Tag: احتجاجی مظاہرے

کراچی: ایم کیو ایم نے کراچی میں پانی کے بڑھتے ہوئے بحران اوراس مسئلے پرحکومت سندھ کی بے حسی کے خلاف کل اتوار شام 4بجے وزیراعلیٰ ہاوٴس پر احتجاج مظاہرے کا اعلان کردیا۔

اس بات کا فیصلہ آج رابطہ کمیٹی کے اجلاس میں کیاگیا،اجلاس میں شہرمیں پانی کی شدیدقلت اوراس کے مختلف اسباب کاجائزہ لیا گیا، اجلاس میں اس بات پر مکمل اتفاق پایاگیاکہ پانی کی شدیدقلت کے باعث کراچی کے شہریوں میں سخت بے چینی پائی جاتی ہے اوریہ بے چینی اب شدید غصے اوراشتعال میں تبدیل ہورہی ہے لیکن حکومت سندھ اس صورتحال پر توجہ دینے کے بجائے کراچی اوراس کے شہریوں کے ساتھ سوتیلی ماں جیسا سلوک کررہی ہے ۔

اجلاس میں اس بات پر بھیمکمل اتفاق کیاگیا کہ کراچی کی آبادی دوکروڑسے زائد ہوچکی ہے جسے پانی اورتمام وسائل میں زیادہ حصے کی ضرورت ہے۔

اجلاس میں مزید کہا گیا کہ شہر کے ہر علاقے میں روزانہ عوام پانی کے لیے احتجاج کررہے ہیں لیکن حکومت سندھ کے کانوں پر جوں تک نہیں رینگ رہی،ایم کیوایم کی جانب سے اس مسئلے پرکئی بارسندھ اسمبلی میں بھی احتجاج کیاگیالیکن حکومت سندھ نے مسلسل کراچی دشمنی کامظاہرہ کرتے ہوئے اس پر کوئی توجہ نہیں دی ۔

اس صورتحال کوسامنے رکھتے ہوئے رابطہ کمیٹی کے اجلاس میں فیصلہ کیاگیاکہ کل بروزاتوارشام چار بجے وزیراعلیٰ ہاوٴس پر ایک پرامن احتجاجی مظاہرہ کیاجائے گا ۔ مظاہرے میں شہریوں کے ساتھ ساتھ ایم کیوایم کے مرکزی رہنما، ارکان اسمبلی، یوسی چیئرمینز اورکونسلرزبھی شریک ہوں گے۔