ARYNews.tv | Urdu – Har Lamha Bakhabar

Tag: احسن اقبال

  • سی پیک میں سعودی عرب کی شراکت پر چین کو اعتماد میں لیا گیا ہے: فواد چوہدری

    سی پیک میں سعودی عرب کی شراکت پر چین کو اعتماد میں لیا گیا ہے: فواد چوہدری

    اسلام آباد: وفاقی وزیر اطلاعات فواد چوہدری نے سابق وزیر احسن اقبال کے ٹویٹ کا جواب دیتے ہوئے کہا ہے کہ پاک چین اقتصادی راہداری میں سعودی عرب کی شراکت پر چین کو اعتماد میں لیا۔ سی پیک میں توسیع پاکستان اور چین کے مفاد میں ہے۔

    تفصیلات کے مطابق پاکستان کی جانب سے سعودی عرب کو سی پیک میں شمولیت کی دعوت کے بعد سابق دور حکومت کے وزیر احسن اقبال نے سماجی رابطے کی ویب سائٹ ٹویٹر پر ٹویٹ کیا کہ کیا سی پیک میں سعودی عرب کو شامل کرنے سے قبل چین کو اعتماد میں لیا گیا؟

    انہوں نے کہا کہ سی پیک میں کسی بھی ملک کی شمولیت پر دونوں فریقین (پاکستان اور چین) کا متفق ہونا ضروری ہے۔

    وفاقی وزیر اطلاعات فواد چوہدری نے احسن اقبال کے ٹویٹ کا جواب دیتے ہوئے کہا ہے کہ پاک چین اقتصادی راہداری میں سعودی عرب کی شراکت پر چین کو اعتماد میں لیا گیا ہے۔

    انہوں نے کہا کہ سی پیک میں توسیع پاکستان اور چین کے مفاد میں ہے۔ تاریک دور ختم ہوگیا، پاکستان خطے میں معاشی سرگرمی کا مرکز بنے گا۔

    خیال رہے کہ گزشتہ روز فواد چوہدری نے بتایا تھا کہ سعودی عرب پہلا ملک ہے جس کو سی پیک میں شمولیت کی دعوت دی ہے، سی پیک میں سعودی عرب تیسرا شراکت دار ہوگا۔

    انہوں نے کہا تھا کہ سعودی عرب کو سی پیک میں تیسرے اسٹریٹجک پارٹنر کی حیثیت سے شمولیت کی دعوت دی گئی ہے، بڑی شراکت داری کی ابتدا ہوگئی۔

    فواد چوہدری کے مطابق سعودی عرب اب پاکستان میں براہ راست سرمایہ کاری کرے گا، وزیر اعظم عمران خان کے اہم دورے کے بعد سعودی عرب سے پاکستان میں بڑی سرمایہ کاری آئے گی، سعودی عرب کو یقین دلایا ہے کہ ان کے سیکورٹی معاملات میں مدد کریں گے۔

  • ہم حکومت کو 100 دن دیں گے، عمران خان وعدے پورے کرکے دکھائیں، احسن اقبال

    ہم حکومت کو 100 دن دیں گے، عمران خان وعدے پورے کرکے دکھائیں، احسن اقبال

    اسلام آباد : مسلم لیگ ن کے رہنما احسن اقبال کا کہنا ہے کہ موجودہ حکومت کو سو دن پورے کرنے دیں گے اور دیکھیں گے کہ وزیراعظم عمران خان کتنے وعدے پورے کرتے ہیں، حکومت نے گیس بجلی مہنگی کرکےعوام پر بوجھ ڈال دیا ہے۔

    تفصیلات کے مطابق مسلم لیگ ن کے رہنما احسن اقبال کے رہنما نے میڈیا سے گفتگو میں کہا کہ پانی کا مسئلہ اہم ہے،خوشی ہےچیف جسٹس دلچسپی لے رہےہیں، ہماری حکومت نےنیشنل واٹر پالیسی بنائی،اب اس پرعمل ہوناچاہئے، چیف جسٹس پاکستان نیشنل واٹر پالیسی پر عملدرآمد یقینی بنائیں۔

    احسن اقبال کا کہنا تھا کہ نئے پاکستان کا سودا بیچا گیا اس کی اصلیت عوام کے سامنے ہے، ہیلی کاپٹر میں وزیراعظم اور ان کے کتے بھی سفرکرتےہیں، حکومت کا 55روپے کلومیٹر پر ہیلی کاپٹرچل رہاہے۔

    ن لیگی رہنما نے حکومت پر تنقید کرتے ہوئے کہا تیس دن میں حکومت کے تیس لطیفے بن گئے ہیں، سو دن میں حکومت کے سو لطیفے بنیں گے، ہم حکومت کو100 دن دیں گے، عمران خان وعدے پورے کرکے دکھائیں۔

    ان کا مزید کہنا تھا کہ عمران خان آپ کے ہاتھ پاؤں کھلےہیں،جو کہا ہے وہ کریں ، آپ 100دن کےوعدےپورےکرکےدکھائیں، آپ کے پاس تجربہ نہیں اس لئے وعدے پورے نہیں کر پائیں گے۔

    مزید پڑھیں : ہم حکومت کو100دن کا پلان مکمل کرنے کاپورا موقع دیں گے، احسن اقبال

    احسن اقبال نے کہا حکومت نےبیرون ملک سے200ارب ڈالرلانےتھےلاکردکھائیں ، ایل پی جی کی قیمت بڑھا کرعوام پر بوجھ ڈال دیا گیا، الیکشن سے پہلے کہا تھا حکومت چلانا اناڑیوں کا کام نہیں۔

    یاد رہے چند روز قبل حسن اقبال کا کہنا تھا کہ نواز شریف اور ان کی بیٹی سیاسی قیدی ہیں ، ہم حکومت کو100دن کا پلان مکمل کرنے کاپورا موقع دیں گے ، انہوں نے جو پانی سے گاڑی چلانی ہے چلا کر دکھائیں۔

  • توہینِ عدالت کیس: احسن اقبال کی معافی منظور، کارروائی ختم کردی گئی

    توہینِ عدالت کیس: احسن اقبال کی معافی منظور، کارروائی ختم کردی گئی

    لاہور: عدالتِ عالیہ نے مسلم لیگ ن کے رہنما اور سابق وزیراحسن اقبال کے خلاف توہینِ عدالت کی کارروائی ختم کردی، انہوں نے گزشتہ سماعت میں عدالت سے غیر مشروط معافی طلب کی تھی۔

    تفصیلات کے مطابق عدالت نے احسن اقبال کے خلاف توہینِ عدالت کی کارروائی ختم کرتے ہوئے امید ظاہر کی ہے کہ مستقبل میں ان کی جانب سے اداروں کے احترام کو ملحوظِ خاطر رکھا جائے گا۔

    یاد رہے کہ جولائی میں ہونے والی سماعت میں احسن اقبال نے عدالت کے روبرو غیر مشروط معافی طلب کی تھی جسے قبول کرلیا گیا ہے، عدالت نے اپنے ریمارکس میں کہا تھا کہ احسن اقبال کو عزت دیتے ہیں مگرباہر جا کر ایسے بیانات قابل برداشت نہیں ہیں، عدالت کی سماعت ستمبر تک ملتوی کی گئی تھی اور عدالت کی جانب سے اس دوران احسن اقبال کے رویے کا جائزہ لینے کا کہا گیا تھا۔

    توہینِ عدالت کیس میں معافی حاصل کرنے کے بعد احسن اقبال کا کہنا تھا کہ ترقی کےلیےتمام اداروں میں ہم آہنگی ضروری ہے ، اگر عدلیہ کمزور ہو گی تو ہر مظلوم کو نقصان ہو گا۔ انہوں نے یہ بھی کہا کہ پارلیمنٹ کی طرح تمام ادارے مقدس ہیں۔

    ملک میں توانائی کی صورتحال پر تبصرہ کرتے ہوئے ان کا کہنا تھا کہ توانائی اولین ترجیح نہ ہوتی توآج سول وار جیسی صورتحال ہوتی ، 12ہزار میگا واٹ پیدا کی مگر کسی سے چندہ نہیں مانگا ۔ بین الاقوامی اداروں کے اشتراک کے بغیر ڈیم بنانا عملاً ناممکن ہے، ڈیم بنانا انتہائی اہم ہے اسے سنجیدہ لیا جائے ۔

    ان کا کہنا تھا کہ موجودہ حکومت سی پیک کو سبوتاژ کرنے کے لیے لائی گئی ہے تاہم پوری قوم سی پیک کی حفاظت کرے گی ، انہوں نے اس بات کا بھی عندیہ دیا کہ ان کی جماعت دھرنے اور لاک ڈاؤن نہیں کرے گی۔

  • نواز شریف اوران کی بیٹی سیاسی قیدی ہیں، احسن اقبال

    نواز شریف اوران کی بیٹی سیاسی قیدی ہیں، احسن اقبال

    اسلام آباد : مسلم لیگ ن کے رہنما احسن اقبال کا کہنا ہے کہ نواز شریف اور ان کی بیٹی سیاسی قیدی ہیں ، ہم حکومت کو 100دن کا پلان مکمل کرنے کا پورا موقع دیں گے جبکہ رانا ثنااللہ نے کہا کہ اپوزیشن وہی ہے جو آج مولانافضل الرحمان کو سپورٹ کررہی ہے۔

    تفصیلات کے مطابق مسلم لیگ ن کے رہنما احسن اقبال نے پارلیمنٹ ہاؤس کے باہر میڈیا سے گفتگو کرتے ہوئے کہا کہ نواز شریف عدالتی اور قانونی عمل کا سامنا کر رہے ہیں ، ہائی کورٹ میں ہونے والے ٹرائل کو پوری قوم نے دیکھ لیا، عدالت نےپوچھا کرپشن کہاں ہورہی  ہے تونیب جواب دینےسےقاصر رہی ہے۔

    احسن اقبال کا کہنا تھا کہ نواز شریف اور ان کی بیٹی سیاسی قیدی ہیں ، ہم حکومت کو100دن کا پلان مکمل کرنے کاپورا موقع دیں گے ، انہوں نے جو پانی سے گاڑی چلانی ہے چلا کر دکھائیں۔

    دوسری جانب ن لیگی رہنما رانا ثنا اللہ نے میڈیا سے گفتگو کرتے ہوئے کہا کہ پیپلز پارٹی کا کردار حکومت کے سہولت کار کا ہے اور پیپلز پارٹی آئندہ ایسا ہی کردار ادا کرتی رہے گی۔

    اپوزیشن وہی ہے جو آج مولانافضل الرحمان کو سپورٹ کررہی ہے،راناثنااللہ 

    راناثنااللہ کا کہنا تھا کہ اعتزاز احسن کا نام دینا جمہوری اصولوں کی خلاف ورزی تھی ، تقاضا تھا تمام جماعتیں بیٹھ کر امیداور کا فیصلہ کرتیں ، آج واضح ہوجائے گا اپوزیشن کون ہے، اپوزیشن وہی ہے جو آج مولانافضل الرحمان کو سپورٹ کررہی ہے۔

    مسلم لیگ ن کے رہنما رانا تنویر نے کہا کہ مولانا فضل الرحمان کے پیپلزپارٹی اور آصف زرداری سے اچھا تعلق رہا ہے، ہماراخیال تھا کہ آصف زرداری مولانا فضل الرحمان کے نام پر اتفاق کرلیں گے لیکن انہوں نے کوئی توجہ نہیں دی۔

    مرتضیٰ جاوید کا کہنا تھا مولانا فضل الرحمان کے امیدوار بننے میں سمجھنے والوں کے لیے سوالیہ نشان ہے جبکہ ریاض پیرزادہ نے کہا لیڈرشپ کے ذاتی اختلافات کی وجہ سے خرابی پیدا ہوئی۔

  • اپوزیشن جماعتوں کا متفقہ صدارتی امیدوارلانے کا فیصلہ، اعلان آج کیا جائے گا

    اپوزیشن جماعتوں کا متفقہ صدارتی امیدوارلانے کا فیصلہ، اعلان آج کیا جائے گا

    مری:  مسلم لیگ ن کے سینئر رہنما احسن اقبال کا کہنا ہے کہ اپوزیشن جماعتیں متفقہ صدارتی امیدوار کے لیے ایک پلیٹ فارم پرمتحد ہیں.

    ان خیالات کا اظہار انھوں نے آل پارٹی کانفرنس کے بعد میڈیا سے گفتگو کرتے ہوئے کیا. اس موقع پر پیپلزپارٹی، ایم ایم اے اور دیگر جماعتوں‌ کے نمائندے بھی موجود تھے.

    احسن اقبال نے کہا کہ شہبازشریف کی قیادت میں اپوزیشن جماعتوں کا اجلاس ہوا، جس میں‌ اپوزیشن جماعتوں نے متفقہ صدارتی امیدوارلانے کا فیصلہ کیا ہے.

    انھوں‌ نے کہا کہ پیپلزپارٹی نے متفقہ صدارتی امیدوارکی ضمن میں مشاورت کے لئے وقت لیا ہے. تمام اپوزیشن جماعتیں ایک پلیٹ فارم پرمتحد ہیں.

    ان کا کہنا تھا کہ اپوزیشن جماعتیں متفقہ امیدوار ہی لائیں گی، نام کا اعلان آج کیاجائے گا، پیپلزپارٹی نے اپنی قیادت سےمشاورت کے لئے رات تک کا وقت لیا ہے، شہبازشریف آج نام کااعلان کریں گے.

    شہباز شریف کی زیر صدارت اپوزیشن کی کل جماعتی کانفرنس

    اس موقع پر انھوں نے کہا کہ اوورسیز پاکستانیوں کے لئے ووٹنگ کا استعمال عجلت میں کیا گیا، الیکشن کمیشن کےاس اقدام سے تحفظات ہیں.

    انھوں‌ نے مزید کہا کہ اپوزیشن رہنماؤں کوملنے والی دھمکیوں کا نوٹس لیا جائے، اےاین پی رہنماؤں کوشدیددھمکیاں دی جارہی ہیں، حکومت انتقامی ایجنڈےپرکام کررہی ہے.

  • متفقہ صدارتی امیدوار لانے کے لیے اپوزیشن نے کوششیں تیز کر دیں

    متفقہ صدارتی امیدوار لانے کے لیے اپوزیشن نے کوششیں تیز کر دیں

    لاہور: مشترکہ صدارتی امیدوار لانے کے لیے اپوزیشن نے کوششیں تیز کر دیں، لاہور میں پیپلزپارٹی اور ن لیگ کے وفد کی اہم ملاقات ہوئی.

    تفصیلات کے مطابق خورشیدشاہ اوررضاربانی نے ماڈل ٹاؤن میں شہبازشریف سے ملاقات کی.

    دونوں جماعتوں‌ کے رہنماؤں نے صدارتی انتخابات سے متعلق مشترکہ حکمت عملی پر تبادلہ خیال کیا. ملاقات میں احسن اقبال،ایازصادق اوررانا تنویر نے بھی شرکت کی.

    واضح رہے کہ پیپلز پارٹی نے چوہدری اعتزاز احسن کو صدارتی امیدوار نامزد کیا تھا، مگر مسلم لیگ ن کو پیپلز پارٹی کے امیدوار پر شدید تحفظات تھے.

    اپوزیشن چاہتی ہےصدارتی انتخاب کے لئےمتفقہ امیدوارلایاجائے:‌احسن اقبال

    بعد ازاں رہنما مسلم لیگ ن احسن اقبال نے میڈیا سے گفتگو کرتے ہوئے کہا کہ اپوزیشن صدارتی انتخاب کے لئے متفقہ امیدوار لانا چاہتی ہے۔

    سابق وفاقی وزیر نے کہا کہ عید کے بعد اپوزیشن جماعتوں کا اجلاس ہوگا، توقع ہے کہ مثبت نتیجہ سامنے آئے گا۔

    انھوں نے کہا کہ پیپلزپارٹی کے رہنما فرحت اللہ بابربھی کہہ چکے ہیں کہ اعتزاز احسن حتمی امیدوارنہیں۔

    صدارتی امیدوارکےحوالےسےقیاس آرائیوں سےگریز کیا جائے، اپوزیشن اگریکجا نہ ہوئی توحکمران جماعت کوفائدہ ہوگا.

    یاد رہے کہ حکمران جماعت کی جانب سے عارف علوی کو صدارتی امیدوار نامزد کیا گیا ہے۔

  • ناتجربہ کار حکومت امور سیاست سے واقف نہیں، احسن اقبال

    ناتجربہ کار حکومت امور سیاست سے واقف نہیں، احسن اقبال

    اسلام آباد: پاکستان مسلم لیگ (ن) کے رہنما احسن اقبال نے کہا ہے کہ پاکستان میں نئی حکومت منتخب ہوئی ہے، موجودہ حکومت متنازع انتخابات کے ذریعے وجود میں آئی، ناتجربہ کار حکومت امور سیاست سے واقف نہیں ہے۔

    ان خیالات کا اظہار انہوں نے اسلام آباد میں پریس کانفرنس کرتے ہوئے کیا، احسن اقبال نے کہا کہ انتخابات پر تحفظات کے باوجود حلف اُٹھایا، انتقال اقتدار میں کوئی رکاٹ نہیں ڈالی گئی، ملک میں کوئی سیاسی یا آئینی بحران کھڑا نہیں ہوا۔

    انہوں نے کہا کہ حیرت ہوئی وزیراعظم کو یہی نہیں معلوم ریاستی مشینری کیسے چلتی ہے، نئے پاکستان کے خواب کو طلوع ہونے سے پہلے ہی گرہن لگ گیا ہے، کل پی ٹی آئی منشور دہرایا گیا، ٹھوس لائحہ عمل پیش نہیں کیا گیا، حیرت ہوئی وزیر اعظم کو وفاقی، صوبائی اختیارات کا علم نہیں ہے۔

    مزید پڑھیں: منی لانڈرنگ سے باہر گیا پیسہ واپس لانے کیلیے ٹاسک فورس بنائیں گے، عمران خان

    احسن اقبال نے کہا کہ عمران خان نے اپنی تقریر میں توانائی بحران پر بات نہیں کی، حکومت نے وزیر داخلہ نہ لگا کر غیرسنجیدگی کا مظاہرہ کیا گیا، ایف آئی اے کی نگرانی کے لیے ضروری نہیں داخلہ اپنے پاس رکھی جائے، عمران خان پہلے ہمیں وزیر خارجہ کا طعبہ دیتے رہتے تھے، پاکستان کو فل ٹائم وزیر داخلہ کی ضرورت ہے۔

    مسلم لیگ (ن) کے رہنما نے کہا کہ عالمی برادری کی نظریں ہم پر ہیں جبکہ توانائی ذخیرے میں اضافہ نہ کیا تو بدترین لوڈشیڈنگ کا شکار ہوسکتے ہیں، حکومت کتنے میگاواٹ بجلی سسٹم میں داخل کرے گی اس کا کوئی روڈ میپ نہیں، ن لیگ کی حکومت نے چار سال میں گیارہ ہزار میگاواٹ بجلی سسٹم میں شامل کی، ہم نے جو منصوبے شروع کیے وہ معیشت کے لیے بہت اہم ہیں۔

  • وزیراعظم کیلئے شہبازشریف ہمارے امیدوار ہیں،احسن اقبال

    وزیراعظم کیلئے شہبازشریف ہمارے امیدوار ہیں،احسن اقبال

    اسلام آباد : ن لیگی رہنما احسن اقبال کا کہنا ہے کہ وزیراعظم کیلئے شہبازشریف ہمارے امیدوار ہیں اور قومی اسمبلی میں اسپیکر اور ڈپٹی اسپیکر کے لئے متفقہ فیصلے سے پی پی اور ایم ایم اے کے امیدوار کی حمایت کی ہے، انصاف کےدروازے بند ہوئے توعوامی احتجاج کا حق رکھتے ہیں۔

    تفصیلات کے مطابق مسلم لیگ ن کے رہنما احسن اقبال نے میڈیا سے گفتگو کرتے ہوئے کہا طے تھا اسپیکر کے انتخاب کے لیے پیپلزپارٹی اپنا امیدوار دے گی اور وزیراعظم کے لیے مسلم لیگ ن شہباز شریف کا نام دے گی جبکہ ڈپٹی اسپیکر کے انتخاب کے لیے ایم ایم اے اپنا امیدوار دے گی۔

    احسن اقبال کا کہنا تھا کہ ہم خورشیدشاہ اورایم ایم اے کے امیدوار کو ووٹ دیں گے، امید ہے الائنس میں شامل جماعتیں اپنے ووٹ ہمیں دے گی۔

    انھوں نے کہا کہ ن لیگ میں جو فارورڈ بلاک بنے تھے وہ الیکشن سے پہلے بن چکے، ن لیگ کے پاس جوبھی ارکان ہیں سب نظریاتی ہیں، الیکشن سے پہلے جو کمزور دل اور لوٹے تھے وہ چھٹ گئے۔

    ن لیگی رہنما کا کہنا تھا وفاداریاں بدلنے والوں کیساتھ عوام نے کیا سلوک کیا، خوش آئندبات ہےعوام نے لوٹوں کے خلاف اتحاد کرلیا ہے۔

    احسن اقبال نے مزید کہا کہ احتجاجی پروگرام آگے بڑھ رہا ہے، تمام لیگی رہنما سیاہ پٹیاں باندھ کراسمبلیوں میں شرکت کریں گے اور پارلیمنٹ میں بھی احتجاج کریں گے، انصاف کا حق نہیں ملا تو عوامی احتجاج کریں گے۔

    مزید پڑھیں :  شہبازشریف وزارت عظمیٰ کے متفقہ امیدوار ہوں گے: مریم اورنگزیب

    یاد ریے  مسلم لیگ ن کی سینئر رہنما مریم اورنگزیب کا بھی کہنا  تھا کہ شہبازشریف کووزارت عظمیٰ کامتفقہ امیدوار نامزد کیا گیا ، نواز شریف پر کسی قسم کی کرپشن ثابت نہیں ہوئی۔

    ان کا کہنا تھا کہ عمران خان خودساختہ وزیراعظم بن بیٹھےہیں، عمران خان نے پاکستان کےعوام کا ووٹ چوری کیا ہے۔

  • مسلم لیگ ن کبھی الیکشن کا بائیکاٹ نہیں کرے گی‘ احسن اقبال

    مسلم لیگ ن کبھی الیکشن کا بائیکاٹ نہیں کرے گی‘ احسن اقبال

    لاہور: مسلم لیگ ن کے رہنما احسن اقبال کا کہنا ہے کہ مسلم لیگ ن کبھی الیکشن کا بائیکاٹ نہیں کرے گی، عوام کی محبت اور حمایت ن لیگ کے ساتھ ہے۔

    تفصیلات کے مطابق سابق وزیرداخلہ احسن اقبال نے سماجی رابطے کی ویب سائٹ ٹویٹر پر پاکستان تحریک انصاف کے رہنما اسد عمر کے بیان پرردعمل دیتے ہوئے کہا کہ 25 جولائی کو ن لیگ انتخابات میں کامیابی حاصل کرے گی۔

    احسن اقبال کے مطابق عوام تسلیم کرتے ہیں مسلم لیگ ن کی حکومت نے 2013 کے دو بڑے چیلنجزجن میں لوڈشیڈنگ اور دہشت گردی شامل تھے ان کا کامیابی کے ساتھ خاتمہ کیا۔

    مسلم لیگ ن کے رہنما کا یہ بھی کہنا تھا کہ مسلم لیگ ن کبھی الیکشن کا بائیکاٹ نہیں کرے گی، عوام کی محبت اورحمایت ان کے ساتھ ہے۔

    خیال رہے کہ اس سے قبل پاکستان تحریک انصاف کے رہنما اسد عمر نے میڈیا سے گفتگو کرتے ہوئے کہا تھا کہ کوئی انتخابات کا بائیکاٹ کرے تووہ اس کا سیاسی حق ہے۔

    پی ٹی آئی کے رہنما کا کہنا تھا کہ مجھےلگتا ہے نوازشریف آخری دنوں میں انتخابات کا بائیکاٹ کردیں گے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • سابق وزیرداخلہ احسن اقبال نےعدالت سےغیرمشروط معافی مانگ لی

    سابق وزیرداخلہ احسن اقبال نےعدالت سےغیرمشروط معافی مانگ لی

    لاہور: سابق وزیرداخلہ اور مسلم لیگ ن کے رہنما احسن اقبال نے توہین عدالت کیس میں عدالت سے غیرمشروط معافی مانگ لی۔

    تفصیلات کے مطابق لاہور ہائی کورٹ میں سابق وزیرداخلہ احسن اقبال کے خلاف توہین عدالت کیس کی سماعت ہوئی۔ انہوں نے سماعت کے دوران عدالت سے غیرمشروط معافی مانگ لی۔

    عدالت میں سماعت کے دوران جسٹس عاطرمحمود نے ریمارکس دیے کہ احسن اقبال باربارکہتے ہیں ایک جماعت کوٹارگٹ کیا جا رہا ہے، عدلیہ کا کیا کام کہ ایک جماعت کو ٹارگٹ کرے۔

    انہوں نے ریمارکس دیے کہ یہاں آپ معافی مانگتے ہیں اور باہر نکل آپ اس کے جیالے بن جاتے ہیں جوعدلیہ کے پیچھے ہاتھ دھوکرپڑا ہے۔

    عدالت نے ریمارکس دیے کہ احسن اقبال کو عزت دیتے ہیں مگرباہر جا کر ایسے بیانات قابل برداشت نہیں ہیں، سماعت عدالتی چھٹیوں کے بعد تک رکھ لیتے ہیں پھراحسن اقبال کا رویہ دیکھا جائے گا۔

    سابق وزیر داخلہ کے وکیل نے عدالت سے کیس نمٹانے کی استدعا کی جس پر عدالت نے ریمارکس دیے کہ کیس لڑنا چاہتے ہیں تو میرٹ پر فیصلہ کر دیتے ہیں۔

    مسلم لیگ ن کے رہنما احسن اقبال کے وکیل نے کہا کہ عدالت سےغیرمشروط معافی مانگی ہے توہین عدالت کا نوٹس واپس لیا جائے۔

    عدالت نے دوران سماعت ریمارکس دیے کہ احسن اقبال سیاسی ورکر ہیں قوت برداشت لوگوں سے زیادہ ہونی چاہیے۔ جسٹس مظاہرعلی اکبر نے کہا کہ کسی کو جتانا نہ جتانا عوام کی خواہش ہو گی ہماری نہیں ہے۔

    بعدازاں لاہور ہائی کورٹ نے سابق وزیرداخلہ احسن اقبال کے خلاف توہین عدالت کیس کی سماعت 5 ستمبر تک ملتوی کردی۔

    توہین عدالت کیس: احسن اقبال نے تحریری جواب عدالت میں جمع کرا دیا

    یاد رہے کہ تین روز قبل سابق وزیرداخلہ اور مسلم لیگ ن کے رہنما نے توہین عدالت کیس میں اپنا تحریری جواب عدالت میں جمع کرایا تھا جس میں انہوں نے لکھا تھا کہ عدلیہ کی عزت کرتا ہوں۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔