کراچی : گورنر ہاؤس کے باہرشہید پولیس اہلکار کے والدین نے احتجاج کیا۔ تفصیلات کے مطابق اے ایس آئی ارشد محمود تنولی جو نامعلوم مسلح افراد کی فائرنگ سے شہید ہو گئے تھے، کے والدین کو جب خبر ملی کہ وزیر اعظم پاکستان میاں نواز شریف آئے ہوئے ہیں تو وہ بھی انصاف کے حصول کیلئے گورنر ہاؤس روتے ہوئے دوڑے چلے آئے۔
اس موقع پر احتجاجی مظاہرہ کرتے ہوئےانہوں نے کہا کہ وزیراعظم نے ان کے بیٹے کے قتل پر کیوں ایکشن نہیں لیا ؟ مقتول کی والدہ کا کہنا تھا کہ میرے بیٹے کا قاتل کون ہے ؟ مجھے انصاف چاہیئے۔
گورنر ہاؤس کے سامنے سراپا احتجاج شہید کانسٹیبل ارشدمحمود تنولی کے والدین نے فریاد کی کہ وزیر اعظم میرے بیٹے کے قتل کا نوٹس لیں ۔
بوڑھی ماں نے دہائی دی کہ پوتے پوتیوں کو اس بڑھاپے میں کیسے پالوں؟ بیٹے کے شہیدہونے کے بعدکسی نے کوئی خبر تک نہ لی۔کیا اب شہید کے بچے بھیک مانگیں گے۔انہوں نے التجا کی کہ خدارا ہمیں انصاف دیا جائے۔
