بھارتی جیولین تھرور نیرج چوپڑا نے بھی گولڈ میڈلسٹ ارشد ندیم کو سُسر کی جانب سے تحفے میں بھینس ملنے پر اپنے ردعمل کا اظہار کیا ہے۔
بھارتی میڈیا سے گفتگو کرتے ہوئے بھارتی جیولین تھرور نیرج چوپڑا کا کہنا تھا کہ میرے لیے ایسے تحائف ملنا کوئی نئی بات نہیں ہے، مجھے ایک بار دیسی گھی تحفے میں ملا تھا اور ہریانہ میں ہم ایتھلیٹس کو اسی طرح کے تحائف ملتے ہیں جیسے کبھی 10 یا 50 کلو دیسی گھی اور لڈو وغیرہ دیئے جاتے ہیں۔
بھارتی جیولین تھرور نے کہا کہ میرے لیے مقابلوں سے قبل ایسے اعلانات بھی کیے جا چُکے ہیں کہ اگر نیرج مقابلہ جیتے گا تو اسے 50 کلو گھی تحفے میں دیا جائے گا، میں بچپن سے ہی اس طرح کی باتیں سنتا آیا ہوں۔
اُنہوں نے کہا کہ جہاں میری پرورش ہوئی ہے وہاں کبڈی اور ریسلنگ جیسے کھیل بہت مشہور ہیں اور ہمارے یہاں گھی تحفے میں اس لیے دیا جاتا ہے کیونکہ ہمارے لوگوں کا ماننا ہے کہ گھی طاقت کا خزانہ ہے۔
اُن کا مزید کہنا تھا کہ ہمارے یہاں بھینسیں بھی تحفے میں دی جاتی ہیں، پہلوانوں اور کبڈی کے کھلاڑیوں کو بُلِٹ موٹر سائیکل یا ٹریکٹر بھی تحفے میں دیے جاتے ہیں۔
واضح رہے کہ گزشتہ دنوں اولمپک گولڈ میڈلسٹ فخر پاکستان ارشد ندیم نے کہا تھا کہ میرے سسر نے بھینس دی ہے وہ تو اتنے امیر ہیں کہ پانچ چھ ایکڑ زمین ہی دے دیتے۔
ارشد ندیم نے دورہ کراچی کے دوران اے آر وائی نیوز کے میزبان وسیم بادامی کے پروگرام میں اہلیہ سمیت خصوصی شرکت کی اور میزبان کے معصومانہ سوالات کے جواب دیتے ہوئے ہنستے مسکراتے اپنی معصومانہ خواہش بھی بیان کر دی۔
جیولن ہیرو نے کہا کہ مجھے نہیں معلوم تھا میری اہلیہ نے انٹرویو دیکھا اور مجھے بتایا کہ ابا جی نے بھینس تحفے میں دینے کا اعلان کیا ہے۔
اس موقع پر ارشد ندیم نے ہنستے ہوئے ازراہ مذاق کہا کہ میں نے اتنا بڑا کارنامہ کیا اور سسر صاحب نے صرف بھینس پکڑا دی۔ میں نے اپنی بیگم سے کہا کہ صرف بھینس دی ہے، وہ تو ماشا اللہ اتنے امیر ہیں۔ ڈیڑھ دو مربع زمین ہے، پانچ یا چھ ایکڑ زمین ہی دے دیتے، لیکن بھینس دی یہ بھی اچھا کیا۔
انہوں نے حس مزاح کا مظاہرہ کرتے ہوئے یہ بھی کہا کہ میں نے ان سے کہا تھا اپنے ابا جی سے کہو کہ پانچ چھ ایکڑ زمین دے دیں لیکن انہوں نے اب تک اپنے ابا سے نہیں کہا جس سے لگتا ہے کہ یہ اپنے والدین کا احساس کرتی ہیں۔
ارشد ندیم کے لئے ایک اور بڑا انعام؟
ارشد ندیم جن کے تین بچے ایک بیٹی اور دو بیٹے ہیں نے خواہش کا اظہار کیا کہ میری خواہش ہے، جس طرح میں نے پاکستان کا نام روشن کیا، اسی طرح وہ بھی کسی نہ کسی شعبے میں پاکستان کا نام روشن کریں۔
