ممبئی : بالی ووڈ فلم انڈسٹری کے نامور اداکار گووندا اور ان کی اہلیہ سنیتا آہوجا کی طلاق سے متعلق خبروں کا ڈراپ سین ہوگیا، سونیتا آہوجا نے صحافیوں کو کھری کھری سنادی۔
ایک مذہبی تقریب کے موقع پر میڈیا سے گفتگو کرتے ہوئے سنیتا آہوجا نے دوٹوک الفاظ میں گووندا کے ساتھ تعلقات کے بارے میں زیر گردش خبریں سختی سے مسترد کردیں۔
ان کا کہنا تھا کہ ایسی باتوں پر یقین نہ کیا جائے جب تک وہ خود کوئی اعلان نہ کریں۔ انہوں نے واضح کیا کہ گووندا صرف میرے ہیں۔
این ڈی ٹی وی کی رپورٹ کے مطابق سنیتا آہوجا نے مزید کہا کہ کوئی بھی طاقت مجھے اور گووندا کو ایک دوسرے سے جدا نہیں کر سکتی۔
View this post on Instagram
گووندا کی اہلیہ نے صحافیوں کے سامنے بھارتی میڈیا کی ساکھ کے پرخچے اڑا دیے انہوں نے کہا کہ ہم دونوں میاں بیوی کو ایک ساتھ اور اتنے قریب دیکھ کر کیا میڈیا کے منہ پر طمانچہ نہیں پڑا؟
سنیتا کا کہنا تھا کہ اگر کوئی مسئلہ ہوتا تو کیا ہم اتنے نزدیک ہوتے؟ دوری ہوتی، کوئی ہمیں الگ نہیں کر سکتا، چاہے اوپر سے کوئی بھی آ جائے، میرا گووندا صرف میرا ہے اور کسی کا نہیں۔
انہوں نے مسکراتے ہوئے صحافیوں سے مزید کہا کہ جب تک ہم خود کچھ نہ کہیں، براہ کرم آپ بھی کچھ نہ بولا کریں۔
بھارتی میڈیا رپورٹ کے مطابق بالی ووڈ اداکار گووندا اور ان کی اہلیہ سنیتا آہوجا نے گزشتہ روز ممبئی میں اپنی رہائش گاہ پر مذہبی تہوار کی تقریب کا انعقاد کیا تھا۔ جس کے بعد جوڑے کی علیحدگی کی خبروں کی بھی تردید ہوگئی ہے۔
تقریب کے موقع پر اداکار گووندا نے میرون رنگ کا کُرتا زیب تن کر رکھا تھا جبکہ ان کی اہلیہ سنیتا آہوجا نے بھی اسی رنگ کی ساڑھی پہن رکھی تھی۔
مزید پڑھیں : سنیتا آہوجا کا گووندا سے طلاق کیلیے عدالت سے رجوع
سوشل میڈیا پر وائرل ہونے والی ویڈیوز میں دونوں کو عقیدت کے ساتھ مذہبی رسومات ادا کرتے اور میڈیا کے نمائندوں میں مٹھائی تقسیم کرتے ہوئے دیکھا جاسکتا ہے۔
