Tag: احتساب عدالت

نوازشریف پرفرد جرم 2 اکتوبرکوعائد کی جائے گی

اسلام آباد : سابق وزیراعظم میاں محمد نوازشریف اپنے خلاف دائر تین نیب ریفرنسز کا سامنا کرنے کے لیے آج احتساب عدالت پہنچے جہاں ان پر فرد جرم عائد کرنے کے لیےعدالت نے 2 اکتوبر کی تاریخ دے دی۔

تفصیلات کے مطابق اسلام آباد کی احتساب عدالت نے نوازشریف پر فرد جرم عائد کرنے کے لیے 2 اکتوبر کی تاریخ دے دی جبکہ ریفرنس کی کاپیاں نوازشریف کے وکیل کو فراہم کردی گئیں۔

احتساب عدالت نے نوازشریف کے بچوں حسن، حسین اور مریم نواز کے ناقابل ضمانت وارنٹ گرفتاری جاری کرتے ہوئے کہا کہ انہیں گرفتار کرکے 2 اکتوبرکو پیش کیا جائے۔

عدالت کی جانب سے کہا گیا کہ اگر حسن، حسین اور مریم نواز2 اکتوبر کو پیش نہ ہوئے ان کے ناقابل ضمانت وارنٹ جاری کریں گے۔

خیال رہے کہ سابق وزیراعظم میاں محمد نوازشریف اپنے خلاف دائر تین نیب ریفرنسز کا سامنا کرنے کے لیے آج احتساب عدالت پہنچے جہاں انہیں مختصر پیشی کے بعد واپس جانے کی اجازت دے دی گئی۔

احتساب عدالت میں پیشی کے موقع پر ان کے وکیل خواجہ حارث نے اپنے موکل کے خلاف دائر تین نیب ریفرنسزپر وکالت نامے احتساب عدالت میں پیش کیے۔

نوازشریف نے احتساب عدالت نمبر1 میں پیش ہونے پرعدالت کو بتایا کہ ان کی اہلیہ کی طبعیت ٹھیک نہیں جس پراحتساب عدالت کے جج محمد بشیر نے کہا کہ پھرآپ جاسکتے ہیں۔

بعدازاں احتساب عدالت میں کارروائی کے دوران نوازشریف کے وکیل خواجہ حارث نے عدالت سے درخواست کی کہ ان کے موکل کو عدالت میں پیشی سے استثنیٰ دیا جائے۔

نیب پراسیکیوٹرر کا کہنا تھا کہ نیب ریفرنسز کے حوالے سے پاکستان میں نامزد ملزم نوازشریف موجود ہیں انہیں ملک سے باہر جانے کی اجازت نہ دی جائے اور نہ ہی انہیں پیشی سے استثنیٰ دیا جائے۔

انہوں نے کہا کہ کلثوم نوازکی تیماداری کے لیے نوازشریف کے بچے لندن میں موجود ہیں لہذا انہیں وہاں جانے کی ضرورت نہیں ہے۔

احتساب عدالت نے سابق وزیراعظم کے وکیل خواجہ حارث کی جانب سے پیشی سے استثنیٰ کے لیے کی جانے والی درخواست مسترد کردی۔

صحافی پرتشدد

دوسری جانب احتساب عدالت کے باہرنوازشریف کے پروٹول اسٹاف نے میڈیا کے نمائندے کو زدوکوب کیا اور تشدد سے صحافی بے ہوش ہوگیا جس کے بعد صحافیوں کی جانب سے شدید احتجاج کیا گیا۔

سابق وزیراعظم نوازشریف سخت سیکورٹی اور پروٹول میں پنجاب ہاؤس سے اسلام آباد کی احتساب عدالت پہنچے جہاں اس موقع پران کے ہمراہ پاکستان مسلم لیگ ن کی سینیئرقیادت بھی موجود تھی۔

یاد رہے کہ لندن فلیٹس سے متعلق ریفرنس میں سابق وزیراعظم نوازشریف ان کے دونوں بیٹے حسن اور حسین نواز، مریم نواز اور داماد کیپٹن ریٹائرڈ صفدر کوملزم نامزد کیا گیا ہے۔

قومی احتساب بیورو کی جانب سے دیگر دو ریفرنسز میں العزیزیہ اسٹیل ملزجدہ اور آف شور کمپنیوں سے متعلق فلیگ شپ انوسٹمنٹ شامل ہیں، ان دونوں ریفرنسز میں نوازشریف سمیت ان کے دونوں صاحبزادوں کو ملزم نامزد کیا گیا ہے۔

خیال رہے کہ شریف خاندان کو پہلے 19 ستمبر کو پیش ہونے کا حکم دیا گیا تھا،عدم حاضری پر نیب کی جانب سے وارنٹ گرفتاری جاری کرنے کی استدعا کی گئی تھی جسے عدالت نے مسترد کرتے ہوئے ملزمان کو 26 ستمبر کے لیے دوبارہ سمن جاری کیے تھے۔

مسلم لیگ ن کا مشاورتی اجلاس، نواز شریف کا نیب میں پیش ہونے کا فیصلہ

واضح رہے کہ گزشتہ روز سابق وزیر اعظم نواز شریف نے وطن واپس پہنچتے ہی مسلم لیگ ن کا مشاورتی اجلاس طلب کیا تھا جس میں شریف خاندان کے خلاف عدالتی تحقیقات اور سیاسی امور کے بارے میں مشاورت کی گئی تھی۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

ستمبر 26, 2017
شریف فیملی کا نام ای سی ایل میں ڈالناچاہیے‘ شیخ رشید

اسلام آباد : عوامی مسلم لیگ کے سربراہ شیخ رشید احمد کا کہنا ہے کہ نوازشریف کو قانون کی پاسداری کرنی چاہیے۔

تفصیلات کے مطابق عوامی مسلم لیگ کے سربراہ شیخ رشید نے اے آروائی نیوز سےبات کرتے ہوئے کہا کہ قانون کی حکمرانی ہونی چاہیے، نوازشریف کو دھونس نہیں دکھانی چاہیے۔

شیخ رشید احمد کا کہنا تھا کہ یہ لوگ سپریم کورٹ میں اپنی صفائی پیش نہیں کرسکے جبکہ حدیبیہ،پاناما اورایل این جی کیس کا انہیں6 ماہ میں سامنا کرنا ہے۔

عوامی مسلم لیگ کے سربراہ کا کہنا تھا کہ شریف فیملی کا نام ای سی ایل میں ڈالناچاہیےان لوگوں نے صرف ایل این جی میں 2 ارب کی کرپشن کی۔

نوازشریف آج احتساب عدالت میں پیش ہوں گے

شیخ رشید کا کہنا تھا کہ یہ لوگ ٹکراؤکی پالیسی پرعمل پیرا ہیں جوشروع ہوچکی،انہوں نےکہا کہ یہ لوگ بچنےکے لیے ہر طرح کی کوشش کررہے ہیں۔

عوامی مسلم لیگ کے سربراہ شیخ رشید کا کہنا تھا کہ نوازشریف کے لیے حکومتی مشینری کا استعمال کیا جارہا ہے

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

ستمبر 26, 2017
نوازشریف کی پیشی: کارکنان کوعدالت آنے سے نہیں روک سکتے، راناثناءاللہ

لاہور : پنجاب کے وزیر قانون راناثناءاللہ نے کہا ہے کہ نوازشریف کل احتساب عدالت میں پیش ہونگے، ہم کسی کارکن کو عدالت آنے سےنہیں روک سکتے۔

یہ بات انہوں نے اےآر وائی نیوز سے خصوصی گفتگو کرتے ہوئے کہی، راناثناءاللہ نے کہا کہ نواز شریف اپنی لیگل ٹیم کے ساتھ احتساب عدالت میں پیش ہونگے، اس موقع پر پارٹی عہدیداران، کارکنان جانا چاہیں تو جا سکتے ہیں، پارٹی نے کسی کو جانے یا نہ جانے سے متعلق ہدایت نہیں دیں۔

راناثناء اللہ کا کہنا تھا کہ کوئی کارکن خود عدالت آتاہے تو ہم روک نہیں سکتے۔ وزیرقانون پنجاب نے اپنی گفتگو میں چیئرمین پی ٹی آئی عمران خان کو شدید تنقید کا نشانہ بھی بنایا۔

انہوں نے کہا کہ عمران خان اور ان کی جماعت کا ایک ہی مقصد ہے اور وہ ہے ملک میں افراتفری پھیلانا، اب وہ الیکشن کے حوالے سے نئی بات لے کرسامنے آگئے ہیں۔

انہوں نے کہا کہ سال دوہزار اٹھارہ کے عام انتخابات قریب ہیں، عوام اپنے ووٹ کی طاقت سے عمران خان کی سیاست کا ہمیشہ کیلئے خاتمہ کردیں گے۔

جوڈیشل کمپلیکس کے اطراف خصوصی سیکیورٹی پلان تشکیل

علاوہ ازیں نواز شریف کی احتساب عدالت میں پیشی کے حوالے سے خصوصی سیکیورٹی پلان مکمل کرلیا گیا ہے، جس کے مطابق جوڈیشل کمپلیکس اسلام آباد میں ایک ہزار کے قریب پولیس اہلکار تعینات ہونگے۔

جوڈیشل کمپلیکس میں عام اورغیرمتعلقہ افراد کا داخلہ ممنوع ہوگا، عمارت کے ارد گرد اور چھت پر نشانہ باز اہلکار تعینات ہونگے، سیکیورٹی پلان کے مطابق جوڈیشل کمپلیکس کےقریب ناکہ اورجامع تلاشی ہوگی۔

ستمبر 25, 2017
شریف خاندان، ڈار کے خلاف دائر کردہ ریفرنس نیب کو واپس

اسلام آباد: نیب نے شریف خاندان کو بچانے کی ایک اور مبینہ کوشش کر ڈالی۔ احتساب عدالت نے غلطیوں سے بھرے ریفرنس نیب کو واپس کردیے۔ وفاقی وزیر خزانہ اسحٰق ڈار کے خلاف اثاثوں کا ریفرنس بھی غلطیاں دور کرنے کے لیے واپس کر دیا گیا۔

تفصیلات کے مطابق نیب نے 6 ہفتوں میں سابق وزیر اعظم نواز شریف، ان کے بچوں حسن، حسین، مریم نواز اور اور داماد کیپٹن ریٹائرڈ صفدر کے خلاف ریفرنس دائر کیے۔

اب کچھ کہا نہیں جا سکتا کہ یہ عجلت تھی، غفلت تھی یا کوئی اور معاملہ تھا بہرحال ریفرنسز میں غلطیوں کی بھرمار تھی۔

احتساب عدالت نے اسکروٹنی کے بعد تمام ریفرنس نیب کو واپس کردیے۔

مزید پڑھیں: شریف خاندان کے خلاف نیب ریفرنس میں سنگین غلطیاں

ذرائع کے مطابق آج عزیزیہ اسٹیل مل ریفرنس واپس کیا گیا۔ اس سے قبل لندن فلیٹس اور آف شور کمپنیوں کے ریفرنس واپس کیے گئے تھے۔

وفاقی وزیر خزانہ اسحٰق ڈار کے خلاف اثاثوں سے زائد آمدنی کا ریفرنس بھی غلطیوں پر واپس کر دیا گیا۔ رجسٹرار احتساب عدالت نے ہدایت کی کہ ریفرنسز سے غلطیاں دور کی جائیں۔

دوسری جانب عوامی مسلم لیگ کے سربراہ شیخ رشید کا کہنا ہے کہ تاخیری حربے اختیار کیے جا رہے ہیں، یہ این آر او چاہتے ہیں لیکن اب ایسا کچھ نہیں ہوگا۔

انہوں نے کہا کہ ان کا احتساب بہت ضروری ہے، ایسا نہ ہوا تو پاکستان کو بڑا دھچکہ لگے گا۔

ستمبر 12, 2017
نیب نے شریف خاندان اوراسحاق ڈار کے خلاف ریفرنسز دائر کردیے

اسلام آباد: قومی احتساب بیور نے نااہل سابق وزیراعظم نوازشریف اور ان کے بچوں اور اسحاق ڈار کے خلاف احتساب عدالت میں ریفرنسز دائر کردیے۔

تفصیلات کے مطابق سپریم کورٹ کے فیصلے کے بعد ڈپٹی پراسیکیوٹرجنرل نیب کی سربراہی میں نیب پراسیکیوشن ونگ نے سابق وزیراعظم نوازشریف اور ان کے بچوں ، داماد اور اسحاق ڈار کے خلاف احتساب عدالت میں ریفرنسزدائرکیے۔

قومی احتساب بیورو کی ٹیم نے شریف خاندان کے خلاف 3 اور وزیرخزانہ اسحاق ڈار کے خلاف 1 ریفرنس دائر کیا۔

ذرائع کے مطابق نوازشریف کے خلاف 3 ریفرنسز میں نیب کی سیکشن 9 اے لگائی گئی ہے۔ نیب سیکشن 9 اے غیر قانونی رقوم، تحائف کی ترسیل سے متعلق ہے۔

نیب راولپنڈی نے 9 اے کی تمام 14 ذیلی دفعات کو شامل کیا ہے اور سیکشن 9 اے کی دفعات کی سزا 14 سال قید مقرر ہے۔

وزیرخزانہ اسحاق ڈار کے خلاف سیکشن 14 سی لگائی گئی ہے جو آمدن سے زائد اثاثے رکھنے سے متعلق ہے۔ نیب کی دفعہ 14 سی کی سزا 14 سال مقرر ہے۔

ذرائع کا کہنا ہے کہ عوامی نمائندوں کے لیےسزا کےبعد عمربھرکی نا اہلی ہوتی ہے۔ مریم نوازپرجعلی دستاویزات دینے پرالگ سے شیڈول 2 کاحوالہ دیا گیا ہے۔

نوازشریف کی صاحبزادی کے خلاف تحقیقات کونقصان پہنچانے کی دفعہ31 اے بھی شامل ہے اور ان کے خلاف الزام کے جرم میں 3 سال قید کی سزا ہے۔

قانونی طور پر ریفرنس فائل ہونے کے بعد ملزم کو کم از کم ایک بار احتساب عدالت کے جج کے روبرو پیش ہونا لازم ہے، جس کے بعد وہ ذاتی طور پر پیش ہونے سے استثنیٰ کی درخواست کرسکتا ہے۔

نیب لاہور کی شریف فیملی کا نام ای سی ایل میں ڈالنے اور اثاثے منجمد کرنے کی سفارش

خیال رہے کہ گزشتہ دنوں نیب لاہور نے شریف خاندان کے خلاف ریفرنس نیب ہیڈ کوارٹرز بھجوایا تھا، ریفرنس میں نوازشریف اوران کے بچوں کے اثاثے ضبط کرنے اور ان کے نام ای سی ایل میں ڈالنے کی سفارش بھی کی گئی تھی۔

پاناما کیس: وزیراعظم نوازشریف نا اہل قرار

یاد رہے کہ 28 جولائی کوسپریم کورٹ کے پانچ رکنی بینچ نے پاناما کیس کے فیصلے میں سابق وزیراعظم نوازشریف کو نااہل قرار دیتے ہوئے ان کے اور ان کے خاندان کے افراد کے خلاف نیب میں ریفرنس دائر کرنے کا حکم دیا تھا۔

واضح رہے کہ سپریم کورٹ نے نیب کو حکم دیا تھا کہ وہ 6 ہفتے کے اندر نوازشریف اور ان کے بچوں مریم نواز، حسین نواز، حسن نواز اور اسحاق ڈار کے خلاف ریفرنس دائر کرے اور 6 ماہ میں ان پر کارروائی مکمل کی جائے۔

اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔

ستمبر 8, 2017
آصف زرداری 16 برس بعد غیر قانونی اثاثہ جات ریفرنس سے بری

اسلام آباد: احتساب عدالت نے سابق صدر آصف علی زرداری کو 16 برس بعد غیر قانونی اثاثہ جات ریفرنس سے بری کردیا۔

تفصیلات کے مطابق پیپلز پارٹی کے شریک چیئرمین اور سابق صدر آصف علی زرداری پر غیر قانونی اثاثہ جات بنانے سے متعلق ریفرنس دائر تھا جس میں بریت کے لیے آصف زرداری کے حق میں پی پی رہنما فاروق ایچ نائیک نے درخواست دائر کی ہوئی تھی، اب انہیں اس مقدمے سے بری کردیا گیا ہے۔

یہ ریفرنس احتساب عدالت کے جج خالد محمود کی عدالت میں زیر سماعت تھا، جس میں دونوں طرف کے دلائل سننے کے بعد احتساب عدالت نے انہیں بری کردیا۔

اگست 26, 2017
بلوچستان کے سابق سیکریٹری خزانہ پرفرد جرم عائد

کوئٹہ : احتساب عدالت میں سابق سیکریٹری خزانہ مشتاق رئیسانی، مشیرخزانہ میرخالد لانگو اور کنٹریکٹرسہیل پر فرد جرم عائد کردی

تفصیلات کے مطابق احتساب عدالت میں کرپشن کیس کی سماعت ہوئی، جس میں سابق سیکریٹری خزانہ مشتاق رئیسانی اور کنٹریکٹرسہیل پرفرد جرم عائد کردی گئی.، میگا کرپشن کیس کی سماعت کے دوران احتساب عدالت نے سابق مشیرخزانہ میرخالد لانگو پربھی فرد جرم عائد کردی ہے.

واضح رہے کہ سابق مشیرخزانہ مشتاق رئیسانی طبیعت خراب ہونے کی وجہ سے کمرہ عدالت میں نہیں گئے تھے۔ بعد ازاں میگا کرپشن کیس کی سماعت 22مارچ تک ملتوی کردی گئی.

دوسری جانب تینوں ملزمان نے عدالت سے فرد جرم عائد نہ کرنے کی استدعا کی جسےعدالت نے مسترد کردیا۔

سیکرٹری خزانہ کی گرفتاری

یاد رہے کہ گذشتہ سال نیب نے محکمہ خزانہ بلوچستان کے دفتر پرچھاپہ مارکرسیکرٹری خزانہ مشتاق احمد رئیسانی کوگرفتارکرلیا تھا۔ چھاپےکے دوارن تمام دفتری ریکارڈزکو تحویل میں لے کردفترکوسِیل کردیا گیا تھا. تلاشی کے دوران 63 کروڑ روپے کی نقدی اور کروڑوں روپے مالیت کے زیورات اور پرائز بانڈ برآمد ہوئے تھے، اس کے علاوہ ان کی گاڑی سے بھی ڈیڑھ کروڑ روپے برآمد ہوئے تھے.

فردِ جرم عائد

صوبہ بلوچستان کے سابق مشیرخزانہ میرخالد لانگو سابق سیکریٹری مشتاق رئیسانی کی گرفتاری کے بعد استعفی دے کر اچانک غائب ہوجانے والے سابق مشیر خزانہ خالد لانگو منظرعام پر آتے ہی اسلام آباد ہائی کورٹ سے ’’بارہ روزہ‘‘ حفاظتی ضمانت منظور کروانے میں کامیاب ہوگئے تھے، تاہم آج ان پر بھی احتساب عدالت کی جانب سے فرد جرم عائد کردی ہے.

مارچ 17, 2017
رہائی کےبعد سیاست نہیں ڈاکٹری کروں گا،ڈاکٹرعاصم

کراچی : سابق مشیر پٹرولیم ڈاکٹرعاصم کا کہناہے کہ رہا ہونے کے بعد سیاست نہیں ڈاکٹری کروں گا۔

تفصیلات کےمطابق 462 ارب روپے کی کرپشن کیس میں ڈاکٹرعاصم کی آج احستاب عدالت میں پیشی کے موقع پر میڈیا نمائندوں سے غیررسمی گفتگوکرتے ہوئے ڈاکٹر عاصم کا کہنا تھا کہ وہ رہائی کےبعد سیاست نہیں ڈاکٹری کرنے کا ارادہ رکھتے ہیں۔

عدالت کے احاطے میں صحافی کی جانب سے سوال کیا گیا کہ اگر آپ کو گورنرشپ کی پیشکش کی جائے تواسے قبول کریں گے جس پر انہوں نےکہا کہ رہائی کے بعد صرف ڈاکٹری کروں گا۔

ڈاکٹر عاصم سےغیررسمی گفتگو کے دوران سوال کیا گیا کہ گورنزسندھ بھی تو ڈاکٹرہیں تواس پر سابق مشیر پٹرولیم کا کہناتھا کہ وہ پریکٹسنگ ڈاکٹر نہیں لیکن میں رہائی کے بعد پریکٹس کروں گا۔

یاد رہےکہ ڈاکٹر عاصم حسین 2009 میں پیپلز پارٹی کے ٹکٹ پر سندھ سے سینیٹر منتخب ہوئے،انہوں نے 2012 تک وزیر پیٹرولیم وقدرتی وسائل اور وزیراعظم کے مشیر برائے پیٹرولیم کے فرائض انجام دیے تھے۔

واضح رہےکہ پیپلز پارٹی نے 2013 کے عام انتخابات کے بعد انہیں سندھ کے ہائیر ایجوکیشن کمیشن کا چیئرمین مقرر کیا تھا۔

اکتوبر 8, 2016
کوئٹہ : سابق مشیر خزانہ بلوچستان 14روزہ ریمانڈ پر نیب کے حوالے

کوئٹہ : احتساب عدالت نے کرپشن کیس میں سابق مشیر خزانہ بلوچستان میر خالد لانگو کومزید 14 روزہ ریمانڈ پر نیب کے حوالے کردیا.

تفصیلات کے مطابق میگا کرپشن کیس میں نامزد ملزم سابق مشیر خزانہ بلوچستان میر خالد لانگوکو آج کوئٹہ کی احتساب عدالت کے روبرو پیش کیا گیا اور دوران سماعت نیب کی جانب سے عدالت ست ملزم کے مزید ریمانڈ کی درخواست کی گئی.

احتساب عدالت نے نیب کی جانب سے ملزم کے ریمانڈ کی درخواست منظور کرتے ہوئے سابق مشیر خزانہ بلوچستان ملزم میر خالد لانگو کو مزید چودہ روزہ ریمانڈ پر نیب کے حوالے کردیا.

*کوئٹہ : مشتاق رئیسانی دس روزہ ریمانڈ پر نیب کے حوالے

یاد رہے کہ گزشتہ روز سابق سیکرٹری خزانہ مشتاق رئیسانی اور اکاﺅنٹنٹ ندیم اقبال کو نیب کی جانب سے احتساب عدالت میں پیش کیااور دونوں ملزمان کی ریمانڈ کے لیے درخواست کی گئی.

نیب کے وکیل نے موقف اختیار کیاتھا کہ تفتیشی آفسر کراچی میں ملزم مشتاق رئیسانی کے جائیداد کی چھان بین کر رہا ہے لہذا ملزم کے ریمانڈ میں توسیع کی جائے جس پر عدالت نے مشتاق رئیسانی کو دس روزہ ریمانڈ پر نیب کے حوالے کر دیاتھا،جبکہ اکاﺅنٹنٹ ندیم اقبال کے ریمانڈ میں بھی مزید 15 روز کی توسیع کر دی تھی.

واضح رہے کہ گزشتہ ماہ نیب نے محکمہ خزانہ بلوچستان کے دفتر پر چھاپہ مار کر سیکرٹری خزانہ مشتاق احمد رئیسانی کو گرفتار کر کے دفتر سِیل کردیا تھا۔

جولائی 27, 2016
کوئٹہ : مشتاق رئیسانی اور ندیم اقبال چودہ روزہ ریمانڈ پر نیب کے حوالے

کوئٹہ: بلوچستان کے سابق سیکریٹری خزانہ مشتاق رئیسانی اور ندیم اقبال کو کوئٹہ کی احتساب عدالت نے کرپشن کیس میں چودہ روزہ ریمانڈ پر نیب کے حوالے کردیا،سماعت 25 جولائی تک ملتوی کر دی گئی.

تفصیلات کے مطابق کوئٹہ کی احتساب عدالت میں میگا کرپشن کیس کی سماعت ہوئی جہاں نیب نے مشتاق رئیسانی اور ندیم اقبال کے ریمانڈ میں توسیع کی درخواست کی گئی، عدالت نے دونوں ملزمان کو چودہ روزہ ریمانڈ پر نیب کے حوالے کردیا.

دوران سماعت مشتاق رئیسانی کے وکیل نے کہا کہ بغیر کسی پیش رفت کے موکل کا ریمانڈ پر ریمانڈ طلب کیا جا رہا ہے، وکیل کامران مرتضیٰ کا کہنا تھا کہ دنیا میں کہیں ایسا نہیں ہوتا جیسا نیب کر رہی ہے، دوران تفتیش جو شواہد ملے ہیں انہیں کم از کم عدالت میں پیش کیا جائے.

احتساب عدالت نے دونوں ملزمان کو 14 روزہ ریمانڈ پر نیب کے حوالے کرتے ہوئے میگا کرپشن کیس کی سماعت 25 جولائی تک ملتوی کر دی ہے.

*نیب نے سیکرٹری خزانہ بلوچستان مشتاق احمد رئیسانی کو گرفتارکرلیا

یاد رہے کہ مشتاق رئیسانی کو محکمہ خزانہ اور لوکل گورنمنٹ کے فنڈز میں خوردبرد کے الزام میں رواں سال 6مئی کو گرفتار کیاگیاتھا اور ان کے گھر سے کروڑوں روپے مالیت کی ملکی و غیر ملکی کرنسی اور جیولری ملی تھی.

جولائی 11, 2016