عامر خان نے اپنی بیٹی ایرا کی شادی میں رقص نہیں کیا تھا جبکہ وہ اننت امبانی کی شادی میں باقی دونوں خانز کے ہمراہ محوِ رقص نظر آئے تھے۔
مسٹر پرفیکشنسٹ نے انسٹاگرام پر ایک ’آسک می اینی تھنگ‘ سیشن رکھا، اس دوران ایک مداح نے ان سے اننت امبانی کی شادی کی تقریبات میں رقص کرنے کے حوالے سے سوال کر ڈالا۔ اس کے جواب میں عامر خان نے دلچسپ انکشاف کیا۔
بالی وڈ اداکار کا کہنا تھا کہ ’میں نے اپنی بیٹی کی شادی میں بھی رقص کیا تھا‘۔ انھوں نے امبانی خاندان کے ساتھ اپنے تعلقات کے حوالے سے بتاتے ہوئے کہا کہ ’میں نے مکیش کی تقریبات میں پرفارم کیا کیونکہ وہ میرا عزیز دوست ہے۔
نیتا، مکیش، میں، اور ا ن کے بچے ہم ایک فیملی کی طرح ہیں۔ میں ان کے فنکشنز میں پرفارم کرتا ہوں اور وہ ہماری تقریبات میں پرفارم کرتے ہیں۔
عامر خان کا یہ بیان حقیقی دوستی کی خوبصورتی کو ظاہر کرتا ہے جو کہ امبانی فیملی اور ان کے درمیان ہے جس کا ثبوت وہ گزشتہ ہفتے دے بھی چکے ہیں۔
واضح رہے کہ ایشیا کے امیر ترین لوگوں میں شامل بھارتی بزنس ٹائیکون مکیش امبانی کے بیٹے کی شادی سے پہلے کی تقریبات میں بالی ووڈ خانز نے رقص کرتے ہوئے چار چاند لگا دیے تھے۔
بھارت کے شہر جام نگر میں اننت امبانی اور رادھیکا مرچنٹ کی شادی سے پہلے کی تقریبات میں دنیا بھر سے مختلف نامور شخصیات سمیت بالی ووڈ کے اسٹارز اور کھلاڑی شریک ہوئے تھے۔
ان تقریبات میں بالی ووڈ کے تین بڑے نام شاہ رخ خان، سلمان خان اور عامر خان نے ایک ساتھ رقص کیا تو حاضرین بھی جھوم اٹھے تھے۔
تینوں بالی ووڈ خانز نے اسٹیج پر ایک ساتھ ’ناچو ناچو‘ پر رقص کیا تھا جس سے ہال تالیوں سے گونج اٹھا، سوشل میڈیا پر اس رقص کی ویڈیو کافی وائرل ہوئی تھی۔
