پاکستان شوبز اںڈسٹری کی معروف اداکارہ و ماڈل علیزے شاہ نے موت کی افواہوں پر خاموشی توڑ دی۔
علیزے شاہ ایک ایسی اداکارہ اور ماڈل ہیں جو بہت کم عمری میں ہی شوبز انڈسٹری میں اپنا نام بنا چکی ہیں، انہوں نے اپنے کیریئر کا آغاز ایک سپر اسٹار کی طرح کیا اور ڈرامہ عہد وفا کے ساتھ وہ پاکستان کی مقبول ترین اداکارہ بن گئی۔
اداکارہ نے کئی ہٹ ڈرامے کیے لیکن اسی دوران وہ بدقسمتی سے کئی تنازعات کا حصہ بن گئیں حال میں وہ اپنے لباس اور میوزک ویڈیوز کی وجہ سے تنقید کی زد میں رہی ہیں۔
علیزے شاہ نے چند روز قبل ہی اپنے انسٹاگرام اکاؤنٹ سے تصویریں ڈیلیٹ کرتے ہوئے سوشل میڈیا کو خیرباد کہا تھا، تاہم اب انہوں نے ایک اور اسٹوری شیئر کی ہے جس میں انہوں نے مداحوں سے درخواست کی ہے۔
علیزے شاہ کی تمام انسٹا پوسٹ ڈیلیٹ، سوشل میڈیا چھوڑنے کا عندیہ
علیزے شاہ نے کہا کہ ٹرولنگ، مستقل تنقید اور منفی رویے مجھے اب صرف جذباتی ہی نہیں بلکہ جسمانی طور پر بھی متاثر کر رہے ہیں، مجھے ان سب نے ایسی جگہ لا کر کھڑا کیا ہے کہ جہاں میں نے ناصرف سوشل میڈیا بلکہ اپنے ارد گرد افراد سے بھی خود کو علیحدہ کر لیا ہے۔
اداکارہ نے کہا کہ میں خود کو اس قدر ٹوٹا ہوا محسوس کر رہی ہوں کہ میں بیان بھی نہیں کر سکتی، میں نے سوشل میڈیا چھوڑنے کے بعد اپنی بائیو بھی اپ ڈیٹ کی ہے جہاں واضح الفاظ میں لکھا ہے کہ میں زندہ ہوں۔
اداکارہ کا کہنا ہے کہ کچھ نیوز چینل میرے والدین کو کال کر کے پوچھ رہے ہیں کہ کیا میں مرچکی ہوں، آپ تصور کریں کہ یہ میرے اور میری والدہ کےلیے کتنا تکلیف دہ ہے۔
علیزے شاہ نے بتایا کہ فی الحال مجھے کچھ نہیں معلوم کہ میں کب اور کیا انسٹاگرام اور ڈرامہ انڈسٹری میں واپس آؤں گی بھی یا نہیں، مجھ پر پریشر بہت زیادہ بڑھ گیا ہے۔
اداکارہ نے مزید کہا کہ میں آپ سب سے درخواست کرتی ہوں کہ مجھے میری پروائیویسی دیں اور میرے والدین کو کال نہ کریں، خدارا کہانیاں گھڑنا بند کر دیں اور مجھے سانس لینے دیں۔
