سکھر : قائد حزب اختلاف خورشید شاہ نے تحریک انصاف کے احتجاج پر ریاستی تشدد کی مذمت کرتے ہوئے کہا کہ احتجاج کو پُرامن رکھنا دونوں فریقین کی ذمہ داری ہے۔
تفصیلات کے مطابق سکھر میں میڈیا سے بات کرتے ہوئے قومی اسمبلی میں اپوزیشن لیڈر خورشید شاہ نے کہا ہے کہ سیاسی کارکنان پر ریاستی تشدد قبول نہیں کریں گے ایسا ہوا تو جمہوریت کو نقصان ہوگا۔
قائد حزب اختلاف کا کہنا تھا کہ احتجاج کرنا ہر سیاسی جماعت کا جمہوری اور آئینی حق ہے تا ہم احتجاج کے دوران امن عامہ کی صورت حال کو قابو میں رکھنا دونوں فریقین کی ذمہ داری ہے،شیخ رشید اور تحریک انصاف کو بھی احتجاج کا حق حاصل ہے لیکن یہ احتجاج ذمہ داری کے احساس کے ساتھ کیے جانے چاہیے۔
ایک سوال کے جواب میں خورشید شاہ کا کہنا تھا کہ پاکستان پیپلز پارٹی جمہوریت پر یقین رکھتی ہے اور کسی بھی غیر جمہوری طرز عمل اور غیر آئینی اقدام کی حمایت نہیں کرے گی۔
انہوں نے مزید کہا کہ بلاول بھٹو نے گزشتہ رات ہی پنجاب حکومت کی غیر جمہوری اقدام کی مذمت کرتے ہوئے حکومت کو معاملہ فہمی کا پیغام دیا تھا۔
خورشید شاہ کا کہنا تھا کہ پاکستان پیپلز پارٹی نے ہمیشہ آمروں کے خلاف جنگ لڑی ہے،جیلوں اور عدالتوں کا سامنا کیا ہے اس لیے ہم کسی بھی ایسے اقدام کا ساتھ نہیں دیں گے جس سے کسی آمر کی جھلک آتی ہو۔
