Tag: ارشد شریف کا قتل

اسلام آباد : پی ایف یوجے نے ارشد شریف کے قتل پر تین دسمبر کو پارلیمنٹ ہاؤس کے باہر دھرنا دینے کا اعلان کرتے ہوئے سلمان اقبال کو اس کیس میں پھنسانے کی کوشش کی مذمت کی۔

تفصیلات کے مطابق پی ایف یو جے کے سیکرٹری جنرل رانا محمد عظیم رانا عظیم نے میڈیا سے گفتگو کرتے ہوئے کہا کہ ارشد شریف کے قتل پر 3دسمبر کو صحافی پارلیمنٹ ہاؤس کے سامنے جمع ہوں گے، انٹرنیشنل فیڈریشن آف جرنلسٹ بھی ہمارے ساتھ ہوگی۔

راناعظیم کا کہنا تھا کہ حکومت ارشد شریف کیس میں سلمان اقبال کو پھنسانے کی کوشش کررہی ہے، سلمان اقبال کو پھنسانے کی حکومتی کوششوں کی مذمت کرتے ہیں۔

دوسری جانب ترجمان پنجاب حکومت مسرت جمشیدچیمہ نے کہا کہ صحافیوں پر ظلم ہوا شہید کیا گیا، کسی کو پھانسی کے پھندے پر لٹکایا جاتا تو مزید شہادتیں نہیں ہوتیں۔

مسرت جمشیدچیمہ کا کہنا تھا کہ ہمیں اس ایشو کو اٹھائے رکھنا ہے، مجرمان کو پھانسی پر لٹکایا جائے میں پی ایف یوجے کے ساتھ شانہ بشانہ کھڑی ہوں۔

انھوں نے کہا کہ ہیومن رائٹس کے اداروں میں بھی آوازاٹھاتے رہیں گے، ارشد شریف کے لواحقین کو انصاف دلائیں گے۔

واشنگٹن : امریکی چینل سی این این کا کہنا ہے کہ کینیا پولیس کے متضاد بیانات شک و شبہات بڑھا رہی ہے ، جائے وقوع پر 4 میں سے ایک پولیس افسر کو کس نے گولی ماری ؟ یہ معمہ حل نہ ہوسکا۔

تفصیلات کے مطابق صحافی ارشد شریف کی کینیا میں قتل کی تحقیقات جاری ہے، ارشد شریف قتل کیس پر سی این این کی خصوصی رپورٹ جاری کردی۔

سی این این کے نمائندے کا کہنا ہے کینیا پولیس کے متضاد بیانات نے مزید سوالات اٹھا دئیے ہیں ، پولیس جو بیانات دے رہی ہے اس کی کوئی منطق نہیں ہے، ان وضاحتوں سے کئی سوالات جنم لے رہے ہیں۔

نمائندہ سی این این نے بتایا کہ کینین پولیس کا کہنا ہے اب تک پندرہ افراد کے بیانات ریکارڈ ہوچکے ہیں جن میں دس شہری اور پانچ پولیس اہلکار ہیں۔

سی این این کے نمائندے نے بتایا چار میں سے ایک پولیس اہلکار کو گولی لگی، حملے کی جگہ خون بھی دیکھا، مگر یہ معمہ ہے کہ پولیس اہلکار پر گولی کس نے چلائی؟

نمائندے کا کہنا تھا کہ کینیا انڈی پینڈنٹ پولسنگ اور سائٹ اتھارٹی کے سی ای او نے بتایا کہ ہم صرف یہ جاننے کی کوشش کررہے ہیں کہ فائرنگ کس صورتحال میں ہوئی۔

والدہ شہید ارشد شریف نے امریکی چینل سے بات کرتے ہوئے کہا کہ حکومت پاکستان پر یقین نہیں،ارشد کو ملک چھوڑنے پر مجبور کیا گیا۔

ارشد شریف کی بیوہ کا کہنا تھا کہ ارشد شریف نے انہیں بتایا تھا کہ وہ کہیں چھپے ہوئے ہیں کیونکہ ان کی جان کوخطرہ ہے، انھیں قتل کیاجاسکتا ہے۔

ارشد شریف اہل خانہ نے پاکستان اورکینیا میں انصاف نہ ملنے کے خدشات کا اظہار کرتے ہوئے اقوام متحدہ اور عالمی صحافتی اداروں سے انصاف کی اپیل کی ہے۔

خیال رہے ارشد شریف کو تئیس اکتوبر میں کینیا کے شہر نیروبی کے قریب فائرنگ کرکے شہید کردیا گیا تھا، کینیا اور پاکستان میں ان کے قتل سے متعلق تحقیقات جاری ہیں۔

اسلام آباد : ارشد شریف قتل کیس میں چوری شدہ گاڑی کے مالک کے نئے انکشافات کئے کہ پولیس نے گاڑی رات ساڑھے نوبجے بازیاب کرالی تھی جبکہ ارشد شریف کی گاڑی پر فائرنگ رات دس بجے کی گئی۔

تفصیلات کے مطابق ارشد شریف کیس میں اہم پیش رفت ہوئی ، چوری شدہ گاڑی کے مالک کے نئے انکشافات سامنے آگئے۔

چوری شدہ گاڑی کے مالک ڈگلس کمائو نے بتایا پولیس کو پتا تھا اصل گاڑی نیروبی کے مضافات میں موجود ہے اور پولیس نے گاڑی رات ساڑھے نوبجے بازیاب کرالی تھی۔

مالک کا کہنا تھا کہ ٹریکنگ سسٹم سےگاڑی کی لوکیشن سے پولیس آگاہ تھی، ارشد شریف کی گاڑی پر رات دس بجے فائرنگ کی گئی۔

رپورٹ کے مطابق چوری شدہ گاڑی کے مالک ڈگلس کماؤ کا مؤقف تھا کہ ان کی گاڑی میں ٹریکنگ کے جدید ترین آلات نصب تھے جو گاڑی کی لمحہ بہ لمحہ لوکیشن سے پولیس کو آگاہ کر رہے تھے۔

کینیا کی پولیس کے ترجمان برونو شئوسو نے وائس آف امریکا کے سوالات کے جواب میں کہا ہے کہ چونکہ خود پولیس پر تحقیقات ہو رہی ہیں، اس لیے وہ اس موضوع پر کوئی بیان نہیں دے سکتے۔

واضح رہے کہ ابتدائی بیانات میں کینیا کی پولیس نے سینئر صحافی ارشد شریف کے قتل واقعہ کو شناخت میں غلطی کی بنیاد پر کی گئی کاروائی قرار دیا تھا۔

اسلام آباد : ڈی جی لیگل ایڈاینڈجسٹس اتھارٹی عبدالرحیم اعوان کا کہنا ہے کہ ارشد کا اندھا قتل نہیں، فائرنگ کرنے والا کون ہے سب کو پتہ ہے۔

تفصیلات کے مطابق ڈی جی لیگل ایڈاینڈجسٹس اتھارٹی عبدالرحیم اعوان کی جانب سے بیان میں کہا گیا ہے کہ ارشد شریف کو کیوں قتل کیاگیا، اس سے متعلق قوم کا حقائق جاننا حق ہے۔

ڈاکٹرعبدالرحیم اعوان کا کہنا تھا کہ صحافیوں کی لاشوں پرکسی کوسیاست نہیں کرنے دیں گے اور ارشد شریف کے خاندان کو قانونی مدد فراہم کریں گے۔

ڈی جی لیگل ایڈاینڈجسٹس اتھارٹی نے کہا کہ ارشد کا اندھا قتل نہیں، فائرنگ کرنے والا کون ہے سب کو پتہ ہے۔

ان کا مزید کہنا تھا کہ کینیا پولیس کا بدلتا بیان بھی سامنے ہے، جدید انداز میں تحقیقات کرائی جائیں تو سب سامنے آجائے گا۔

ڈاکٹرعبدالرحیم اعوان نے کہا کہ ہم سب چاہتےہیں کہ ارشد شریف کے قاتل بے نقاب ہوں۔

مانچسٹر : رکن برطانوی پارلیمنٹ ناز شاہ نے ارشد شریف کے قتل کی شفاف تحقیقات کا مطالبہ کرتے ہوئے کہا کہ پتہ لگایا جائے، ارشد شریف کا قتل کیوں ہوا؟

تفصیلات کے مطابق رکن برطانوی پارلیمنٹ نازشاہ نے صحافی ارشد شریف کے قتل پر اپنی گہری تشویش کا اظہار کرتے ہوئے کہا معاملے کی مکمل شفاف تحقیقات ہونی چاہیے۔

ناز شاہ کا کہنا تھا کہ جلد پتہ لگایا جائے، ارشد شریف کا قتل کیوں ہوا اور قتل کے پیچھے کون تھا؟ مکمل تحقیقات ہونی چائیں۔

یاد رہے اقوام متحدہ اور امریکا نے بھی ارشد شریف کی موت کی مکمل چھان بین کا مطالبہ کیا تھا۔

واضح رہے کہ ارشد شریف کو کینیا میں پولیس کی گولی لگنے سے شہید ہوگئے تھے، پولیس نے موقف دیا تھا کہ واقعہ غلط فہمی کے باعث پیش آیا۔

اسلام آباد : وزیرداخلہ رانا ثنااللہ کا کہنا ہے صحافی اورسینیئر اینکر پرسن ارشد شریف کے قتل کی تحقیقات کیلئے تحقیقاتی ٹیم فوری طور پرکینیا روانہ ہوگی۔

تفصیلات کے مطابق وزیرداخلہ رانا ثنااللہ کی جانب سے بیان میں کہا گیا ہے کہ صحافی اورسینیئر اینکر پرسن ارشد شریف کے قتل کی تحقیقات کیلئے انٹیلی ایجنسیز کے اعلیٰ افسران پرمشتمل تین رکنی تحقیقاتی ٹیم بن گئی ہے، جو فوری طو پر کینیا روانہ ہوگی۔

رانا ثنااللہ کا کہنا تھا کہ تحقیقاتی ٹیم ارشد شریف کی دبئی اور پھر کینیا روانگی کی وجوہات اور محرکات کا جائزہ لے گی۔

وزیرداخلہ نے مزید کہا کہ سیاسی شخصیت کےاعتراف کے بعد تحقیقاتی ٹیم ان عوامل کا بھی جائزہ لے گی اورکینیا پولیس و دیگرذرائع سےشواہد پرآزادانہ رپورٹ مرتب کرے گی۔

یاد رہے پاکستان کے سینیئر اور ہر دلعزیز صحافی واینکر ارشد شریف کی شہادت کے واقعے کی تحقیقات کے لیے وزارت داخلہ نے اعلیٰ سطح کی تحقیقاتی کمیٹی بنائی تھی ، یہ تین رکنی کمیٹی ارشد شریف کی شہادت کی تحقیقات کرے گی۔

تحقیقاتی کمیٹی میں ایف آئی اے، آئی بی اور آئی ایس آئی کے افسر شامل ہیں، کینیا میں پاکستانی ہائی کمیشن کمیٹی کی تحقیقات میں معاونت کرے گا۔