Tag: اداکار عامر خان

بالی ووڈ انڈسٹری میں 3 دہائیوں تک راج کرنے والے اداکار بالی ووڈ کے مسٹر پرفیکشنسٹ عامر خان نے انکشاف کیا کہ انہوں نے اپنی فیملی کے سامنے فلموں سے ریٹائرمنٹ کا اعلان کیا تھا لیکن بچوں نے ان سے فیصلے پر نظر ثانی کرنے کو کہا۔

حال ہی میں بھارتی میڈیا سے گفتگو کے دوران اداکار عامر خان نے فلموں  سے ریٹائرمنٹ کے اعلان اور اس فیصلے پر سابقہ اہلیہ کرن راؤ کے جذباتی ہونے سے متعلق گفتگو کی۔

عامر خان نے کہا کہ میں نے فلم لال سنگھ چڈھا کی شوٹنگ مکمل ہونے سے پہلے ہی ریٹائرمنٹ کا فیصلہ کرلیا تھا، کووڈ کے بعد مجھے احساس ہوا کہ 18سال کی عمر سے شروع ہونے والے کیرئیر میں، میری ساری توجہ سنیما اور فلموں پر ہی مرکوز رہی، اس دوران میں اپنی فیملی کو وقت ہی نہیں دے سکا یہاں تک کے اپنی سابقہ اہلیہ کو بھی وقت نہیں دے سکا۔

عامر خان نے کہا کہ کووڈ کے دوران میں ایسے جذباتی لمحوں سے گزرا جب میں  نے فیملی کو وقت نہ دینے کے سبب  خود کو مجرم محسوس کیا، میں نے فیصلہ کیا کہ  گزشتہ 35 سالوں کے دوران میں نے متعدد فلمیں کی ہیں لیکن اب وقت آگیا ہے کہ کچھ وقت فیملی کے ساتھ گزاری جائے۔

انہوں نے کہا کہ مجھے اس بات کی خوشی ہے کہ مجھے یہ احساس 88 سال کی عمر کے بجائے 57 سال کی عمر میں ہی ہوگیا کیوں کہ تب تک بہت دیر ہوچکی ہوتی۔

عامر خان نے کہا کہ جب میں ریٹائرمنٹ کی بات فیملی سے کی تو میرے بچوں سے مجھے ریٹائرمنٹ کے فیصلے پر دوبارہ سوچنے کو کہا اور میری سابقہ اہلیہ کرن راؤ تنہائی میں میرے پاس آئیں اور آبدیدہ ہوگیئں۔

عامر خان نے بتایا کہ کرن نے مجھ سے سوال کیا کہ کیا آپ ہمیں چھوڑ رہے ہیں؟ میں نے کہا، نہیں میں آپ کو نہیں بلکہ فلمیں چھوڑ رہا ہوں، جس پت مجھے کرن نے کہا کہ آ] ’ چائلڈ آف سینما‘ ہیں  اگر آپ فلمیں چھوڑ رہے ہیں تو آپ ہمیں چھوڑ رہے ہیں۔

عامر خان نے مزید بتایا کہ کرن راؤ نہیں چاہتی تھی کہ میں ہر وقت گھر میں رہوں، جس کے بعد میں نے 6 فلمیں اس لیے سائن کی ہیں کیونکہ میں ایک اداکار کے طور پر اپنی  زندگی کے آخری 10 سالوں کو سب سے زیادہ نتیجہ خیز بنانا چاہتا ہوں۔