ننکانہ صاحب: باباگرونانک کے 550ویں جنم دن کی تین روزہ تقریبات اختتام پذیر ہوگئیں، جنم دن کی خوشی میں آتش بازی کا شاندار مظاہرہ کیا گیا اور پاکستان کی ترقی وخوش حالی اور امن وامان کے لیے خصوصی دعا کی گئی۔
تفصیلات کے مطابق ننکانہ صاحب میں باباگرونانک کے 550ویں جنم دن کی تین روزہ تقریبات ختم ہوگئیں، سکھ یاتریوں کی روانگی کا سلسلہ کل سے شروع ہوجائے گا، سکھ برادری نے پاکستانی عوام سے دلی محبت کا اظہار کیا۔
یاتریوں نے پاکستان کی سیکیورٹی صورت حال سمیت حکومتی اقدامات کو بھی سراہا۔
سکھ برادری نے گزشتہ روز اپنے مذہبی پیشوا بابا گرونانک کی پانچ سو پچاسویں سالگرہ منائی اور اسی سلسلے میں تقریبات کا سلسلہ تین روز تک جاری رہا، ہر سال پاکستان میں سکھ برادری کے مذہبی پیشوا بابا گرونانک کی سالگرہ کی تقریبات کا انعقاد کیا جاتا ہے، جس میں شرکت کے لیے کینیڈا اور بھارت سمیت دنیا بھر کے ممالک سے سکھ یاتری پاکستان کا رخ کرتے ہیں۔
یاد رہے 9 نومبر کو وزیر اعظم عمران خان نے کرتارپور راہداری کا افتتاح کیا تھا، افتتاحی تقریب سے خطاب کرتے ہوئے کہا تھا سکھ برادری کوگرونانک کی سالگرہ کی مبارکباد دیتاہوں، راہداری کھولنے کی مجھے بہت خوشی ہوئی، امید ہے یہ شروعات ہے، انشااللہ بھارت سے تعلقات اچھے ہوں گے۔
پاکستان کی جانب سے باباگرو نانک کی 550ویں سالگرہ پر یادگاری ٹکٹ اور یادگاری سکہ جاری کیا گیا تھا، یادگاری سکہ 50 روپے مالیت کا تھا، سکے کے ایک رُخ پر اسلامی جمہوریہ پاکستان اور قومی نشان ہے جبکہ دوسرے رُخ پر سکھوں کی عبادت گاہ کی تصویر کندہ ہے، یادگاری سکے پر گرونانک دیو جی 1469-2019 کے الفاظ کندہ ہیں۔
