ARYNews.tv | Urdu – Har Lamha Bakhabar

Tag: اردن

  • اردن کی فضائیہ کا رات گئے حیران کن قدم، غزہ کے فیلڈ اسپتال کے لیے فضا سے طبی سامان گرا دیا

    اردن کی فضائیہ کا رات گئے حیران کن قدم، غزہ کے فیلڈ اسپتال کے لیے فضا سے طبی سامان گرا دیا

    عمّان: اردن کی فضائیہ نے رات گئے حیران قدم اٹھاتے ہوئے غزہ میں قائم اپنے فیلڈ اسپتال کے لیے فضا سے طبی سامان گرا دیا۔

    تفصیلات کے مطابق اردن کے شاہ عبداللہ دوم نے پیر کی صبح سوشل میڈیا پر ایک پوسٹ میں کہا کہ اردن کی فضائیہ نے غزہ میں مملکت کے زیر انتظام فیلڈ اسپتال کو ’فوری طبی امداد‘ فراہم کی ہے۔

    ایکس پر شاہ اردن نے کہا کہ ’’ہمارے نڈر فضائیہ کے اہلکاروں نے آدھی رات کو غزہ کے اردنی فیلڈ اسپتال کو فوری طبی امداد کی فراہمی کے لیے ہوائی جہاز سے سامان پھینکا۔‘‘

    انھوں نے کہا غزہ کی جنگ میں زخمی ہونے والے اپنے بھائیوں اور بہنوں کی مدد کرنا ہمارا فرض ہے، ہم اپنے فلسطینی بھائیوں کے لیے ہمیشہ موجود رہیں گے۔

    واضح رہے کہ اردن اور اسرائیل نے غزہ کی پٹی کے ایک فیلڈ اسپتال کو فوری طبی سامان کی فراہمی پر اتفاق کیا ہے، اسرائیل کی فوج نے پیر کے روز بعد میں ایک بیان میں کہا کہ اس نے اپنے عرب پڑوسی کے ساتھ فضا سے سامان گرانے پر اتفاق کیا ہے، جس میں طبی عملے اور مریضوں کے لیے ادویات اور خوراک بھی شامل ہے۔

    واضح رہے کہ گزشتہ ماہ عرب میڈیا نے اطلاع دی تھی کہ اسرائیلی بمباری کی وجہ سے سامان ختم ہونے پر اردن کے فیلڈ اسپتال کے بند ہونے کا خطرہ لاحق ہو گیا ہے۔

  • اردنی ریستوران کی پیشکش نے ملک میں ہلچل مچا دی

    اردنی ریستوران کی پیشکش نے ملک میں ہلچل مچا دی

    عَمّان: اردن میں ایک ریستوران نے خصوصی ڈش کے ساتھ ایک ایسی پیشکش کر دی ہے جس نے ملک میں ہلچل مچا دی۔

    عرب میڈیا اور سوشل میڈیا پوسٹس کے مطابق اردن کے دارالحکومت عمان میں چھ ماہ قبل کھلنے والے ایک ریستوران نے اپنی اسپیشل ڈش کے ساتھ ریستوران ہی میں سونے کی سہولت بھی فراہم کر دی ہے۔

    ریستوران کے مالک کے بیٹے عمر المبیضین کا کہنا تھا کہ المنسف ایک عوامی ڈش ہے، اس میں سیاح اور روایت پسند لوگ بے حد دل چسپی لے رہے ہیں، انھوں نے کہا کہ گاہک جب المنسف ڈش کھاتے ہیں تو ہم نے دیکھا کہ وہ تکان محسوس کرنے لگ جاتے ہیں، اور انھیں اونگھ آ جاتی ہے۔

    عمر نے بتایا کہ اس سے انھیں یہ خیال آیا کہ کیوں نہ گاہکوں کو یہ پیش کش کی جائے کہ المنسف ڈش کھانے والوں کو ریستوران میں سونے کی سہولت بھی دی جائے گی۔

    دل چسپ بات یہ ہے کہ اس معاملے کی شروعات ایک مذاق کے طور پر ہوئی تھی، عمر کے مطابق ان کا ریستوران چوں کہ المنسف ڈش کے لیے مشہور ہے، تو جب انھوں نے یہ پیشکش کی تو سوشل میڈیا پر یہ تیزی سے وائرل ہو گئی۔

    عمر المبیضین کا کہنا تھا کہ اس پیشکش کے بعد سے ریستوران کی مقبولیت میں بے پناہ اضافہ ہو چکا ہے۔

  • وزیر خارجہ بلاول بھٹو زرداری اردن اور عراق کے دورے پر روانہ

    وزیر خارجہ بلاول بھٹو زرداری اردن اور عراق کے دورے پر روانہ

    ترجمان دفتر خارجہ نے بتایا کہ پیپلز پارٹی کے چیئرمین اور وزیر خارجہ بلاول بھٹو زرداری اردن اور عراق کے دورے پر روانہ ہوگئے۔

    ترجمان دفتر خارجہ ممتاز زہرہ بلوچ کے مطابق دورے میں وزیر خارجہ بلاول بھٹو زرداری شاہی شادی میں شرکت کیلیے اردن جائیں گے۔

    اردن کے ولی عہد اور سعودی خاتون کی شادی کا 2 روزہ جشن شروع

    ترجمان دفتر خارجہ کا کہنا ہے کہ اردن سے وزیر خارجہ 5 سے 6 جون  تک عراق کا دورہ کریں گے،  دورے میں وزیر خارجہ عراقی ہم منصب اور قیادت سے ملاقاتیں کرینگے۔

    ترجمان دفتر خارجہ ممتاز زہرہ بلوچ نے بتایا کہ دورے کے دوران اہم معاہدوں پر دستخط بھی کیے جائیں گے۔

    ترجمان کا مزید بتایا تھا کہ وزیر خارجہ یہ دورہ عراقی نائب وزیر اعظم، وزیر خارجہ فواد حسین کی دعوت پرکر رہے ہیں۔

  • عام لوگ کھانے پینے سے زیادہ سگریٹ نوشی پر خرچ کر رہے ہیں

    عام لوگ کھانے پینے سے زیادہ سگریٹ نوشی پر خرچ کر رہے ہیں

    عمان: مشرق وسطیٰ کے ملک اردن میں لوگ کھانے پینے سے زیادہ سگریٹ نوشی پر خرچ کر رہے ہیں، اردن سگریٹ نوشوں کی تعداد اور سگریٹ نوشی پر اخراجات کے حوالے سے دنیا میں سرفہرست ہے۔

    عالمی ادارہ صحت (ڈبلیو ایچ او) کا کہنا ہے کہ اردنی باشندے دنیا بھر میں سب سے زیادہ سگریٹ نوشی کرتے ہیں۔

    عالمی ادارہ صحت کی رپورٹ میں بتایا گیا کہ اردن کے باشندے کھانے پینے سے کہیں زیادہ سگریٹ نوشی پر خرچ کر رہے ہیں۔

    ایک اردنی خاندان ماہانہ 150 ڈالر سے زائد سگریٹ نوشی پر خرچ کررہا ہے جبکہ پھلوں پر 36 ڈالر اور گوشت پر 70 ڈالر خرچ کیے جاتے ہیں۔

    اردن سگریٹ نوشوں کی تعداد اور سگریٹ نوشی پر اخراجات کے حوالے سے دنیا میں سرفہرست ہے۔

    عالمی ادارہ صحت عمان برانچ کی جانب سے جاری اعداد و شمار میں بتایا گیا ہے کہ اردن میں بالغ افراد (18 سے 69 سال) میں تمباکو نوشی کا تناسب 66.1 فیصد ہے۔

    اردنی سگریٹ، سگار، حقہ اور گرم تمباکو کی مختلف مصنوعات استعمال کر رہے ہیں جبکہ 15.9 فیصد ای سگریٹ استعمال کر رہے ہیں۔

    رپورٹ میں کہا گیا کہ اردن کے بالغ افراد میں نکوٹین کا مجموعی تناسب 82 فیصد تک پہنچ گیا ہے۔

    اردنی وزارت صحت کے مطابق ملک کے مختلف علاقوں میں تمباکو نوشی سے نجات حاصل کرنے کے خواہش مند افراد کی مدد کے لیے 26 سے زیادہ کلینک قائم کیے ہیں۔

    ان کلینکس میں تربیت یافتہ صحت عملہ تعینات ہے، سنہ 2022 کے دوران گیارہ ہزار سے زائد افراد نے ان کلینکس سے رجوع کیا۔

  • ’اسرائیل پر بم برسائے‘: وہ ملک جہاں صدام حسین آج بھی ہیرو ہے

    ’اسرائیل پر بم برسائے‘: وہ ملک جہاں صدام حسین آج بھی ہیرو ہے

    عمان: عراق میں صدام حسین کا اقتدار ختم ہوئے 20 سال گزر چکے ہیں، خود عراق تو اس آمر کو بھول جانا جاتا ہے، لیکن پڑوسی ملک اردن میں صدام حسین کی مقبولیت آج بھی عروج پر ہے۔

    20 مارچ 2003 کو اس وقت کے امریکی صدر جارج ڈبلیو بش نے عراق میں اسلحے کے ذخائر کی موجودگی کو جواز بنا کر عراق کی آزادی نامی آپریشن شروع کیا جس میں ڈیڑھ لاکھ امریکی اور 40 ہزار برطانوی فوجیوں نے حصہ لیا۔

    امریکی حملے کے بعد سنہ 1979 سے برسر اقتدار صدام حسین روپوش ہوگئے اور 8 ماہ بعد امریکی فوجیوں نے انہیں ڈھونڈ نکالا، ان پر مقدمہ چلا، انہیں سزا سنائی گئی اور 30 دسمبر 2006 کو انہیں پھانسی دے دی گئی۔

    عراق میں اب صدام حسین کی تصویر نمایاں کرنا یا ان کے حق میں نعرہ لگانا قابل گرفتاری جرم ہے۔

    لیکن اردن میں صورتحال مختلف ہے، یہاں آج بھی لوگ صدام حسین کی تصویر اپنے ساتھ رکھتے ہیں، صدام حسین کی تصویر پر مبنی اسٹیکرز اور موبائل کورز اردن کے نوجوانوں میں بھی بے حد مقبول ہیں۔

    دراصل اردن میں صدام حسین کو فلسطین کی حمایت، عرب قومیت پرستی اور مغربی تسلط کے خلاف ان کی صاف گوئی کی وجہ سے انہیں بے حد پسند کیا جاتا ہے۔

    صدام کا دور دیکھنے والے اکثر اردنی انہیں ایماندار عرب رہنما کے نام سے یاد کرتے ہیں۔

    خلیل عطیہ نامی شخص نے غیر ملکی خبر رساں ادارے سے گفتگو کرتے ہوئے کہا کہ صدام حسین فلسطین کی حمایت میں ایک توانا آواز تھے، انہوں نے نہ صرف فلسطینیوں کی حمایت کی بلکہ وہ فلسطینی شہدا کے خاندانوں کی مالی امداد بھی کرتے تھے، اور اسرائیلی حملوں میں تباہ ہوجانے والے گھر بھی تعمیر کروا دیا کرتے تھے۔

    خلیل کا کہنا تھا کہ صدام حسین واحد عرب لیڈر تھے جنہوں نے عسکری بیس قائم کیا، اور گولیوں سے لے کر میزائل بنائے جن میں سے 39 میزائل اسرائیل پر فائر کیے گئے۔

    انہوں نے کہا کہ صدام کے دور میں ہزاروں اردنی نوجوانوں نے عراقی جامعات سے وظیفے پر تعلیم حاصل کی، ’صدام کے بعد عراق رفتہ رفتہ تباہ ہوگیا‘۔

    دارالحکومت عمان کے رہائشی انس نہان کہتے ہیں کہ یہاں صدام حسین اس لیے بھی مقبول ہیں کیونکہ وہ پورے عرب خطے کی ترقی چاہتے تھے۔

    انس اپنی دکان پر صدام حسین کی تصاویر سے مزین موبائل کورز فروخت کرتے ہیں۔ وہ کہتے ہیں، ’آج اگر صدام حسین ہوتے تو بہت کچھ مختلف ہوتا، یمن اور شام پر بم نہ برسائے جارہے ہوتے، اور اسرائیل بھی اپنی حد میں رہتا‘۔

  • خاتون کو اپنا جنازہ پڑھوانے کی ضرورت کیوں پیش آئی؟

    خاتون کو اپنا جنازہ پڑھوانے کی ضرورت کیوں پیش آئی؟

    عمان: اردن میں ایک خاتون نے انشورنس کی رقم حاصل کرنے کے لیے مرنے کا ڈرامہ کیا اور اپنا جنازہ بھی پڑھوا لیا تاہم ان کی جعلسازی پکڑی گئی۔

    اردو نیوز کے مطابق اردن میں خاتون نے انشورنس کی رقم حاصل کرنے کے مرنے کا ڈرامہ کیا تاہم وہ ناکام ہوگیا، خاتون نے 3 انشورنس کمپنیوں سے 20 لاکھ ڈالر کی بیمہ پالیسیاں لے رکھی تھیں۔

    اردن کے ایک سکیورٹی اہلکار نے بتایا کہ وسیع البنیاد تحقیقات کے ذریعے خاتون کی جعلسازی کا سراغ لگا لیا گیا۔

    ملزمہ نے 2022 کے آخر میں کئی لوگوں کی مدد سے خود کو مردہ ظاہر کرتے ہوئے انشورنس کمپنیوں سے 20 لاکھ ڈالر بیمہ کی مد میں حاصل کر لیے تھے۔

    اردنی خاتون نے 3 انشورنس کمپنیوں میں لائف انشورنس اسکیم حاصل کی تھی، انہوں نے اکتوبر 2022 کے دوران اپنی فرضی موت کا اعلان کیا، ان کا باقاعدہ جنازہ بھی اٹھایا گیا اور گھر پر تعزیتی تقریب بھی منعقد کی گئی۔

    یہ سب کچھ وکلا کے ذریعے لائف انشورنس پالیسی کا کلیم حاصل کرنے کے لیے کاغذی کارروائی مکمل کروانے کے لیے کیا گیا تھا۔

    انشورنس کمپنیوں کے ماہرین کو خاتون کی فائل پر شک گزرا تھا، اس کی ایک بڑی وجہ یہ بھی تھی کہ خاتون نے انشورنس پالیسی کیش کروانے کے لیے میڈیکل فائل جمع نہیں کروائی تھی۔

    انشورنس کمپنی نے سیکیورٹی فورس سے رابطہ کیا، تفتیشی ٹیم نے خاتون کی موت کی حقیقت جاننے کے لیے کارروائی کی تو پتہ چلا کہ موت کا واقعہ فرضی ہے۔

    پولیس اہلکاروں نے وہ قبر بھی کھولی جس کے حوالےسے دعویٰ کیا گیا تھا کہ مذکورہ خاتون کی یہاں تدفین کی گئی ہے، کھدائی سے پتہ چلا کہ قبر میں خاتون کے بجائے پلاسٹک کا ایک کھلونا موجود ہے۔

    خاتون جن کا نام البتول ہے، نے مشرقی عمان کے پرائیویٹ اسپتالوں اور پوسٹ مارٹم سیکشن میں کام کرنے والے 8 افراد کے ساتھ سازباز کر کے انشورنس کمپنیوں کے ساتھ جعلسازی کی تھی۔

    ان میں سے 6 افراد کو گرفتار کرلیا گیا ہے جن میں خاتون کا باپ بھی شامل ہے جو شعبہ سیاحت سے منسلک ہے۔

  • تین عرب ممالک دنیا کے سب سے غصہ ور ممالک قرار

    گیلپ سروے کی ایک تازہ ترین رپورٹ میں انکشاف کیا گیا ہے کہ تین عرب ممالک ایسے ہیں جو دنیا کے سب سے غصہ ور ممالک ہیں۔

    عرب نیوز کے مطابق 2022 کے اختتام کے ساتھ بہت سے لوگوں نے راحت کی سانس ضرور لی ہے، تاہم کرونا وائرس کی عالمگیر وبا کی تھکاوٹ، علاقائی سیاسی جھگڑے، اور عالمی سطح پر معاشی تنزلی کے چیلنجز نے دنیا بھر کے لوگوں میں غصہ بڑھا دیا ہے۔

    گزشتہ سال ذہنی و معاشی پریشانیوں کا سال رہا، گیلپ کے مطابق پے در پے بحرانوں کی آمد سے دنیا بھر کے معاشروں میں غصے کا جذبہ بڑھا، تاہم تازہ سروے رپورٹ میں یہ انکشاف کیا گیا ہے کہ لبنان، عراق اور اردن ایسے تین عرب ممالک ہیں، جہاں دنیا بھر کے ممالک کی نسبت لوگوں میں سب سے زیادہ غصہ پایا گیا۔

    عالمی پیمانے پر سروے کرنے والے ادارے گیلپ کی تازہ ترین سالانہ گلوبل رپورٹ میں مشرق وسطیٰ کے تین ممالک لبنان، عراق اور اردن کو دنیا کے سب سے زیادہ غصے والے ممالک میں شمار کیا گیا ہے، جس کی بڑی وجہ سماجی و معاشی دباؤ اور اداروں کی ناکامی قرار دی گئی۔

    دنیا کے بیش تر ممالک میں اگر ایک طرف لاک ڈاؤن، سپلائی چین میں رکاوٹوں، اور سفری پابندیوں کا خاتمہ ہوا، تاہم دوسری طرف روس یوکرین جنگ کے باعث مہنگائی میں بھی شدید اضافہ ہو گیا ہے، اور خوراک اور ایندھن کی بڑھتی ہوئی قیمتوں نے دنیا کے غریب ترین طبقے کو سخت متاثر کر دیا ہے۔

    اس کے ساتھ اگر سیاسی عدم استحکام، بدعنوانی اور موسمیاتی تبدیلی کے مضر اثرات کو شامل کریں، تو گزشتہ سال دنیا بھر میں لاکھوں لوگوں کے لیے بڑھتی ہوئی بے چینی، بہت زیادہ غصے کے ساتھ مظاہروں اور پرتشدد بدامنی کا سال ثابت ہوا۔

    واضح رہے کہ گیلپ نے 2006 میں عالمی سطح پر ناخوشی کا سراغ لگانے کے لیے 122 ممالک سے ڈیٹا اکٹھا کرنا شروع کیا تھا، اور اس سروے میں 15 سال اور اس سے زیادہ عمر کی بالغ آبادی کو لیا گیا۔ سروے میں معلوم ہوا کہ گزشتہ سال لوگوں میں منفی جذبات یعنی ذہنی تناؤ، اداسی، غصہ اور جسمانی درد ریکارڈ بلندی پر پہنچے، عالمی سطح پر 41 فی صد بالغوں نے کہا کہ انھیں ’گزشتہ روز‘ تناؤ کا سامنا کرنا پڑا تھا۔

    مزید برآں گزشتہ دہائی میں عرب دنیا بڑے پیمانے پر مظاہروں، حکومت کے خاتمے، بدعنوانی، اسکینڈلز، جنگوں اور بڑے پیمانے پر نقل مکانی، علاقائی ترجیحات اور داخلی معاملات میں خلل سے پریشان رہی ہے۔

    سرفہرست ممالک

    تازہ ترین گیلپ گلوبل ایموشنز رپورٹ میں لبنان سرفہرست ملک رہا، جہاں 49 فی صد افراد نے بتایا کہ انھوں نے گزشتہ روز غصے کے احساسات کا سامنا کیا۔

    لبنان 2019 کے بعد سے اپنے اب تک کے بدترین مالیاتی بحران سے دوچار ہے، جس نے اپنی کرنسی کی قدر میں 95 فی صد کمی کر دی ہے اور زیادہ تر آبادی غربت کی لکیر سے نیچے چلی گئی ہے۔

    لبنان میں پارلیمنٹ کے مفلوج ہونے اور نئے صدر کا انتخاب کرنے سے قاصر ہونے کے باعث، ملک ادارہ جاتی بدعنوانی سے نمٹنے اور اپنے لوگوں کی تکالیف کو دور کرنے کے لیے ضروری اصلاحات نافذ کرنے میں ناکام رہا ہے۔ لاکھوں لبنانی ابھی تک اگست 2020 میں ہونے والے بیروت بندرگاہ کے دھماکوں کے صدمے میں ہیں۔

    بہت سے لبنانیوں نے خراب حالات کے باعث ملک چھوڑنے کا انتخاب کیا جن میں نوجوان اور ہنر مند کارکن شامل ہیں۔

    گیلپ سروے میں غصے کی درجہ بندی میں عراق 46 فی صد کے ساتھ چوتھے نمبر پر آیا ہے، عراق کو اکتوبر2021 کے پارلیمانی انتخابات کے نتیجے میں سیاسی مسائل کا سامنا کرنا پڑا۔

    اسی طرح اردن نے حالیہ برسوں میں بے روزگاری کی بلند شرح کی وجہ سے احتجاج کی صورت حال کا سامنا کیا ہے اور وہاں حالات کرونا وبا اور مہنگائی کی وجہ سے بدتر ہوئے ہیں۔ اردن مسلسل مہنگائی سے نبرد آزما ہے اور گیلپ سروے کے مطابق 35 فی صد کے ساتھ چھٹے نمبر پر آیا ہے۔

    گیلپ کی سروے میں ترقیاتی ماہرین کا کہنا ہے کہ ان حالات کو سامنے رکھتے ہوئےعلاقائی حکومتوں کو اسے سنجیدگی سے لینا چاہیے۔

  • اردن کے ولئ عہد اور سعودی منگیتر رجوہ خالد کے نکاح کی تاریخ کا اعلان

    عَمّان: اردن کے ولئ عہد اور سعودی منگیتر رجوہ خالد کے نکاح کی تاریخ کا اعلان ہو گیا۔

    سعودی گزٹ کے مطابق اردن کے ایوان شاہی نے کہا ہے کہ ولئ عہد شہزادہ الحسین بن عبد اللہ دوم کا نکاح ان کی سعودی منگیتر رجوہ خالد السیف سے یکم جون 2023 کو ہوگا۔

    اردن کے ولئ عہد حسین بن عبداللہ دوم نے گزشتہ اگست میں سرکاری طور پر سعودی شہری رجوہ السیف سے منگنی کی تھی، منگنی کی تقریب ریاض میں اردن کے بادشاہ عبداللہ دوم، ملکہ رانیہ اور دلہن کے خاندان کی موجودگی میں منعقد ہوئی تھی۔

    28 سالہ شہزادہ حسین برطانوی ملٹری اکیڈمی سینڈہرسٹ سے فارغ التحصیل ہیں، انھوں نے امریکا کی جارج ٹاؤن یونیورسٹی سے بین الاقوامی تاریخ میں ڈگری حاصل کی۔

    اردن کے ولئ عہد کی اعلیٰ تعلیم یافتہ سعودی خاتون سے منگنی

    دوسری طرف رجوہ 28 اپریل 1994 کو ریاض میں پیدا ہوئیں، سعودی عرب میں ہائی اسکول کے بعد وہ امریکا میں انجینئرنگ کی اعلیٰ تعلیم حاصل کرنے گئیں، انھوں نے امریکی یونیورسٹی سیراکیوس، نیویارک کی فیکلٹی آف انجینیئرنگ سے گریجویشن کی۔

  • اردن کے نئے کرنسی نوٹ پر پرندے کی تصویر کیوں؟

    عَمان: اردن نے کئی نئے کرنسی نوٹ جاری کیے ہیں، جن میں سے ایک دینار کے نوٹ پر ایک پرندے کی تصویر کا اضافہ بھی کیا گیا ہے۔

    اردنی میڈیا کے مطابق اردن کے مرکزی بینک نے پیر کو اعلان کیا کہ پانچ نئے کرنسی نوٹ جاری کیے گئے ہیں، ان میں پانچ، دس، بیس، پچاس اور ایک دینار کے نوٹ شامل ہیں۔

    سنٹرل بینک آف اردن کے مطابق کرنسی نوٹوں کا یہ پانچواں ایڈیشن ہے، نئے کرنسی نوٹ مارکیٹ میں بتدریج متعارف ہوں گے، جب کہ ایک دینار کے نوٹ مارکیٹ میں پیر سے گردش کرنے لگے ہیں۔

    نئے کرنسی نوٹ ہاشمی فرماں رواؤں کی تصاویر سے مزین ہیں اور ان پر نئے سیکیورٹی فیچرز بھی استعمال کیے گئے ہیں۔

    رپورٹس کے مطابق ایک دینار والے کرنسی نوٹ پر پرندے کی تصویر دی گئی ہے جو نیا اضافہ ہے، اردن میں یہ پرندہ العصفور الوردی السینائی (سینائی روز فنچ) کے نام سے معروف ہے اور یہ اردن کا قومی پرندہ ہے۔

    تاریخی آثار پیٹرا (جبل ہارون) کا کوہستانی علاقہ اس پرندے کا مسکن مانا جاتا ہے، اس کے گلابی رنگ کی وجہ سے اسے ملک کا قومی پرندہ منتخب کیا گیا ہے۔

    عرب روایات کے مطابق پیٹرا وہ جگہ ہے جہاں موسیٰ علیہ السلام نے اپنے عصا کے ساتھ ایک چٹان کو مارا اور اس سے پانی نکلا، اور جہاں موسیٰ علیہ السلام کے بھائی ہارون علیہ السلام مدفون ہیں۔

    مقامی ذرائع ابلاغ کے مطابق کرنسی نوٹ کو پرندہ شامل کرنے کے لیے دوبارہ ڈیزائن کیا گیا تھا، سینا کے علاقے کے روز فنچ کو اردن کے قومی پرندے کے طور پر اس لیے چُنا گیا تھا کیوں کہ اس کے اور پیٹرا (جبل ہارون) میں لگے سرخ ریت کے پتھروں میں رنگ کی مماثلت تھی۔

  • بیوی کی فرضی قبر پر ٹک ٹاک ویڈیو بنانے والا شوہر گرفتار

    بیوی کی فرضی قبر پر ٹک ٹاک ویڈیو بنانے والا شوہر گرفتار

    عمان: اردن میں اپنی بیوی کی فرضی قبر پر بیٹی کے رونے کی ویڈیو بنانے والے شہری کو پولیس نے گرفتار کر لیا۔

    عرب نیوز کے مطابق اردن میں پولیس حکام نے ایک ایسے شخص کو گرفتار کیا ہے جس نے سوشل میڈیا ویوز بڑھانے کے لیے بیوی کی فرضی قبر پر اپنی روتی ہوئی بیٹی کی ٹک ٹاک ویڈیو بنائی تھی۔

    وائرل ہونے والی ویڈیو میں لڑکی کو اداس اور روتے ہوئے دیکھا گیا، اور وہ اس جگہ کے قریب کھڑی تھی جہاں کلپ میں دعویٰ کیا گیا تھا کہ اس کی ماں دفن ہے۔

    فوٹیج سامنے آنے پر پولیس نے تحقیقات کا آغاز کیا اور پتا چلا کہ ویڈیو جعلی ہے، اور لڑکی کے والد نے اپنے آن لائن ناظرین کو بڑھانے کے لیے اسے بنایا تھا۔

    پبلک سیکیورٹی ڈپارٹمنٹ کے ترجمان عامر سرطاوی نے کہا کہ ویڈیو میں نظر آنے والی لڑکی کی شناخت ہو گئی ہے اور اس کی صحت اچھی ہے اور اس کی ماں زندہ ہے۔

    انھوں نے مزید کہا کہ لڑکی کے والد نے اعتراف کر لیا ہے کہ اس نے سوشل میڈیا پر ویوز بڑھانے کے لیے ایسا کیا تھا۔ سرطاوی کے مطابق لڑکی کو فیملی پروٹیکشن یونٹ کے حوالے کر دیا گیا ہے، اور حکام کی جانب سے اس کے والد کے خلاف ممکنہ قانونی کارروائی پر غور کیا جا رہا ہے۔