Tag: اردو بلاگ

تحریر: عمیر حبیب

کراچی، ایک ایسا شہر جس کی آبادی میں ایک عام اور محتاط اندازے کے مطابق ہر سال تین سے چار فی صد اضافہ ہو رہا ہے۔

قیامِ پاکستان سے پہلے یہاں میونسپل کارپوریشن کے ذریعے شہریوں کو سہولیات کی فراہمی کے ساتھ ساتھ ان کے مسائل کا نکالا جاتا رہا ہے اور بعد میں بھی ہر دور میں مقامی حکومتوں کے نظام کو کسی نہ کسی شکل میں جاری رکھا گیا، مگر سن 2000 میں لوکل باڈی سسٹم کو بہتر بناتے ہوئے شہر کی ترقی اور تعمیر میں اس کی اہمیت اور افادیت کو گویا تسلیم کیا گیا۔

اس دور میں مقامی نظامِ حکومت کے تحت شہر کو 18 ٹاؤنز میں تقسیم کیا گیا اور 178 کے قریب یونین کونسلوں کو فعال کیا گیا جس سے نہ صرف علاقائی سطح پر مسائل کو حل کیا جانے لگا بلکہ شہر میں کئی نئے پروجیکٹس پر کام شروع ہوا۔ ان میں 20 منزلہ آئی ٹی ٹاور ہو یا فلائی اورز، شہر میں نوکری اور روزگار کے کئی مواقع پیدا ہوئے اور بے روزگاروں‌ کی بڑی تعداد اس کے سہارے معاشی میدان میں خود کو مضبوط اور مستحکم کرنے لگی، لیکن سیاسی کھینچا تانی میں یہ نظام کہیں‌ پیچھے رہ گیا۔

آج یہ شہر سیاسی مداخلت سے پاک، بااختیار، تمام ضروری وسائل اور ہر قسم کی مشینری سے لیس لوکل حکومت چاہتا ہے اور بس۔

جس طرح علاقے کے اراکینِ اسمبلی کا کام قانون سازی اور دیگر شعبوں سے متعلق ہے اسی طرح شہری مسائل حل کروانا اور اس نظام کو جاری و ساری رکھنا عدلیہ کا نہیں بلکہ لوکل گورنمنٹ کا کام ہے۔

کراچی میں بڑھتا ہوا ٹریفک اور آمد و رفت بہت بڑی ذمہ داری ہے۔ ٹرانسپورٹ کا نظام اس وقت پرائیویٹ سیکٹر کے ہاتھوں میں ہے جب کہ اس حوالے سے لوکل سطح پر توجہ دینے کی اشد ضرورت ہے۔ اسی طرح بے شمار مسائل اور کام ہیں جو علاقائی سطح پر اور لوکل نظام کے تحت ہی مستقل بنیادوں پر اور طویل مدت کے لیے حل ہوسکتے ہیں۔

یورپ اور ترقی یافتہ دنیا کے ممالک کی خوش حالی کا راز اس کے لوکل نظام میں ہی چھپا ہے، جہاں ہر شہری اور علاقائی مسئلے کے حل کے لیے وفاقی، صوبائی حکومت یا عدالت سے رجوع نہیں کرنا پڑتا بلکہ میونسپل کارپوریشن میں صرف ایک درخواست دینے سے مسئلہ حل ہوجاتا ہے۔ اسی طرح ٹرانسپورٹ کا نظام بھی حکومت کے پاس ہے جو کبھی اور کسی قسم کے احتجاج کی نذر نہیں ہوتا۔

اگر ہمارے ملک میں عوامی امنگوں اور جذبات کو اہمیت دی جائے اور سیاسی میدان میں ہوا کا رخ دیکھ کر نیک نیتی سے بروقت فیصلہ کیا جائے تو کئی مسائل حل ہوسکتے ہیں۔ ایک چینی کہاوت ہے کہ "بلی چاہے سفید ہو یا کالی دیکھنا یہ چاہیے کہ چوہے پکڑ سکتی ہے یا نہیں۔”

موجودہ حکومت کی کوشش ہے اور دعویٰ بھی کہ وہ ملک کا نظام درست کرنے کی کوشش کررہی ہے اور ہر قسم کی خرابی دور کی جائے گی تو کیا ہی اچھا ہو کہ لوکل گورنمنٹ کے نظام کو مضبوط بنانے اور اسے اختیارات دینے کی طرف بھی قدم بڑھایا جائے جس کے تحت شہریوں کے بنیادی مسائل علاقائی سطح پر حل ہوسکیں۔ اس حوالے سے تمام سیاسی قیادتوں اور صوبائی حکومتوں کو سوچنا چاہیے تاکہ عوام کو ان کی دہلیز پر مسائل کا حل مل سکے۔

(بلاگر علم و ادب کے شیدا اور مطالعے کے عادی ہیں۔ سماجی موضوعات، خاص طور پر عوامی ایشوز پر اپنے تجربات اور مشاہدات کو تحریری شکل دیتے رہتے ہیں۔)

تحریر: کاشف شمیم صدیقی

مہمان نوازی کیا ہوتی ہے، کوئی ہمارے ہردل عزیز دوست قوی (ذوالقرنین) سے پوچھے۔ جوں ہی پتا چلا کہ بڑے بھائی کی فیملی امریکا سے کراچی آرہی ہے، لگے گھر کو سجانے سنوارنے۔

جن کمروں میں مہمانوں کو ٹھہرانا تھا اُن کے ساتھ ساتھ پورے گھر کو رنگ کروا دیا۔ فرنیچر بھی بدلوا دیا۔ کمروں کے ایئرکنڈیشنر اور گھر میں کھڑی گاڑی کی پرفارمنس کچھ مشکوک محسوس ہوئی تو مکینک کے حوالے کردیا۔ مہمانوں کی پسند کا خیال رکھتے ہوئے کچن کے حوالے سے بھی خوب تیاری کر لی گئی تھی۔

مہمان آئیں اور ’’رت جگے“ نہ ہوں، ایسا کیسے ممکن تھا! چناں چہ نہ صرف بہترین قسم کے خشک میوہ جات اور ماحول کو مزید پُرلطف بنانے کے لیے بڑوں اور بچوں کی تفریح اور پسند کا خیال رکھتے ہوئے غزلوں اور کارٹون فلموں کی سی ڈیز منگوا لی تھیں۔ غرض کہ اپنی طرف سے کوئی کسر نہ چھوڑی۔

پھر مہمان آئے، پورے تیس دن رہے اور پتا ہی نہیں چلا کہ کب وقتِ رخصت آیا، مہمان جب واپس امریکا جانے لگے تو بہت خوش اور مطمئن تھے۔ قوی اور اس کے گھر والوں نے واقعی کسی بھی قسم کی تکلیف اور پریشانی نہیں ہونے دی تھی، ہر دم اُن کا بھرپور خیال رکھا تھا۔ یہ سب دیکھ کر دل سے یہی دعا نکلی کہ اے خدا ہمیں بھی ایسی مہمان نوازی کی توفیق عطا فرما۔

رمضان المبارک کا چاند نظر آگیا تھا۔ عشا کی نماز کے بعد مبارک باد کا سلسلہ تھما تو سوچا قوی سے مل کر آجاؤں، کافی دنوں سے ملاقات نہیں ہو پائی تھی۔ ماہِ رمضان کی مبارک باد بھی دے دی جاتی اور خیریت بھی دریافت کرلیتا، بس یہی سوچ کر قدم اُس کے گھر کی طرف بڑھا دیے۔ وہ بہت خوش ہوا اور سلام دعا کے بعد بات چیت کا سلسلہ شروع ہوا!

اور سناؤ قوی! رمضان میں تو آفس کے اوقات کارِ کم ہو گئے ہوں گے، اب تو واپسی جلد ہو جایا کرے گی۔

ٹائمنگ کا تو کچھ خاص پتا نہیں کیوں کہ میں نے تو آفس سے ایک ماہ کی رخصت لے رکھی ہے۔ اس نے جواب دیا۔

اچھا۔۔ وہ کیوں، سب خیریت تو ہے؟

ہاں، سب خیریت ہی ہے۔ صدیقی سچ پو چھو تو مجھ سے روزے رکھ کر آفس نہیں جایا جاتا، نقاہت سی رہتی ہے سارا دن، کسی کام میں دل نہیں لگتا، (چالیس
سال کی عمر میں اچانک رمضان کے موقع پر پیدا ہوجانے والی یہ کم زوری سمجھ سے بالا تر تھی۔)

لیکن گھر میں رہ کر بھی تو تم بوریت ہی محسوس کرو گے۔ میں نے بات جاری رکھتے ہوئے کہا۔

آں۔ نہیں شاید وقت گزرنے کا اتنا پتا نہ چلے۔

وہ کیسے؟ میں نے پُر تجسس انداز میں دریافت کیا۔

بھائی! دن بھر کوئی کام کاج تو ہو گا نہیں، تو سوچا ہے کہ فجر پڑھ کر سو جاؤں گا، اور پھر جب شام کو سو کر اُٹھوں گا تو عصر سے پہلے ظہر کی نماز بھی
پڑھ لوں گا۔

کیا مطلب۔ تم صبح سے شام تک سوتے ہی رہو گے۔ میں نے کافی حیرت سے پوچھا تھا۔

تو جاگ کر کرنا بھی کیا ہے۔ جواب انتہائی معصومانہ تھا۔

اور عصر کے بعد کا کیا پروگرام ہے۔ کیا پھر سو جاؤ گے۔ نہ چاہتے ہوئے بھی میرے لہجے میں طنز تھا۔

ارے نہیں یار، عصر سے مغرب کا وقت تو صرف دیکھنے، دیکھنے کا ہوتا ہے، اور پھر بازار جا کر اپنے لیے افطار کا سامان بھی تو لانا ہوتا ہے۔

کیوں۔۔ گھر میں کچھ نہیں بنتا؟

اب مجھ اکیلے کے لیے بھلا کیا بنے گا!

اکیلے کیوں۔ بھابھی اور بچے بھی تو ہیں۔

تم تو جانتے ہی ہو بھابھی تمہاری شوگر کی مریض ہیں، اس لیے روزے نہیں رکھتیں، اور بچوں کا تو پوچھو ہی مت، ہر تین، چار گھنٹے بعد اگر کھانے کو کچھ نہ ملے تو بس آپے سے ہی باہر ہو جاتے ہیں۔

تو سمجھاؤ اُنہیں، کچھ احساس دلاؤ۔

ارے، بہت بگڑے ہوئے ہیں، لاکھ سمجھایا لیکن مجال ہے جو کسی کی سن لیں، اب تو میں نے کہنا ہی چھوڑ دیا ہے۔ قوی نے نہایت صفائی سے اپنا دامن بچایا تھا۔

قوی میں نے سوچا ہے کہ اس بار تراویح تمہاری طرف والی مسجد میں ادا کی جائے، اس طرح کچھ واک بھی ہو جائے گی اور واپسی پر ہم ساتھ پان بھی کھا لیا کریں گے۔

یار صدیقی، پان تو میں تمہارے ساتھ ضرور کھاتا، لیکن اب کیا بتاؤں کہ افطار کے بعد ایسا پیٹ پھولتا ہے کہ کہیں آنے، جانے کی ہمت باقی نہیں رہتی، دل چاہتا ہے کہ بس لیٹا ہی رہوں۔

تو پھر عشا کی نماز اور تراویح؟؟

اب ایسی حالت میں تراویح پڑھنا تو ممکن نہیں ہوگا البتہ عشا کی نماز میں گھر پر ہی ادا کر لوں گا۔ قوی نے نظریں چُراتے ہوئے اپنی بات مکمل کی تھی۔

رمضان میں قوی کے اس پروگرام پر حیرت کی جائے یا افسوس، بس یہی سوچتے ہوئے میں نے اُس سے اجازت چاہی اور گھر واپس آگیا۔

دو مہمانوں کی مہمان نوای میں یہ واضح تفریق یقینا ایک سوالیہ نشان تھی۔ خالق کائنات کے بھیجے گئے خاص اور اہم مہمان کی بخوشی واپسی اتنی غیر اہم کیوں تھی؟ کیوں دوسرے مہمان کی حرمت، عزت اور حق ادائیگی کا خیال نہیں رکھا جا رہا تھا؟ یہ سب سوچتے ہوئے دل سے یہ دعا بھی نکلی کہ اے خدا ہمیں ایسا میزبان بنا دے کہ آنے والے ہر مہمان کی مہمان نوازی اس طرح کریں کہ سب اپنی واپسی پر ہم سے نہال ہوں۔

(کاشف شمیم صدیقی شاعر اور کالم نگار ہیں، کراچی یونیورسٹی سے معاشیات میں ماسٹرز کی ڈگری حاصل کر چکے ہیں، شعبہ صحافت سے وابستگی کو اپنی زندگی میں پیدا ہونے والی مثبت تبدیلیوں کا موجب گردانتے ہیں۔)

تحریر: شیر بانو معیز

دنیا بھر میں حکومتیں لاک ڈاؤن کی مدت میں اضافہ کرنے پر مجبور ہیں اور سماجی فاصلہ برقرار رکھتے ہوئے اس حوالے سے بہت احتیاط کرنے پر زور دیا جارہا ہے۔

کرونا کی وبا اور اس کے نتیجے میں پیدا ہونے والی صورتِ حال سے نمٹنے کے لیے پاکستان میں ٹیلیتھون کا سلسلہ شروع کیا گیا ہے۔ اس دوران وزیرِاعظم پاکستان عمران خان نے جن نکات کی طرف توجہ دلائی ہے، وہ بہت اہم اور قابلِ غور ہیں۔
ٕ
وزیرِاعظم نے کرونا سے متعلق اور موجودہ صورتِ حال میں جو باتیں کی ہیں ان کا مفہوم کچھ یوں ہے کہ لاک ڈاؤن ہو یا نہ ہو کرونا کے ساتھ جینے کی عادت ڈال لینی چاہیے۔ یہ بات صرف وزیراعظم عمران خان نہیں کہہ رہے ہیں بلکہ دنیا کے بڑے بڑے اداروں کے سائنس داں اسی نتیجے پر پہنچے ہیں کہ کرونا کے بعد بھی حالات کچھ اسی قسم کے رہیں گے۔ کورنٹائن میں زندگی گزارنے کا جو سلسلہ شروع ہوا ہے، اس سے اگلے دو سال بعد بھی جان نہیں چھوٹے گی۔

ہارورڈ یونیورسٹی کے ماہرین کے مطابق دنیا کرونا کی ایک اور لہر کا سامنا کرسکتی ہے، لہذا سماجی دوری کو اگلے دو سال تک برقرار رکھنا ہو گا۔ عالمی ادارہ صحت بھی لاک ڈاؤن کو باقاعدہ حکمتِ عملی کے تحت ہی اٹھانے پر زور دے رہا ہے تاکہ شعبہ صحت پر بوجھ نہ پڑے اور زندگی بتدریج معمول پر آسکے۔ لیکن پاکستان کی بات کریں تو اس وقت لوگ ایک نئی کشمکش کا شکار ہیں۔ سمجھ نہیں آ رہا کہ ڈاکٹر کی سنیں، حکومت کی یا علما کی۔ ڈاکٹروں اور علما کا مؤقف تو پھر بھی کچھ حد تک واضح ہے، لیکن وفاق اور صوبائی حکومتوں کے مابین اتفاق کا فقدان ہے۔

ماہِ رمضان میں حکومتی ہدایات اور بیس نکاتی ایس او پیز کے تحت مساجد کھولی گئیں ہیں، لیکن معلوم نہیں کہ ان ایس او پیز پر عمل کون اور کیسے کرائے گا۔ یہی سوال جب وزیراعظم سے کیا گیا تو کچھ کہے بغیر سب کچھ کہہ گئے۔ ان کا کہنا تھاکہ خواہش تو یہی ہے کہ لوگ گھروں میں نماز پڑھیں، لیکن یہ قوم ماننے والی نہیں۔ ڈاکٹروں کے مطابق اب تک پچاس ہزار لوگوں کو تو کرونا ہو ہی جانا چاہیے تھا، لیکن لاک ڈاؤن کے باعث بچت ہوگئی۔ لہذا اٹلی جیسی صورتِ حال پیدا کرنے کی کوشش نہ کریں۔ ڈاکٹروں نے گویا حکومتِ سندھ کی پالیسی کی تائید کی، لیکن باقی صوبوں کا کیا، الغرض کس کی نہ سنیں، کس کی نہیں۔

یہ جان لیں کہ اس وبا سے بچنے کا واحد راستہ ہے احتیاط۔ صرف حکومت، ڈاکٹر اور علما اس سے اُس وقت تک نہیں بچا سکتے جب تک انفرادی سطح پر احتیاط لازم نہ کر لی جائے۔ گھر سے زیادہ کوئی مقام محفوظ نہیں جہاں سماجی دوری ممکن ہو، چاہے وہ عبادت گاہ ہو یا اسپتال۔ بلا ضرورت کہیں بھی جانے سے گریز کریں۔ نزلہ زکام جسے پہلے ہم نظر انداز کر دیتے تھے، اب نہیں کرسکتے۔ نزلہ زکام اور سانس سے متعلق طبی مسئلے کی علامات ظاہر ہوں تو ڈاکٹر سے آن لائن ڈاکٹر رجوع کریں اور دوا لیں۔ اس حوالے سے مختلف ذرایع سے معلومات اور آگاہی حاصل کی جاسکتی ہے، لیکن صرف اس سے بات نہیں بنے گی بلکہ احتیاط اور ہدایات پر عمل کر کے ہی محفوظ رہا جاسکتا ہے۔

تحریر: عمیر حبیب

دیارِ غیر میں بسنے والے کسی بھی پاکستانی کی طرح ہم نے بھی صرف اپنا وطن ہی نہیں چھوڑا تھا، کئی راحتوں، آسائشوں، سہولیات کو اور سب سے بڑھ کر اپنوں کو چھوڑا اور ان سے بہت دور یہاں پُرتگال آ بسے۔ اس سفر اور نئی دنیا بسانے کے شوق میں ہم نے یقینا بہت کچھ کھویا، مگر حوصلہ نہیں۔ ہر قسم کے حالات کا مقابلہ کیا، ہمت کی اور آج اپنی لگن اور محنت سے یہاں اپنی جگہ بنا رہے ہیں۔

پاکستان ہو یا پرتگال اور اسی طرح دیگر ممالک ہر جگہ مختلف نوعیت کے مسائل اور مشکلات کا سامنا کرنا پڑتا ہے۔ پرتگال اور پرتگالیوں کے بھی اپنے مسائل اور مشکلات ہیں، لیکن یہاں خاص طور پر کرونا جیسی وبا کے دنوں میں ایک خوش گوار تجربہ ہوا۔

پرتگال کا سوشلسٹ طرز حکومت ہمارے نظامِ حکومت سے بالکل الگ ہے۔ ہمارے وطن پاکستان کا سیاسی نظام اور سماجی ڈھانچا دنیا سے کچھ الگ ہی ہے۔ کراچی کی بات کریں تو اگر کبھی رات گئے سنسنان سڑک پر ہماری گاڑی خراب ہو جائے تو یقین جانیے کسی جن بھوت کا سوچ کر نہیں، ڈاکو اور لٹیرے کے روپ میں ظاہر ہونے والے اپنے ہی جیسے کسی انسان کے ڈر سے ٹانگیں کانپنے لگتی ہیں، خوف کے مارے پسینے چھوٹ سکتے ہیں۔ اس وقت گھر پر فون لگانے کی کوشش کی جاتی ہے، بھائی یا کسی دوست کا نمبر ملا کر اس سے مدد کی درخواست کرنا پڑتی ہے، اور ان میں سے کسی کے آنے پر گاڑی کو دھکا لگا کر یا کھینچ کر (Tow) گھر پہنچاتے ہیں، اور پھر اگلے روز گاڑی میکنک کے پاس لے جاؤ۔

کراچی میں رات کے وقت گاڑی سڑک پر خراب ہو جائے تو آپ کو یا تو جان جانے کا ڈر ہوتا ہے یا مال جانے کا، مگر یہاں پرتگال میں گاڑی خراب ہوجائے تو کچھ الگ ہی مسئلے کا سامنا کرنا پڑتا ہے۔

گزشتہ دنوں لزبن میں جب ہم متعدد کوششوں کے باوجود اپنی گاڑی اسٹارٹ کرنے میں ناکام رہے تو مکینک سے رابطہ کیا۔ اس نے ہماری راہ نمائی کرتے ہوئے بتایا کہ جب بھی آپ کی گاڑی خراب ہو جائے تو آپ گاڑی میں بیٹھ کر سب سے پہلے متعلقہ انشورنس کمپنی کو فون کریں، اپنی لوکیشن بتائیں، گاڑی کے خراب ہونے کی وجہ، اور چند ضروری سوالات کے جواب دیں۔ وہ آپ کا نام، مکمل پتا، گاڑی کا نمبر وغیرہ پوچھیں گے، ساتھ ہی قریبی کسی مکینک کا پتا بھی، اس کے بعد گاڑی سے باہر نکل کر پیلی جیکٹ پہن لیں، اور وہ وارنگ سائن بورڈ جو ہر گاڑی میں لازمی ہوتا ہے، گاڑی کے پیچھے کچھ فاصلہ پر رکھ دیں۔ منٹوں میں مددگار آپ تک پہنچ جائیں گے اور بس باقی کام ان کا۔ اب آپ گاڑی کی طرف سے بے فکر ہوجائیں۔

چند روز بعد چابی آپ کے ہاتھ میں ہو گی اور آپ گاڑی میں بیٹھے سفر کر رہے ہوں گے۔

یہ شہریوں کو سہولت دینے اور ان کے بعض عام مسائل حل کرنے سے متعلق صرف ایک مثال ہے، باقی بہت سی چیزیں ہیں جو یہاں آپ کی زندگی کو پُرسکون بناتی ہیں۔ اگر ایسا کوئی نظام اور سہولت ہمارے ملک کے شہروں میں بھی عام ہوجائے تو کیا بات ہے۔

(بلاگر بسلسلہَ روزگار پرتگال کے شہر لزبن میں مقیم ہیں)

تحریر: سائرہ فاروق

عالمی وبا سے متعلق معلومات کا حصول شہروں میں رہنے والوں کے لیے آسان ہے اور اسی طرح دور دراز علاقوں میں بسنے والوں کی نسبت علاج یا اسپتال تک رسائی بھی۔

ٹیلی ویژن اور اخبار کی صورت میں نشر و اشاعت کے علاوہ سوشل میڈیا کے ذریعے آگاہی دی جارہی ہے مگر دور دراز کے قصبوں اور دیہات کے باسیوں کے لیے بَروقت اور مستند معلومات کا حصول مشکل ہی نہیں کافی حد تک ناممکن بھی ہے، کیوں کہ بہت سے دیہات ایسے بھی ہیں جہاں رہنے والوں کو انٹرنیٹ ٹیکنالوجی میسر ہے اور نہ وہاں بجلی کی سہولت ہے۔ اسی لیے ٹی وی جیسی عام مشین سے استفادہ کرنا بھی آسان نہیں۔

ایسے میں کسی پڑھے لکھے اور ذمہ دار شہری کا گاؤں دیہات میں جا کر معلومات اور آگاہی دینا بے حد ضروری ہے، لیکن مصیبت یہ ہے کہ سوشل ڈسٹینسنگ یا سیلف آئسولیشن جیسی اصطلاحات کو دیہاتیوں کے سامنے رکھنا بھی ایک اور الجھن ہے کہ وہ ان احتیاطی تدابیر کو سمجھ ہی نہیں پاتے۔ ہاتھ نہ ملانا، گلے نہ ملنا، گھر میں خود کو محدود کرنا وہ احتیاطی تدابیر ہیں جو ان کے لیے نہ صرف عجیب و غریب ہیں بلکہ من گھڑت اور اکثر دیہاتیوں کے لیے اغیار کی سازش ہیں۔

ایسے موقع پر لوگوں میں مذہب نہیں بلکہ شدت پسندی زیادہ سَر اٹھاتی ہے، اس لیے ایسی بیماریوں کا علاج جھاڑ پھونک سے کرنا چاہتے ہیں۔

اس کے علاوہ مذہبی احکامات اور تعلیمات سے ناواقفیت اور محدود علم کی وجہ سے بھی مسائل پیدا ہوتے ہیں۔ اکثر لوگ مصافحہ نہ کرنے کو برا تصور کررہے ہیں۔ اسی طرح ان کا سوال ہے کہ گلے کیوں نہ ملیں؟ حسنِ معاشرت کا مظاہرہ کیوں نہ کریں؟

انہیں یہ سمجھانا مشکل ہے کہ اسی دین نے بتایا ہے کہ مومن کی حرمت کعبہ کی حرمت سے زیادہ ہے، لہٰذا پہلے اپنی جان کی حفاظت ضروری ہے۔ اس حوالے سے ملک بھر کے نہایت قابلِ احترام اور جید علما اور مفتیانِ کرام کے وعظ اور ان کی تلقین بھی ہم تک پہنچ چکی ہے۔

دوسرا شمالی علاقہ جات میں سیاحوں کی آمد پر پابندی کا سوچا جا رہا ہے، اور یہ سلسلہ ویسے ہی کم ہوچکا ہے، مگر سوال یہ ہے کہ ان علاقوں میں لوگوں کے سبزی فروٹ اور دوسرے کاروبار ہیں اور جب یہ دکان دار خریداری کے لیے شہر آتے ہیں تو کیا واپسی پر اس بات کا امکان نہیں کہ وہ وائرس کا شکار ہوکر اپنے علاقوں میں لوٹیں اور جب اپنے گھروں، دکانوں کا رخ کریں تو کئی لوگوں اس وائرس سے متاثر کریں۔ سو، صرف سیاحوں پر پابندی سے تو یہ مسئلہ حل نہیں ہو گا۔

اس بات کو بھی پیشِ نظر رکھنا ہو گا کہ گاؤں میں سرکاری دفاتر، کارخانے وغیرہ نہیں کہ وہاں کے اکثر لوگ ملازمت پیشہ ہوں اور ماہ وار تنخواہ پاتے ہوں، یہاں زیادہ تر لوگ دیہاڑی دار اور مزدور ہیں جن کی آمدنی اور وسائل بہت کم ہیں۔ ان کے پاس رقم کا جمع جوڑ بھی نہیں کہ ماہ دو ماہ کام چلا لیں۔

ایسی صورت میں اگر یہ وائرس ان علاقوں میں پھیلتا ہے تو اس کا ٹیسٹ کروانا بھی غریب کی پہنچ سے باہر ہے اور وہ خود کو گھروں تک بھی محدود نہیں رکھ سکتے۔ یہاں غربت اتنی زیادہ ہے کہ لوگ دو وقت کی روٹی کا انتظام کرلیں یا شہر جاکر علاج معالجہ کروائیں، لہذا وہ ایسی خبروں پر یقین نہیں کرتے اور احتیاطی تدابیر کو اہمیت نہیں‌ دے رہے۔

ان تمام مسائل کو مدنظر رکھتے ہوئے آگاہی دینے کا سب سے بڑا پلیٹ فارم مسجد ہے جہاں کے امام کو بہت عزت اور احترام حاصل ہوتا ہے اور لوگ ان کی بات کو اہمیت دیں گے۔

حکومت اور انتظامیہ ان سے رابطہ کرے اور امام اور مقامی علما خاص طور پر لوگوں کو احتیاطی تدابیر اختیار کرنے کی تلقین کریں تو فائدہ ہوسکتا ہے۔

دوسرا ذریعہ ریڈیو ہے جو گاؤں میں ہر خاص و عام کے پاس ہوتا ہے اور ریڈیو نشریات بہت شوق سے سنی جاتی ہیں۔ ریڈیو چینلوں پر کورونا وائرس سے متعلق معلومات اور آگاہی دیتے ہوئے اس سے بچاؤ کے لیے ہدایات دی جاسکتی ہیں۔

اس طرح شہروں اور دور دراز کے سیاحتی علاقوں اور دیہات میں بھی زندگیوں کو محفوظ بناتے ہوئے کورونا وائرس کا پھیلاؤ روکا جاسکتا ہے۔