Tag: احتساب عدالت

لاہور: احتساب عدالت نے سابق ڈی جی ایل ڈی اے احد چیمہ کو یکم جون کو پیش کرنے کا حکم دے دیا۔

تفصیلات کے مطابق احتساب عدالت میں سابق ڈی جی ایل ڈی اے احد چیمہ کے خلاف آمدن سے زائد اثاثہ جات کیس کی سماعت ہوئی۔احد چیمہ کو پیش نہ کیے جانے پر عدالت نے سخت برہمی کا اظہار کیا۔

عدالت نے سماعت کے دوران استفسار کیا کہ احد چیمہ کو آپ نے پیش کیوں نہیں کیا، جس پر جیل سپرنٹنڈنٹ نے جواب دیا کہ کرونا وائرس کی وجہ سے پیش نہیں کیا۔احتساب عدالت نے ریمارکس دیے کہ اب تو تمام مارکیٹس بھی کھول دی گئی ہیں، ہر کاروبار کھولا جا رہا ہے۔

احتساب عدالت کے جج نے جیل سپرنٹنڈنٹ کو شوکاز نوٹس جاری کرتے ہوئے سابق ڈی جی ایل ڈی اے احد چیمہ کو یکم جون کو پیش کرنے کا حکم دے دیا۔

نیب حکام کے سابق ڈی جی ایل ڈی اے احد چیمہ کے خلاف آمدن سے زائد اثاثہ جات کیس میں اب تک 8گواہان اپنے بیان قلمبند کرا چکے ہیں۔

لاہور: مسلم لیگ ن کے صدر اور اپوزیشن لیڈر شہباز شریف کے وکیل ایڈووکیٹ محمد نواز بھی کرونا وائرس میں مبتلا ہو گئے۔

تفصیلات کے مطابق لاہور کی احتساب عدالت میں جج امجد نذیر چوہدری نے آشیانہ اور رمضان شوگر ملز کیس کی سماعت کی۔حمزہ شہباز شریف کو آج بھی جیل حکام کی جانب سے پیش نہیں کیا گیا،جس کے باعث فرد جرم عائد نہ کی جا سکی۔

عدالت نے استفسار کیا کہ حمزہ شہباز کو آج کیوں نہیں پیش کیا گیا؟ آپ کا لاک ڈاؤن اب کتنا عرصہ چلنا ہے۔ جیل سپرنٹنڈنٹ کی جانب سے حمزہ شہباز کو پیش نہ کرنے سے متعلق رپورٹ پیش کی گئی، جس میں کہا گیا کہ حمزہ شہباز کو کرونا وائرس اور لاک ڈاؤن میں توسیع کے پیش نظر پیش نہیں کیا، جیسے ہی حکومت کی جانب سے کوئی واضح ہدایات آئیں تو حمزہ شہباز کو پیش کر دیا جائے گا۔

احتساب عدالت نے شہباز شریف کے پلیڈر محمد نواز چوہدری کے کرونا میں مبتلا ہونے کے باعث حاضری معافی کی درخواست منظور کر لی اور سماعت 5 جون تک ملتوی کرتے ہوئے قرار دیا کہ اگر شہباز شریف کے پلیڈر پیش نہیں ہوتے تو آئندہ سماعت پر وہ خود  پیش ہوں۔

عدالت نے شریک ملزم امتیاز حیدر کی بریت کی درخواست پر نیب کو نوٹس جاری کر کے جواب طلب کر لیا۔ آشیانہ ریفرنس میں شہباز شریف، احد چیمہ اور فواد حسن فواد سمیت 13 ملزمان کو نامزد کیا گیا ہے۔

اسلام آباد: مسلم لیگ ن کے رہنما احسن اقبال نے نارووال اسپورٹس سٹی کیس میں آج احتساب عدالت میں پیشی سے معذرت کر لی۔

تفصیلات کے مطابق سابق وزیر داخلہ اور مسلم لیگ ن کے رکن قومی اسمبلی احسن اقبال کے خلاف نارووال اسپورٹس سٹی کیس کی سماعت احتساب عدالت کے جج محمد بشیر نے کی۔

نیب پراسیکیوٹر وسیم جاوید عدالت کے روبرو پیش ہوئے تاہم کورونا وائرس کے باعث مسلم لیگ ن کے رہنما احسن اقبال پیش نہ ہوئے۔

احتساب عدالت کے جج نے سماعت کے دوران استفسار کیا کہ احسن اقبال کے خلاف ریفرنس کا کیا بنا؟ جس پر نیب پراسیکیوٹر نے جواب دیا کہ انکوائری مکمل ہے، ریفرنس تیاری کی مراحل میں ہے۔

عدالت نے نارووال اسپورٹس سٹی کیس میں پیشرفت رپورٹ جمع کرانے کی ہدایت کرتے ہوئے احسن اقبال کے خلاف کیس کی سماعت 8 جون تک ملتوی کر دی۔

یاد رہے کہ گزشتہ سال 23 دسمبر کو مسلم لیگ ن کے رہنما احسن اقبال کو قومی احتساب بیور (نیب) نے نارووال اسپورٹس سٹی کیس میں گرفتار کیا تھا۔

بعدازاں 25 فروری کو اسلام آباد ہائی کورٹ نے نارووال اسپورٹس کمپلیکس کیس میں احسن اقبال کی ضمانت منظور کرتے ہوئے لیگی رہنما کو ایک کروڑ روپے کے ضمانتی مچلکے جمع کرانے کا حکم دیا تھا۔

اسلام آباد: سابق وزیر اعظم شاہد خاقان عباسی نے کہا ہے کہ چھ ماہ گزر گئے نیب چارجز ثابت نہیں کر سکا، نئے ترمیمی آرڈیننس کے بعد اختیارات کے غلط استعمال کا الزام بھی ختم ہو چکا ہے۔

پاکستان مسلم لیگ ن کے رہنما شاہد خاقان عباسی نے میڈیا سے گفتگو کرتے ہوئے کہا کہ میرے دوستوں اور رشتہ داروں پر نیب والے دباؤ ڈالتے ہیں کہ ان کے اثاثے شاہد خاقان کے ہیں، نیب کو صرف پولیٹیکل انجینئرنگ کے لیے استعمال کیا جا رہا ہے، یہ تماشے پرانے ہیں۔

سابق وزیر اعظم نے ایک بار پھر نیب پر تنقید کے نشتر چلاتے ہوئے کہا کہ نیب کا ایک ہی طریقہ ہے کہ لوگوں کو بدنام کیا جائے، چیئرمین نیب میری ضمانت پر ہائی کورٹ کی باتیں معلوم کر لیں، نیب نے ملک کو مفلوج، معیشت کو تباہ کر دیا ہے۔

قبل ازیں، ایل این جی ریفرنس سے متعلق آج احتساب عدالت میں سماعت ہوئی، شاہد خاقان کے وکیل نے عدالت میں کہا کہ جس ضمنی ریفرنس کے بارے میں کہا گیا تھا وہ عدالت میں ابھی تک پیش نہیں کیا گیا۔ نیب کے وکیل نے کہا کہ ریفرنس حتمی مراحل میں ہے، اگلی سماعت تک دائر کر دیں گے۔ بعد ازاں، احتساب عدالت نے مزید سماعت یکم اپریل تک ملتوی کر دی۔

شاہد خاقان نے عدالت کے باہر میڈیا سے مہنگائی سے متعلق گفتگو میں کہا کہ ایف آئی اے مہنگائی سے متعلق کام نہیں کر سکتا، اس سلسلے میں حکومت پارلیمانی کمیٹی تشکیل دے، حکومت مہنگائی کو کنٹرول کرنے میں ناکام ہو چکی ہے۔ برطانیہ کو لکھے گئے خط پر تبصرہ کرتے ہوئے انھوں نے کہا کہ شہباز شریف جلد واپس آئیں گے، برطانیہ کو لکھے گئے خط کا کوئی سفارتی جواز نہیں۔

لاہور: احتساب عدالت نے مسلم لیگ ن کے رہنما حمزہ شہباز کے جوڈیشل ریمانڈ میں 28 فروری تک توسیع کر دی۔

تفصیلات کے مطابق لاہور کی احتساب عدالت میں مسلم لیگ ن کے رہنما حمزہ شہباز کے خلاف منی لانڈرنگ کیس کی سماعت ہوئی، لیگی رہنما کو عدالت کے سامنے پیش کیا گیا۔

عدالت نے سماعت کے آغاز پر نیب پراسیکیوٹر سے استفسار کیا کہ اس کیس کے ریفرنس کی کیا صورت حال ہے جس پر پراسیکیوٹر نے جواب دیا کہ ریفرنس تیاری کے آخری مراحل میں ہے۔

بعدازاں عدالت نے مسلم لیگ ن کے رہنما حمزہ شہباز کے جوڈیشل ریمانڈ میں 28 فروری تک توسیع کر دی۔

حمزہ شہباز کی درخواست ضمانت مسترد

اس سے قبل 11 فروری کو لاہور ہائی کورٹ نے آمدن سے زائد اثاثہ جات کیس میں مسلم لیگ ن کے رہنما حمزہ شہباز شریف کی درخواست ضمانت مسترد کر دی تھی۔

عدالت نے ریمارکس دیے کہ تھے ہم مطمئن نہیں کہ ملزم کے ذرائع آمدن کیا تھے، آپ نے کہا والد، بھائی اور بہن سے تحائف ملے،ان کے اثاثوں کو بھی دیکھنا ہوگا کہ ذرائع آمدن کیا ہیں۔

واضح رہے کہ لاہور ہائی کورٹ رمضان شوگر ملز کیس میں مسلم لیگ ن کے رہنما حمزہ شہباز کی ضمانت منظور کرچکی ہے۔

اسلام آباد: پاکستان گیس پورٹ کمپنی کا کیس آج اسلام آباد ہائی کورٹ میں سنا جائے گا، حکومت نے معاہدے کی خلاف ورزی پر کمپنی کا کنٹریکٹ منسوخ کر رکھا ہے۔

تفصیلات کے مطابق ایل این جی سے متعلق پاکستان گیس پورٹ کمپنی کے معاہدے کی منسوخی کے کیس کی سماعت آج اسلام آباد ہائی کورٹ میں ہوگی، کمپنی نے معاہدے کی خلاف ورزی کی تھی جس سے پاکستان کو بھاری نقصان اٹھانا پڑا۔

اے آر وائی نیوز کے مطابق حکومت کمپنی کو ڈھائی لاکھ ڈالر یومیہ ، 90 ملین ڈالر سالانہ کرایہ ادا کر رہی ہے، کمپنی پر پہلے بھی معاہدے کی تکمیل میں تاخیر پر 41 ملین ڈالر جرمانہ کیا گیا تھا، سابق وزیر اعظم شاہد خاقان عباسی نے جرمانے کی رقم ایک ملین ڈالر کر دی تھی۔

جرمانہ عائد کرنے والے ایم ڈی پاکستان ایل این جی ٹرمینل کو بھی برطرف کر دیا گیا تھا، اعلیٰ افسر کی برطرفی پر چیئرمین پی ٹی آئی نے احتجاجی ٹویٹ بھی کیا تھا۔

نیب نے شاہد خاقان عباسی کیخلاف ایل این جی ریفرنس دوبارہ دائر کردیا

یاد رہے کہ 12 دسمبر کو قومی احتساب بیورو (نیب) نے سابق وزیر اعظم شاہد خاقان عباسی کے خلاف ایل این جی ریفرنس دوبارہ دائر کر دیا ہے، جسے احتساب عدالت نے باقاعدہ سماعت کے لیے منظور کر لیا تھا، ریفرنس میں شاہد خاقان سمیت 10 ملزمان نامزد ہیں۔ نیب نے رجسٹرار احتساب عدالت کے اعتراضات دور کر کے 8 ہزار صفحات پر مشتمل ایل این جی ریفرنس احتساب عدالت میں دوبارہ جمع کرایا تھا۔

ریفرنس احتساب عدالت اسلام آباد میں اختیارات کے غلط استعمال پر دائر کیا گیا، جس میں سابق وزیر اعظم اور مفتاح اسماعیل کے نام بھی ملزمان میں شامل ہیں۔