موسم سرما کی آمد کے ساتھ خشک میوہ جات کی سوغات بھی مارکیٹ میں آجاتی ہیں، بہت سے لوگوں کو سردیوں کا موسم ان ہی سوغات کی وجہ سے پسند ہے۔
مہنگائی کی وجہ سے یہ میوہ جات آج کل صرف دکانوں کی زینت بن کر رہ گئے ہیں۔ تاہم ان کی افادیت اور اہمیت سے انکار کسی طور بھی نہیں ممکن نہیں۔
موسم سرما میں لوگ ہر سال چند روایتی چیزوں کو خوب انجوائے کرتے ہیں یا اگر یوں کہا جائے کہ ان سوغاتوں کے بغیر موسم سرما کا مزہ ادھورا ہے تو کچھ غلط نہیں ہوگا۔
اس حوالے سے اے آر وائی نیوز کے پروگرام باخبر سویرا میں حکیم رضا الٰہی نے سرد موسم میں میوہ جات کی افادیت سے ناظرین کو آگاہ کیا۔
انہوں نے کہا کہ جس طرح گرمیوں کے خاص مشروبات یا خاص اشیاء ہوتی ہیں اسی طرح سردی میں مونگ پھلی ایک ایسا میوہ ہے جو تقریباً سب کی دسترس میں ہوتا ہے س میں وہ تمام افادیت و غذائیت ہے جو دیگر میوہ جات میں موجود ہوتی ہے۔
اس کے علاوہ خوبانی، کھجور، کشمش اور انجیر کو رات بھر بھگو کر صبح اس کے بیج نکالیں اور اس کا شیک بنا کر پی لیں، اس کافائدہ یہ ہے کہ اس کے پینے سے سردی میں قوت مدافعت کا نظام متحرک اور مضبوط ہوجاتا ہے جس سے آپ بہت سی بیماریوں کا باآسانی مقابلہ کرسکتے ہیں۔
حکیم رضا الٰہی نے بتایا کہ جو دیگر مغزیات ہیں جس میں بادام اخروٹ کاجو وغیرہ شامل ہیں یہ دماغ کو مضبوط اور توانا بناتے ہیں، ان تمام مغزیات کے چند دانے ہی کھائیں لیکن کھائیں ضرور، اس سے بیماریاں آپ کے قریب بھی نہیں آئیں گی۔
اس کے علاوہ تمام خشک میوہ جات مختلف بیماریوں کے خلاف مضبوط ڈھال کے طور پر کام کرنے کی صلاحیت رکھتے ہیں۔ ڈرائی فروٹس جسم کے درجہ حرارت کو بڑھانے اور موسم سرما کے مضر اثرات سے بچاؤ میں بھی اہم کردار ادا کرتے ہیں، اعتدال کے ساتھ ان کا استعمال انسانی جسم کو مضبوط اور توانا بناتا ہے ۔
