Tag: اداکارہ زیبا

پاکستانی فلموں میں اپنے وقت کی مشہور اور مقبول اداکاراؤں نے ڈبل رول نبھا کر نہ صرف سنیما کے شائقین سے داد اور ستائش سمیٹی بلکہ بڑے پردے کے ناقدین نے بھی انھیں سراہا اور ان کی صلاحیتوں کا اعتراف کیا۔

فلم انڈسٹری کی مشہور ہیروئنوں میں شبنم، صبیحہ خانم، شمیم آرا، رانی، زیبا بیگم اور بابرہ شریف نے متعدد فلموں‌ میں‌ ڈبل رول نبھائے اور سنیما بینوں‌ کی توجہ حاصل کی۔

ماضی کی سپر اسٹار شبنم سے آغاز کریں‌ تو انھوں نے فلم ’’آبرو‘‘ کا ڈبل رول اس خوبی سے نبھایا کہ نہ صرف ان کے پرستاروں نے اسے پسند کیا، بلکہ فلمی ناقدین نے بھی انھیں بہت سراہا اور انھیں‌ زبردست پزیرائی ملی۔

شمیم آرا کو پاکستان کی فلم انڈسٹری میں‌ اداکارہ ہی نہیں کام یاب ہدایت کارہ کے طور پر بھی پہچانا جاتا ہے۔ انھوں‌ نے اپنے وقت کے مشہور اور نہایت باصلاحیت اداکاروں‌ کے ساتھ کام کرکے خود کو منوایا اور ان کی فلمیں سپرہٹ ثابت ہوئیں۔ شمیم آرا نے فلم’’ہمراز‘‘ میں ڈبل کردار نبھا کر فلم بینوں سے خوب داد سمیٹی۔

انجمن پاکستان کی فلمی صنعت کا ایک نمایاں اور قابلِ ذکر نام ہے جنھیں‌ سنیما کے شائقین نے کئی فلموں‌ میں‌ دیکھا اور ان کی پرفارمنس کو سراہا۔ اداکارہ انجمن نے فلم ’’دُلاری‘‘ میں ڈبل رول ادا کرکے شائقین سے خوب داد سمیٹی تھی۔

پاکستانی سنیما کی مشہور اور مقبول ترین اداکارہ بابرہ شریف کی سپر ہٹ فلموں اور ان کی شان دار اداکاری نے اپنے وقت کے نام ور ہدایت کاروں اور قابلِ ذکر ناموں کو اپنا معترف اور شیدا بنا دیا تھا۔ اس اداکارہ کا اپنی ایک کام یاب فلم ’’سلاخیں‘‘ میں ڈبل کردار بہت پسند کیا گیا جب کہ مِس ہانگ کانگ، شبانہ اور بیٹی بھی وہ فلمیں تھیں جن میں بابرہ شریف نے مختلف روپ اپنائے اور عمدہ پرفارمنس سے شائقین کے دل جیتے۔

’’پرچھائیں‘‘ اور ’’چوری چوری‘‘ وہ فلمیں ہیں‌ جن میں زیبا بیگم نے ڈبل کردار نبھائے اور فلم نگری میں اپنی صلاحیتوں‌ کو آزماتے ہوئے شائقین کے دل جیت لیے۔

پاکستانی فلموں کی مشہور اداکارہ اور فلم بینوں‌ میں مقبول صبیحہ خانم نے ’’پاک دامن‘‘ اور ’’مسکراہٹ ‘‘ جیسی فلموں میں دو مختلف کردار نبھا کر نہ صرف شائقین بلکہ ناقدین سے بھی داد و تحسین سمیٹی۔ صبیحہ خانم کے بارے میں کہا جاتا ہے کہ وہ اپنے کرداروں میں حقیقت کا رنگ بھرنا جانتی تھیں۔

فلم کی کام یابی یا ناکامی الگ بات ہے، لیکن اداکارہ رانی پاکستان کی فلم انڈسٹری کا وہ چہرہ تھا جسے مداحوں‌ نے ہر بار اور ہر روپ میں بے حد سراہا اور پسندیدگی و قبولیت کی سند بخشی۔ اس اداکارہ نے فلم ’’ناگ منی‘‘ اور ’’ایک گناہ اور سہی‘‘ میں ڈبل کردار ادا کیے تھے۔

ماضی کی ایک اور اداکارہ ممتاز نے بھی ایک فلم میں ڈبل کردار نبھا کر خوب داد سمیٹی تھی۔ انھوں نے فلم انڈسٹری میں اپنے وقت کے سپر اسٹارز کے ساتھ کام کیا اور ’’خوشبو‘‘ وہ فلم تھی جس میں ممتاز کو ڈبل کردار نبھانے کا موقع ملا اور وہ شائقین کی توجہ حاصل کرنے میں کام یاب رہیں۔

یہ حقیقت ہے کہ پاکستان کی فلم نگری اور سنیما کے شائقین پچھلی دہائیوں کے دوران موضوع اور عکس بندی کے اعتبار سے معیاری فلموں سے محروم رہے ہیں اور یہی وجہ ہے کہ ہمارے یہاں بھی اکثریت، خاص طور پر نوجوان ہالی وڈ اور ہندی فلمیں‌ دیکھنا پسند کرتے ہیں۔ تاہم ماضی میں پاکستان میں بڑے پردے پر کئی ایسی فلمیں‌ پیش کی گئی‌ ہیں‌ جو ہر لحاظ سے کام یاب اور یادگار تھیں۔

آج ہم ان چند اردو فلموں کا تذکرہ کررہے ہیں جنھیں اب بھی اپنے موضوع، جان دار اسکرپٹ اور عمدہ مکالموں کے ساتھ اداکاروں کی شان دار پرفارمنس، موسیقی اور گلوکاری کے لحاظ سے منفرد اور قابلِ ذکر مانا جاتا ہے۔

اس ضمن میں "کوئل” کو سرفہرست رکھا جائے تو خواجہ خورشید انور کی سحر انگیز موسیقی، مسعود پرویز کی شان دار اداکاری اور ملکہ ترنم نور جہاں کی گلوکاری نے اس فلم کو زبردست اور کام یاب بنایا۔

میڈم نور جہاں نے اس فلم میں ایک کردار بھی نبھایا تھا، ان کے علاوہ اسلم پرویز، علاﺅالدین، اداکار نذر اور نیلو کی شان دار پرفارمنس آج بھی دیکھنے والوں کو یاد ہے۔

1956 میں فلم "انتظار” ریلیز ہوئی جسے لالی وڈ کی کام یاب ترین فلم کہا جاتا ہے۔ اس فلم کی موسیقی خواجہ خورشید انور نے ترتیب دی تھی اور گیت قتیل شفائی نے لکھے تھے۔ فلم کے ہدایت کار مسعود پرویز تھے۔

کہتے ہیں اس فلم کی فوٹو گرافی کمال کی تھی اور اس میں نور جہاں، سنتوش کمار، آشا پوسلے اور غلام محمد نے اپنی اداکاری سے شائقین کے دل موہ لیے۔

فلم بینوں کو سنتوش کمار کا ڈبل رول بہت پسند آیا اور انتظار نے گولڈن جوبلی مکمل کی۔ اعلیٰ درجے کی شاعری اور شان دار موسیقی کے ساتھ جان دار اداکاری کی وجہ سے پڑوسی ملک میں‌ بھی اس فلم کا خوب چرچا ہوا۔

1966 کی فلم "ارمان” پاکستان کی پہلی پلاٹینم جوبلی فلم ہے۔ وحید مراد اس کے فلم ساز اور ہدایت کار پرویز ملک تھے۔ اسے پاکستان بھر میں‌ سنیما بینوں نے پسند کیا اور اس فلم نے زبردست بزنس کیا۔

اس فلم کے گیت مسرور انور نے لکھے تھے جب کہ نام ور موسیقار سہیل رانا نے اس دھنیں‌ ترتیب دی تھیں۔ اداکارہ زیبا کے علاوہ فلم میں وحید مراد، نرالا اور ترنم نے اداکاری کے جوہر دکھائے اور شائقین کو متوجہ کیا۔

یہ رومانوی فلم تھی جس کے بعد وحید مراد کو ”شہنشاہ رومانس“ کہا جانے لگا۔ یہ لالی وڈ کی بہترین فلموں میں سے ایک ثابت ہوئی۔

اسی طرح آئینہ، زرقا اور امراؤ جان ادا نے شائقین ہی کے دل نہیں‌ جیتے بلکہ بزنس کے اعتبار سے بھی شان دار ثابت ہوئیں اور ان فلموں‌ میں کام کرنے والے اداکاروں نے ملک بھر میں نام کمایا۔