Tag: اردو نقاد

ڈاکٹر محمد علی صدیقی اردو کے صفِ اوّل کے نقادوں میں سے ایک تھے۔ان کی ادبی زندگی کا آغاز 1950ء کے عشرے میں ہوا اور وہ پاکستان، بھارت ہی نہیں بلکہ مشرقِ وسطیٰ، یورپ اور امریکا میں بھی ان کا علمی اور ادبی کام زیرِ بحث آیا۔ محمد علی صدیقی ادب میں ترقی پسند اقدار کے علم برداروں‌ میں سے ایک تھے۔ آج ان کی برسی ہے۔

محمد علی صدیقی ممتاز ترقی پسند نقاد ہی نہیں ایک ماہرِ تعلیم بھی تھے۔ وہ انگریزی زبان میں‌ کالم نگاری بھی کرتے رہے۔ ڈاکٹر صدیقی بوقتِ وفات 75 برس کے تھے۔ 2013ء میں آج ہی کے دن وفات پانے والے محمد علی صدیقی کراچی کے سخی حسن قبرستان میں آسودۂ خاک ہیں۔

اردو تنقید کے حوالے سے ڈاکٹر صاحب کا نام پاکستان اور بھارت میں‌ بھی بے حد احترام کے ساتھ لیا جاتا ہے۔ وہ ایک ایسے اہلِ قلم اور ذی علم تھے جنھیں‌ ترقی پسند ادب کے حوالے سے ایک نسل کا راہ نما بھی سمجھا جاتا ہے۔ صحافت، تدریس اور علم و ادب کے شعبوں میں ڈاکٹر صدیقی نے چالیس سال تک گراں قدر خدمات انجام دیں۔ وہ کراچی یونیورسٹی میں تدریس کے فرائض انجام دیتے رہے۔ اس کے علاوہ قائداعظم اکیڈمی کراچی، میں بہ طور ڈائریکٹر کام کیا۔ اس کے علاوہ مختلف جامعات میں‌ ڈین فیکلٹی رہے۔

ڈاکٹر محمد علی صدیقی 1938 میں ہندوستان کے شہر امروہہ میں پیدا ہوئے۔ قیام پاکستان کے بعد وہ اپنے خاندان کے ساتھ کراچی آگئے اور یہاں عیسائی مشن اسکول میں ابتدائی تعلیم حاصل کی۔ ڈی جے سائنس کالج سے 1953 میں انٹرمیڈیٹ کے بعد انگریزی ادب میں ماسٹر اور مطالعہ پاکستان میں پی ایچ ڈی کی ڈگریاں کراچی یونیورسٹی سے حاصل کیں۔ ڈاکٹریٹ کے بعد ایک عرصہ گزار کر 2003 میں اسی موضوع پر ڈی لیٹ کی۔ وہ اس موضوع پر پی ایچ ڈی اور ڈی لیٹ کرنے والے پہلے فرد تھے۔

ڈاکٹر محمد علی صدیقی کو اردو کے علاوہ انگریزی، فارسی اور مقامی زبانوں‌ میں‌ بھی مہارت حاصل تھی۔ وہ پاکستان اور بیرون ملک کئی اہم ادبی تنظیموں کے رکن تھے۔ ڈاکٹر صاحب کو برطانیہ، کینیڈا اور ناروے کی جامعات میں لیکچر کے لیے مدعو کیا جاتا تھا۔ ڈاکٹر محمد علی صدیقی نے سو سے زیادہ ریسرچ آرٹیکلز تحریر کیے۔ وہ پاکستان کے انگریزی روزنامہ میں ’ایریل‘ کے نام سے ادبی اور سماجی کالم لکھتے رہے۔ ڈاکٹر صاحب کی سولہ کتابوں میں‌ دو کتابوں توازن، اور کروچے کی سرگزشت کو سال کی بہترین کتابوں کا ایوارڈ بھی دیا گیا۔ انھیں‌ 2003 میں پرائڈ آف پرفارمنس سے نوازا گیا تھا۔

ڈاکٹر صدیقی شروع ہی سے ترقی پسند فکر کے حامل اور اس تحریک سے وابستہ رہے۔ انھوں‌ نے تنقیدی مضامین اپنے زمانۂ طالب علمی سے ہی لکھنا شروع کردیا تھا۔ وہ ایک وسیع المطالعہ ادیب اور زبردست نقّاد تھے۔

احتشام حسین ہندوستان سے تعلق رکھنے والے ادیب، مارکسی نقاد، شاعر اور مترجم تھے۔ آج احتشام حسین کی برسی ہے۔ وہ یکم دسمبر 1972ء کو الہ آباد میں وفات پاگئے تھے۔

احتشام حسین 21 اپریل 1912ء کو اتر پردیش کے ضلع اعظم گڑھ کے ایک قصبے میں پیدا ہوئے تھے۔ 1936ء میں الہ آباد سے ایم اے کیا اور لکھنؤ یونیورسٹی میں اردو کے لیکچرر ہوگئے۔ بعد میں الہ آباد یونیورسٹی میں اردو کے پروفیسر کی حیثیت سے ذمہ داریاں نبھائیں۔ ان کا ادب سفر نظریاتی حوالے سے ترقی پسند تحریک سے جڑا رہا۔ ان کے تنقیدی مضامین اور تخلیقی کاموں پر مشتمل متعدد کتب اشاعت پذیر ہوئیں۔

اردو زبان و ادب کی اس ممتاز شخصیت کے فن اور ان کے نظریات پر اپنے وقت کے معروف ادیب، شاعر اور نقاد ڈاکٹر شارب ردولوی نے طویل  مضمون رقم کیا تھا جو نیا دور، لکھنؤ کے شمارے میں احتشام حسین کی وفات کے بعد شایع ہوا تھا۔ اس مضمون سے چند اقتباسات پیشِ خدمت ہیں۔ 

اردوتنقید کی اسی روایت کو جس کا پودا حالی نے لگایا تھا احتشام حسین نے آگے بڑھایا اور اسے ایک فن کی صورت دی۔

ادب کی تفہیم، پرکھ اور تنقید کے سلسلے میں جس نظریے نے سب سے زیادہ مقبولیت اور اعتبار حاصل کیا وہ ادب کا سماجی نظریہ تھا۔ اردو میں اس نطریے کو سب سے زیادہ تقویت احتشام حسین کی تحریروں سے ملی، انہوں نے پچھلے تیس سال میں اپنی نظریاتی تنقید اور عملی تنقید دونوں میں پورے خلوص کے ساتھ اس نظریے کو برتا ہے۔ ان کی تحریروں نے اردو ادب و تنقید کو اس طرح متاثر کیا ہے کہ ان کی شخصیت خود ایک مکتب فکر کی ہوگئی ہے۔

احتشام حسین اردو تنقید کا ذہن تھے۔ جو فکر اور فلسفیانہ گہرائی انہوں نے تنقید کو دی اس سے اردو تنقید کا دامن یکسر خالی تھا۔ انہوں نے اس کو فلسفیانہ فکر اور فن کی معراج پر پہنچایا۔ وہ اردو کے پہلے نقاد تھے جنہوں نے سماجی نقطہ نظر اردو میں سائنٹفک تنقید کی بنیاد رکھی اور سماجی نقطہ نظر کو انتہا پسندی اور افراط و تفریط کے الزام سے بچایا۔ وہ لوگ جو ادب کے سماجی نظریے کو نہیں مانتے وہ ہوسکتا ہے کہ ان کے بعض نظریات سے اختلاف کریں، لیکن جس طرح انہوں نے ادب کو ایک وسیع فنی، جمالیاتی اور سماجی پس منظر میں سمجھنے کی کوشش کی ہے اس سے اختلاف کرنا مشکل ہے۔

احتشام حسین بنیادی طور پر سماجی نظریات کے ماننے والے ہیں اور ادب کو اس کے گرد و پیش اور ماحول کی پیداوار سمجھتے ہیں۔ ان کا یقین ہے کہ ادب میں حسن، دلکشی اور جاذبیت، اس کا تاثر اور قبول سب اسے سماج سے ملتا ہے۔ فن کار جس سماج میں رہتا ہے اسی سے اپنی تخلیق کا مواد حاصل کرتا ہے۔ انہوں نے لکھا ہے کہ "ادیب کے تخلیقی کارنامے ان حقیقتوں کا عکس ہوتے ہیں جو سماج میں پائی جاتی ہیں۔”

اس اقتباس سے ان کے ادبی نظریے کی بڑی حد تک وضاحت ہوجاتی ہے۔ ادب کے اس نظریے پر انہوں نے سائنٹفک تنقید کی بنیاد رکھی۔ اصول تنقید یا نظریاتی تنقید کے سلسلے میں ان کی کوئی مستقل تصنیف نہیں ہے۔ لیکن تنقیدی نظریات کو مرتب کرنے اور نظریاتی تنقید کا ایک راستہ بنانے کے سلسلے میں انہوں نے اتنے مضامین لکھے ہیں کہ اگر انہیں یکجا کردیاجائے تو کسی مبسوط تصنیف سے کہیں زیادہ اہم ہوں گے۔ ان کا تنقیدی نظریہ فلسفیانہ ہونے کے باجود بہت سلجھا ہوا ہے۔ احتشام حسین کی تنقیدوں میں شاعرانہ انداز بیان خوبصورت گڑھی ہوئی ترکیبیں، بے مقصد تراشے ہوئے جملے اور تشبیہ و استعارات کی زبان نہیں ملتی بلکہ سادگی ،وضاحت، قطعیت ، اور ایک جچا تلا طرز بیان ان کے اسلوب کی خصوصیت ہے۔ احتشام حسین سے پہلے تنقید تشریح، توضیح، موازنہ، فن کاری کا مطالعہ سب تھی۔ لیکن فلسفیانہ عمل نہ تھی۔ تنقید کو جس سنجیدگی ، توازن اور جس فلفسیانہ نقطہ نگاہ کی ضرور ت تھی، وہ اسے احتشام حسین ہی نے دیا جس کے بانی اور پیش رو سب ہی کچھ وہی تھے۔

اس میں شک نہیں کہ احتشام حسین نے اردو تنقید کو پہلی بار فلسفیانہ انداز نظر، سماجی بصیرت اور واضح انداز بیان دیا۔ ان کے اسلوب میں تازگی ، قطعیت صفائی اور تنقیدی جرات ہے۔ انہوں نے اپنے حکیمانہ انداز و فلسفیانہ ذہن، عملی گہرائی اور وضاحت سے اردو تنقید کو جمالیاتی ، نفسیاتی اور خالص فنی تشریح اور توضیح کے دائرے سے نکال کر سائنٹفک بنایا جس کے پیش نظر بجا طور پر انہیں اردو میں جدید سائنٹفک تنقید کا بانی اور صحت مند ادبی اقدار کا علمبردار کہہ سکتے ہیں۔