ایپوہ: اذلان شاہ ہاکی ٹورنامنٹ میں قومی ٹیم کے ناقابل شکست رہنے کا سلسلہ برقرار ہے، پاکستان اور جاپان کے درمیان اہم مقابلہ برابر ہوگیا۔
تفصیلات کے مطابق سلطان اذلان شاہ ہاکی ایونٹ میں پاکستان اور جاپان کا مقابلہ 1-1 گول سے برابرہوگیا، جاپانی پلیئرز کی جانب سے پاکستانی گول پوسٹ پر کئی حملے کیے گئے، اس دوران جاپان تیسرے کوارٹرمیں گول اسکور کرنے میں کامیاب ہوگیا۔
پاکستانی پلیئرز نے بھی میچ برابر کرنے کے سرتوڑ کوششیں جاری رکھیں اور چوتھے کوارٹرکے اختتامی لمحات میں مقابلہ برابرکردیا۔ پاکستان کی جانب سے رانا وحید اشرف نے گیند کو جال کی راہ دکھائی۔
ایونٹ میں پاکستان ہاکی ٹیم کل اپنا چوتھا میچ کینیڈا کے خلاف کھیلے گی پاکستان ٹورنامنٹ میں اب تک دو میچز جیت چکا ہے۔
ابتدائی میچ میں قومی ٹیم نے میزبان ملائیشیا کو 4-5 سے شکست دی تھی جبکہ دوسرے میچ میں جنوبی کوریا جیسی ٹیم کو 0-4 سے آؤٹ کلاس کرتے ہوئے فتح اپنے نام کی تھی۔
