز وزیر دفاع پرویز خٹک نے اعلان کیا تھا کہ عوام کو اکسانے کے بیان پر مولانا فضل الرحمان کے خلاف عدالت جا رہے ہیں، کیس تیار ہو جائے گا، انشاء اللہ پیر کو عدالت جائیں گے۔

پرویز خٹک کا کہنا تھا مولانا فضل الرحمان کا وزیراعظم کو گرفتار کرنے کا بیان بغاوت ہے، مارچ والوں کو بتا دیتا ہوں جو وہ کر رہے ہیں سب کچھ ریکارڈ میں آرہا ہے، ہمارے لوگ سفید کپڑوں میں گھوم رہے ہیں، سب ریکارڈ ہو رہا ہے، حکومت اور ادارے ایک پیج پر ہیں۔

اسلام آباد: وزیراعظم عمران خان نے منگل کے روز وفاقی کابینہ کا اجلاس طلب کرلیا جس کا آٹھ نکاتی ایجنڈا جاری کردیا گیا ہے۔

تفصیلات کے مطابق وزیراعظم عمران خان نے وفاقی کابینہ کا اجلاس 5 نومبر کو طلب کرلیا۔ اجلاس میں ملکی سیاسی اور معاشی صورت حال کا جائزہ لیا جائے گا، کابینہ ای سی سی کے فیصلوں کو توثیق کرے گی۔

اجلاس میں کابینہ قانون سازی سے متعلق خصوصی کمیٹی کے فیصلوں کی توثیق کرے گی جبکہ سی ڈی اے کی تنظیم نو بھی ایجنڈے میں شامل ہے

کابینہ قانون سازی سے متعلق خصوصی کمیٹی کے فیصلوں کی توثیق کرے گی جبکہ سی ڈی اے کی تنظیم نو بھی ایجنڈے میں شامل ہے۔

اجلاس کے ایجنڈے میں بجلی سے چلنے والی گاڑیوں سے متعلق پالیسی بھی شامل ہے اس کے علاوہ نیشنل پاور پارک میں مینجمنٹ کمپنی کے سی ای او کی تعیناتی کی منظوری بھی ایجنڈے کا حصہ ہے۔

ذرائع کے مطابق میجر جنرل عامر مجید کی بطور ڈی جی رینجرز پنجاب عارضی تبادلہ کی منظوری دی جائے گی۔ نادرا کے مالی سال 2019 کے آڈٹ کی منظوری بھی ایجنڈے میں شامل ہے۔

وفاقی کابینہ کا اجلاس، لاہور، کراچی، پشاور اور ملتان کے لیے بڑی خبر آگئی

یاد رہے کہ گزشتہ ہفتے وزیراعظم عمران خان کی زیر صدارت وفاقی کابینہ اجلاس میں لاہور،ملتان،کراچی اور پشاور میں کثیرمنزلہ عمارتوں کی تعمیر کی پالیسی کی منظوری دی گئی تھی۔

اسلام آباد: وزیراعظم عمران خان نے پاکستان تحریک انصاف کی پارلیمانی پارٹی کا اجلاس کل طلب کرلیا، اجلاس میں اتحادی جماعتوں کے ارکان بھی شریک ہوں گے۔

تفصیلات کے مطابق وفاقی دارالحکومت اسلام آباد میں وزیراعظم عمران خان نے پی ٹی آئی پارلیمانی پارٹی کا اجلاس طلب کرلیا۔ اجلاس پیرکو سہ پہر3 بجے وزیراعظم ہاؤس میں ہوگا۔

ذرائع کے مطابق اتحادی جماعتوں کے ارکان بھی اجلاس میں شریک ہوں گے، وزیراعظم عمران خان موجودہ صورت حال پر ارکان کو اعتماد میں لیں گے۔ اجلاس میں اپوزیشن احتجاج پرحکومتی اقدامات سے آگاہ کیا جائے گا

یاد رہے کہ گزشتہ روز وزیراعظم عمران خان کی جانب سے کور کمیٹی اجلاس میں قومی اداروں کے خلاف ہرزہ سرائی کی شدید مذمت کی گئی تھی۔

اداروں کا دفاع سیاست سے بالاتر ہو کر کریں گے: وزیر اعظم کا واضح مؤقف

ذرائع کے مطابق وزیراعظم نے اجلاس میں کہا تھا کہ ہمیں احساس ہے کہ فوج نے کن قربانیوں سے ملک سنبھالا، فوجیں ختم ہو جاتی ہیں تو وہ ملک باقی نہیں رہ سکتے، اداروں کا دفاع سیاست سے بالا تر ہو کر کریں گے۔

واضح رہے کہ وزیر اعظم عمران خان کی گرفتاری کی بات بغاوت قرار دے کر حکومت نے مولانا فضل الرحمان کے خلاف عدالت جانے کا فیصلہ کرلیا ہے۔

کراچی: ربیع الاول 1441 ہجری کا چاند دیکھنے کے لیے مرکزی رویت ہلال کمیٹی کا اجلاس آج بعد نماز عصر کراچی میں ہوگا۔

تفصیلات کے مطابق ربیع الاول کا چاند دیکھنے کے لیے مرکزی رویت ہلال کمیٹی کا اجلاس محکمہ موسمیات کے دفتر کراچی میں آج ہوگا، رویت ہلال کمیٹی کے سربراہ مفتی منیب الرحمان اجلاس کی صدارت کریں گے۔

چیئرمین رویت ہلال کمیٹی مفتی منیب الرحمان چاند نظر آنے یا نہ آنے کا اعلان کریں گے۔ زونل کمیٹیوں کے اجلاس لاہور، کوئٹہ اور پشاورمیں ہوں گے، محکمہ موسمیات کے نمائندے بھی اجلاس میں شریک ہوں گے۔

محکمہ موسمیات کے مطابق آج ربیع الاول کا چاند نظر آنے کے واضح امکانات ہیں، چاند نظر آنے کی صورت میں ملک بھر میں عید میلاد النبی 10 نومبر بروز اتوار کو منائی جائے گی۔

واضح رہے ماہ ربیع الاول امت مسلمہ کے لیے خاص اہمیت کا حامل ہے کیونکہ اس مہینے نبی آخرالزماں ﷺ کی دنیا میں آمد ہوئی، پیغمبر اکرم صلی اللہ علیہ وآلہ وسلم پوری دنیا کے لئے عملی نمونہ بن کر آئے اور وہ ہر شعبے میں اس اوج کمال پر فائز ہیں کہ ان جیسا کوئی تھا اور نہ ہی قیامت تک آسکتا ہے۔