اسلام آباد: حکومت نے وفاقی اداروں میں ایک سال سے زائد عرصے سے خالی آسامیاں ختم کرنے کا فیصلہ کرلیا، اب اسکیل1 سے 16تک خالی آسامیوں پر بھرتی نہیں ہوگی۔
تفصیلات کے مطابق خزانہ ڈویژن نے خالی آسامیوں پر بھرتی نہ کرنے سے متعلق میورنڈم تیار کرلیا، جس میں کہا گیا ہے کہ اسکیل1 سے 16تک خالی آسامیوں پربھرتی نہیں ہوگی، حتمی منظوری وفاقی کابینہ سے لی جائے گی۔
فیصلہ تنظیم نو سے متعلق کابینہ کمیٹی کےاجلاس میں کیا گیا، فیصلے کا اطلاق تمام وزارتوں، ڈویژنز اور ایگزیکٹیو دفاتر پر ہوگا۔ جبکہ اسٹیبلشمنٹ ڈویژن کو ضروری کارروائی کے لیے ہدایات جاری کردی گئی ہیں۔
خزانہ ڈویژن کے مطابق گزشتہ ایک دیہائی سے وفاقی حکومت کے ملازمین کی تعداد مسلسل بڑھتی رہی، اس کی وجہ سے سالانہ تنخواہوں کابل بھی تین گنا بڑھ گیا، پنشن کی ادائیگی کے اخراجات پورے کرنا بھی مشکل ہورہا ہے۔
’وفاقی حکومت کے 95 فیصد ملازمین گریڈ 1 سے 16 تک کے ہیں، تنخواہوں کا 85 فیصد بل ان ملازمین پر خرچ ہوتا ہے، وزیراعظم غیر ضروری اخراجات میں کمی کےخواں ہیں‘۔
خزانہ ڈویژن کا کہنا ہے کہ ورلڈبینک بھی سرکاری اداروں میں رائٹ سائزنگ پر زور دے چکا ہے۔
