ARYNews.tv | Urdu – Har Lamha Bakhabar

Tag: ارطغرل غازی

  • ’مجھے پاکستانیوں نے عالمی شہرت دلائی‘ ارطغرل غازی کا کردار نبھانے والے اداکار کا اعتراف

    ’مجھے پاکستانیوں نے عالمی شہرت دلائی‘ ارطغرل غازی کا کردار نبھانے والے اداکار کا اعتراف

    ترک ڈرامہ سیریل ارطغرل غازی میں مرکزی کردار ادا کرنے والے انگین آلتان نے ’ارطغرل غازی‘ کی عالمی شہرت کا سہرا پاکستانیوں کے سر سجا دیا۔

    ترکی کے تاریخی ڈرامے ارطغرل غازی کو 2020 میں نشر کیا گیا تھا جس کے بعد سوشل میڈیا پر ہر جگہ اس ڈرامے کے چرچے زبان زد عام ہیں۔

    میڈیا رپورٹس کے مطابق انگین آلتان نے حال ہی میں سعودی عرب میں منعقد ہونے والے ریڈ سی انٹرنیشنل فلم فیسٹیول میں شرکت کی جہاں انہوں نے اپنی ڈرامہ سیریل ’ارطغرل غازی‘ کی مقبولیت سے متلعق گفتگو کی۔

    انگین آلتان کا کہنا تھا کہ ڈرامہ سیریل پر ناظرین نے خاص توجہ دی لیکن اس ڈرامے کو  ترکیے اور دنیا بھر کے شائقین کے برعکس  پاکستانی شائقین کی جانب سے سب سے زیادہ محبت ملی۔

    ترک ڈراما ’ارطغرل غازی‘ دنیا بھر میں کیوں سپرہٹ ہوا؟ حیران کن وجہ

    انگین آلتان کا کہنا تھا کہ ڈرامہ سیریل ’ ارطغرل غازی‘ دنیا بھر میں بالخصوص پاکستان میں بے حد مقبول رہی، اس کردار کو پاکستانی عوام نے بے حد پسند کیا، دنیا بھر کے ناظرین ایک دوسرے سے مماثل ہو سکتے  ہیں لیکن پاکستان میں یہ پسند ایک منفرد قسم کی ہے۔

    ترک اداکار نے ارطغرل غاز ی کے کردار سے اپنی ذاتی زندگی پر پڑنے والے ا ثر پر بات کرتے ہوئے کہا کہ اس کردار نے مجھے  تبدیل کرنے کے بجائے خاصا متاثر کیا، اگرچہ میرے لیے ہر کردار اہم ہے لیکن ارطغرل ڈرامہ خاص تھا کیونکہ اس نے سیریل کے باعث میں نے دنیا بھر میں مقبولیت حاصل کی۔

    واضح رہے کہ ترکی کے مشہور ڈرامہ سیریل ’ارطغرل غازی‘ کی کہانی تیرہویں صدی میں مسلمانوں کی عالمی فتوحات کی عکاسی کرتی ہے، جب کہ ڈرامے کی کہانی مسلمانوں کو در پیش مسائل کے حل کے لیے مسلم اسکالر اور اسلامی فقہ کے کردار پر زور دیتی ہے۔

    ڈرامہ سیریل ’ارتغرل غازی‘ کو اردو سمیت متعدد زبانوں میں ڈب کر کے مختلف ممالک میں نشر کیا گیا تھا۔

  • ڈرامہ’ارطغرل غازی‘کے مشہور اداکار کی متاثرین کی امداد کیلئے پاکستان آمد

    ڈرامہ’ارطغرل غازی‘کے مشہور اداکار کی متاثرین کی امداد کیلئے پاکستان آمد

    کراچی : مشہور ترک ڈرامہ سیریز ’ارطغرل غازی‘میں عبدالرحمان کا کردار ادا کرنے والے اداکار جلال آل پاکستان میں سیلاب متاثرین کی مدد کرنے کے لیے کراچی پہنچ گئے۔

    کراچی پہنچنے کے بعد ترک اداکار نے سندھ میں رضاکارانہ طور پر خدمات سر انجام دیتے ہوئے امدادی سامان کی بوریاں اپنے کندھے پر اٹھا کر سیلاب متاثرین کے خیموں تک پہنچائیں۔

    فوٹو:سوشل میڈیا

    سوشل میڈیا پر وائرل ہونے والی ویڈیوز اور تصاویر میں دیکھا گیا کہ جلال آل سندھ کے سیلاب متاثرین کے ساتھ گھل مل کر امدادی سرگرمیوں میں شامل ہوگئے وہ سیلاب سے متاثرہ بچوں کے ساتھ موج مستی کرکے ان کا دل بہلاتے رہے۔

     

    View this post on Instagram

     

    A post shared by Celal AL (@celalall)

    یاد رہے کہ وہ اس سے قبل بھی سماجی خدمات مین پیش پیش رہتے ہیں اور ترک ہلال احمر کے ساتھ گزشتہ کئی سال سے منسلک ہیں۔

    رک اداکار نے سندھ میں رضاکارانہ طور پر خدمات سر انجام دیتے ہوئے امدادی سامان کی بوریاں اپنے کندھے پر اٹھاکر سیلاب متاثرین کے خیموں میں پہنچائیں۔—فوٹو:سوشل میڈیا

    انسٹاگرام پر جلال آل نے سیلاب متاثرین کے ساتھ ایک ویڈیو اپ لوڈ کی اور لکھا کہ ترکی زندہ باد، پاکستان زندہ باد، سیلاب کی تباہی سے 4 کروڑ افراد بے گھر ہوگئے جبکہ ہزاروں اموات ہوگئیں۔

  • ’ارطغرل غازی‘ سے حقیقی زندگی میں بھی دھوکا کرنا مہنگا پڑ گیا

    ’ارطغرل غازی‘ سے حقیقی زندگی میں بھی دھوکا کرنا مہنگا پڑ گیا

    لاہور: ’ارطغرل غازی‘ سے حقیقی زندگی میں بھی دھوکا کرنا مہنگا پڑ گیا، کاشف ضمیر کو ریمانڈ پر سی آئی اے کے حوالے کر دیا گیا۔

    تفصیلات کے مطابق دنیا بھر میں مشہور ہونے والے ترکی ڈراما سیریل اطغرل غازی کے ہیرو انگین آلتان سے حقیقی زندگی میں بھی دھوکا کرنا ایک پاکستانی شہری کو نہایت مہنگا پڑ گیا ہے۔

    انگین آلتان کو پاکستان بلا کر دھوکا کرنے والے کاشف ضمیر کو لاہور کی مقامی عدالت نے فراڈ کے الزام میں 2 روزہ جسمانی ریمانڈ پر سی آئی اے کے حوالے کر دیا۔

    ملزم کاشف ضمیر کو سی آئی اے پولیس نے کینٹ کچہری میں جوڈیشل مجسٹریٹ رحمان الہٰی کی عدالت میں پیش کیا تھا، تفتیشی افسر نے عدالت کو بتایا کہ ارطغرل غازی کے ہیرو انگین آلتان کو ملزم نے ایونٹس کے لیے پاکستان بلا کر 8 کروڑ روپے کا جعلی چیک دے دیا، جس کے بعد انگین آلتان پاکستان کا دورہ ادھورا چھوڑ کر واپس چلے گئے۔

    سی آئی اے پولیس نے عدالت سے استدعا کی کہ انگین آلتان کی شکایت پر مقدمہ درج کر لیا گیا ہے، لہٰذا تفتیش کے لیے جسمانی ریمانڈ دیا جائے، جس پر عدالت نے ملزم کو دو روزہ جسمانی ریمانڈ پر سی آئی اے کے حوالے کر دیا۔

    فراڈ کے ایک اور مقدمے میں عدالت نے کاشف ضمیر کو جوڈیشل ریمانڈ پر جیل بھجوانے کا حکم بھی دے دیا ہے۔

    یاد رہے کہ گزشتہ روز بھی مقامی عدالت میں جوڈیشل مجسٹریٹ نوشابہ یوسف نے کیس کی سماعت کے بعد پولیس کی استدعا پر ایک روزہ ریمانڈ منظور کیا تھا۔

  • ’ابن العربی‘ فلسطینیوں کے لیے دعا گو

    ’ابن العربی‘ فلسطینیوں کے لیے دعا گو

    پاکستان سمیت دنیا بھر میں مشہور ہونے والے تاریخی ترک ڈرامے کے ایک اہم کردار ’ابن العربی‘ کا دل بھی فلسطینیوں پر ڈھائے جانے والے مظالم نے موم کر دیا ہے۔

    تفصیلات کے مطابق تاریخی واقعات سے ماخوذ ڈراما سیریز ’ارطغرل غازی‘ میں ابن العربی کا کردار ادا کرنے والے ترک اداکار عثمان سوکوت فلسطین میں امن کے لیے دعا گو ہیں۔

    اداکار عثمان سوکوت نے سماجی رابطے کی ویب سائٹ انسٹا گرام پر ’ارطغرل غازی‘ کے کردار ابن العربی کے کاسٹیوم میں اپنی ایک تصویر شیئر کی، ساتھ میں انھوں نے دعائیہ کلمات لکھے ’اب فلسطین میں امن کے لیے دعا کریں!‘

    عثمان سوکوت کی اس پوسٹ پر مداحوں کے ساتھ ساتھ ساتھی اداکاروں نے بھی فلسطین میں امن کے لیے دعائیں کیں۔

    اس سے قبل ارطغرل غازی کے مرکزی کردار انگین آلتان نے بھی فلسطینیوں کے حق میں آواز اٹھائی تھی، انھوں نے انسٹا گرام پر لکھا کہ فلسطین کو آزاد کرو، انگین آلتان نے اسرائیل کے مقبوضہ بیت المقدس میں مسجد الاقصٰی پر حملے اور غزہ کی پٹی پر وحشیانہ بم باری اور تشدد کے واقعات کی مذمت کی۔

    ارطغرل غازی نے فلسطینیوں کے حق میں آواز اٹھا دی

    واضح رہے کہ فلسطین میں اسرائیل کی وحشیانہ بم باری 10 روز سے جاری ہے، غیر ملکی میڈیا کا کہنا ہے کہ غزہ میں آج صبح اسرائیلی فورسز نے رہائشی عمارت پر بمباری کی، جس کے نتیجے میں 3 فلسطینی شہید ہو گئے، غزہ میں بم باری سے 3 مساجد بھی شہید ہو گئیں اور 40 مکانات تباہ ہوئے۔

    وزارت صحت کے مطابق فلسطین میں اسرائیلی جارحیت سے شہید افراد کی تعداد 219 ہو گئی ہے، جن میں 63 بچے اور 35 خواتین بھی شامل ہیں۔

  • ارطغرل غازی نے فلسطینیوں کے حق میں آواز اٹھا دی

    ارطغرل غازی نے فلسطینیوں کے حق میں آواز اٹھا دی

    مشہور و معروف ترک ڈرامے ارطغرل غازی کے مرکزی کردار انگین آلتان نے بھی فلسطینیوں کے حق میں آواز اٹھا دی، انہوں نے لکھا کہ فلسطین کو آزاد کرو۔

    بین الاقوامی ویب سائٹ کے مطابق پاکستان سمیت دنیا بھر میں شہرت پانے والے ترک ڈرامے ارطغرل غازی میں مرکزی کردار ادا کرنے والے ترک اداکار انگین آلتان نے بھی اسرائیل کے مقبوضہ بیت المقدس میں مسجد الاقصٰی پر حملےاور غزہ کی پٹی پر وحشیانہ بمباری اور تشدد کے واقعات کی مذمت کی ہے۔

    انگین آلتان نے سماجی رابطے کی ویب سائٹ انسٹاگرام پر فلسطین کی آزادی کے لیے آواز اٹھاتے ہوئے خصوصی انسٹا اسٹوری شیئر کی۔

    انہوں نے لکھا کہ اب یہ کہنے کی ضرورت نہیں ہے، ہمارے دل و دماغ کہہ رہے ہیں کہ یروشلم میں جو ہوا وہ ناقابل بیان درد ہے۔ اداکار نے مزید لکھا کہ فلسطین کو آزاد کرو۔

    واضح رہے کہ مقبوضہ بیت المقدس کے علاقے عین الوزہ میں ابھی بھی شدید جھڑپیں جاری ہیں، فلسطینی وزارت صحت کا کہنا ہے کہ شہید فلسطینیوں کی تعداد 43 ہوگئی، 13 بچے بھی شہدا میں شامل ہیں۔

    اب تک ایک ہزار سے زائد افراد زخمی ہوچکے ہیں جبکہ درجنوں عمارتیں مٹی کا ڈھیر بنادی گئی ہیں۔

  • ارطغرل غازی کے کردار نے پاکستان میں شادی کی خواہش کا اظہار کردیا

    ارطغرل غازی کے کردار نے پاکستان میں شادی کی خواہش کا اظہار کردیا

    پاکستان میں ترکی کے مشہور ترین ڈرامہ سیریل ارطغرل غازی کے 3 کرداروں نے پاکستان کا دورہ کیا، ایک اداکار نے پاکستانی خاتون سے شادی کی خواہش کا اظہار کردیا۔

    تفصیلات کے مطابق ڈرامہ سیریل ارطغرل غازی میں درویز اسحٰق، کلتجا اور گنکت ایلپ کا کردار ادا کرنے والے اداکاروں نے پاکستان کا دورہ کیا۔

    اے آر وائی نیوز سے خصوصی گفتگو کرتے ہوئے تینوں اداکاروں کا کہنا تھا کہ انہیں پاکستان کا دورہ کر کے نہایت خوشی ہوئی۔

    گنکت ایلپ کا کردار ادا کرنے والے اداکار نے انکشاف کیا کہ اگر انہیں موقع ملا تو وہ پاکستانی ڈراموں میں ضرور کام کریں گے اور اس حوالے سے جلد ایک سرپرائز بھی دیں گے۔

    انہوں نے یہ بھی بتایا کہ انہیں پاکستانی خواتین بہت اچھی لگیں اور وہ پاکستان میں شادی کرنا چاہتے ہیں کیونکہ وہ ابھی تک سنگل ہیں۔

    تینوں اداکاروں نے پاکستان کا دورہ کرنے پر بے حد خوشی کا اظہار کیا اور پاکستانیوں کی مہمان نوازی کی تعریف کی۔

  • وزیر اعظم عمران خان کا ارطغرل کو پسند کرنا بہت بڑا اعزاز ہے: ’بمسی بے‘

    وزیر اعظم عمران خان کا ارطغرل کو پسند کرنا بہت بڑا اعزاز ہے: ’بمسی بے‘

    اسلام آباد: ترک وزیر خارجہ میولت چاو اشولو کے 3 روزہ دورہ پاکستان کے موقع پر ان کے ہمراہ آئے وفد میں شامل ارطغرل کے اداکاروں نورتین سومیز اور ایبرک پیکان نے میڈیا سےگفتگو کرتے ہوئے پاکستان کے لیے اپنی محبت کا اظہار کیا۔

    ڈراما ارطغرل میں’بمسی بے‘ کا کردار نبھانے والے نورتین سومیز نے اظہار خیال کرتے ہوئے کہا ڈرامے کی تشکیل اور چیز ہے، جب ناظرین اور حکومتیں تعریف کریں تو بڑا اعزاز ہے، پاکستان کے وزیر اعظم کا ارطغرل کو پسند کرنا بہت بڑا اعزاز ہے۔

    اداکار نورتین سومیز نے کہا پاکستان کے ساتھ ثقافتی تعلقات کو فروغ دینے کے لیے پُر عزم ہیں، پاکستان میں مختلف پروگرامز خصوصاً سفرنامہ میں بہت دل چسپی ہے، لاہور بہت پسند ہے، آئندہ جب بھی پاکستان آیا وہاں جاؤں گا۔

    ترک اداکار نے مزید کہا کہ پاکستان کے اداکاروں کے ساتھ مشترکہ کام کرنے کی خواہش ہے، ارطغرل ڈراما انتہائی پیچیدہ اور مشکل منصوبہ تھا لیکن توقعات سے زیادہ پذیرائی ملی۔

    ارطغرل ڈرامے میں ’آرتک بے‘ کا کردار نبھانے والے اداکار ایبرک پیکان نے اظہار خیال کرتے ہوئے کہا میں بچپن سے سنتا تھا پاکستان ترکی برادر ممالک ہیں، پاکستان آ کر سوچ سے زیادہ محبت ملی، ترکی اور پاکستان کی مشترکہ تاریخ ہے، ہم بھائی ہیں، پاکستان ہمارا گھر ہے۔

    ترک اداکار نے کہا پاکستان کی طرح ارطغرل ڈراما ترکی میں بھی مقبول ہے، اس ڈرامے سے نوجوانوں کو تاریخ میں دل چسپی پیدا ہوئی، کسی بھی ڈرامے یا منصوبے کی کامیابی کے لیے ابتدائی محنت انتہائی اہم ہوتی ہے۔

    واضح رہے کہ مشہور تاریخی ڈراما سیریل ارطغرل غازی میں کردار نبھانے والے ترک اداکار ترک وزیر خارجہ کے ہمراہ پاکستان آئے ہیں، ترک وزیر خارجہ کا دورہ پاکستان اسلام آباد میں سہ ملکی مذاکرات کے سلسلے میں ہے۔

  • ترک وزیر خارجہ مشہور ڈراما سیریل کے اداکاروں کے ہمراہ پاکستان پہنچ گئے

    ترک وزیر خارجہ مشہور ڈراما سیریل کے اداکاروں کے ہمراہ پاکستان پہنچ گئے

    اسلام آباد: ترک وزیر خارجہ  میولت چاؤش اوغلو وفد کے ہمراہ 3 روزہ دورے پر پاکستان پہنچ گئے۔

    تفصیلات کے مطابق ترک وزیر خارجہ پاکستان کے دورے پر اسلام آباد پہنچ گئے ہیں، ان کے ہمراہ 20 رکنی وفد بھی پاکستان پہنچا ہے۔

    ذرائع کا کہنا ہے کہ وفد میں وزارت تعلیم اور تجارت سمیت دیگر محکموں کے اعلیٰ حکام شامل ہیں، ترک وفد میں ڈراما سیریل دیریلش ارطغرل کے اداکار بھی شامل ہیں۔

    ڈرامے میں بمسی بیرک کا کردار ادا کرنے والے نورتین سومیز بھی وفد کا حصہ ہیں، ارطغرل میں ارتب بے کا کردار نبھانے والے ایبرک پیکان بھی پاکستان آئے ہیں۔

    ذرائع کا کہنا ہے کہ ڈراما سیریل دیریلش ارطغرل کے پروڈیوسر اوزکان ایما بھی وفد کاحصہ ہیں، یہ اداکار پاکستان دورے کے دوران مختلف سرگرمیوں کا حصہ ہوں گے۔

    واضح رہے کہ پاکستان، ترکی اور آذربائیجان کے وزرائے خارجہ کا دوسرا پاک ترکی آذربائیجان سہ فریقی اجلاس آج بدھ کو اسلام آباد میں منعقد ہوگا۔

    ترجمان دفتر خارجہ کے مطابق اجلاس کے دوران تینوں فریق عالمی اور علاقائی امور پر تبادلہ خیال کریں گے، جس میں علاقائی امن و سلامتی کے لیے نئے اور ابھرتے ہوئے خطرات سمیت کو وِڈ 19 وبائی مرض، ماحولیات اور ماحولیاتی تبدیلی کو درپیش چیلنجوں سے نمٹنے اور معاشی ترقی کے اہداف کے حصول سے متعلق امور زیر بحث آئیں گے۔

    تینوں وزرائے خارجہ امن و سلامتی، تجارت، سرمایہ کاری، سائنس و ٹیکنالوجی، تعلیم اور ثقافتی تعاون سمیت باہمی دلچسپی کے تمام شعبوں میں سہ فریقی تعاون کو بڑھانے کے امکانات کا جائزہ لیں گے۔

  • مشہور ترک ڈرامے کا اصل کردار پاکستان پہنچ گیا

    مشہور ترک ڈرامے کا اصل کردار پاکستان پہنچ گیا

    سلطنت عثمانیہ کی تاریخ پر مبنی مشہور ڈرامے ارطغرل غازی کے مرکزی کردار نبھانے والے اداکار پاکستان پہنچ گئے۔

    تفصیلات کے مطابق پاکستان میں سال دوہزار بیس میں سب سے زیادہ دیکھا جانے والاترک ڈرامہ ارطغرل غازی کے اصل کردار اینگن آلتان لاہور پہنچ گئے ہیں،ترک سفارتخانے نے اپنے آفیشل ٹوئٹر اکاؤنٹ سے ارطغرل کی لاہور ایئرپورٹ کی تصویر جاری کردی ہیں۔

    https://twitter.com/PakTurkey/status/1336889821713870848?s=20

    اینگن آلتان نجی کمپنی کی دعوت پر پاکستان کے مختصر دورے پرلاہور پہنچے، جہاں ان کا کاروباری کمپنی کے مالک نے بھاری سیکیورٹی کے ساتھ خود استقبال کیا۔

    اس سے قبل سولہ ستمبر کو ’ارطغرل غازی کے معروف اداکار جاوید جیتن گُنیر (دوآن ایلپ) پاکستان پہنچے تھے، تُرک اداکار جاوید جیتن گُنیر نے اپنے مداحوں کو پاکستان پہنچنے کی اطلاع فوٹو اینڈ ویڈیو شیئرنگ ایپ انسٹاگرام کے ذریعے دی تھی، جہاں انہوں نے اپنے بورڈنگ پاس کی تصویر شیئر کی جب کہ اسلام آباد ایئرپورٹ پہنچنے کے بعد انہوں نے انسٹاگرام پر ایک موسیقی پروگرام کی ویڈیو بھی اسٹوری میں شیئر کرتے ہوئے لکھا کہ گڈ مارننگ اسلام آباد۔

    یہ بھی پڑھیں:  ترک ڈرامے “ارطغرل غازی” کا سپاہی روشان پاکستان پہنچ گیا

    واضح رہے کہ گذشتہ سال وزیراعظم عمران خان نے مشہور ترک سیریل ’’ارطغرل غازی‘‘ کو پی ٹی وی پر نشر کرنے کی ہدایت کی تھی ، سیریل پاکستان میں نشر کرنے کا مقصد قوم کواسلامی تاریخ سے آگاہ کرنا ہے۔

    تاہم ارطغرل غازی نے پاکستان میں اپنے آغاز کے ساتھ ہی کامیابی کے تمام ریکارڈز کو پاش پاش کیا، اس کی ہر قسط کو لاکھوں افراد دیکھ رہے ہیں، یہی نہیں ڈرامے میں کردار ادا کرنے والے ترک فنکاروں کے سماجی ویب سائٹ ٹوئٹر پر ان کے فالوورز کی تعداد بھی لاکھوں تک جاپہنچی ہے۔

     

  • ملک بھر میں حلیمہ سلطان کے زیور کی طلب میں اضافہ

    ملک بھر میں حلیمہ سلطان کے زیور کی طلب میں اضافہ

    پاکستان میں مقبول ترین ترک ڈرامے ارطغرل غازی کے کردار حلیمہ سلطان کا پہنا جانے والا زیور، جسے ماتھا پٹی کہا جاتا ہے، ملک بھر کی خواتین میں بے حد مقبول ہورہا ہے۔

    ارطغرل غازی کے کردار حلیمہ سلطان نے جس زیور کو اپنے سنگھار کا حصہ بنایا ہے، یہ افغانستان اور پاکستان کے صوبہ خیبر پختونخواہ کا ثقافتی زیور ہے اور مقامی خواتین میں بے حد مقبول رہا ہے۔

    مقامی خواتین اس زیور کو جسے ماتھا پٹی کہا جاتا ہے، شادی بیاہ کے علاوہ دیگر مواقعوں پر بھی استعمال کرتی رہی ہیں۔

    تاہم ڈرامے کے کردار حلیمہ سلطان کے استعمال کے بعد اب اس زیور کی مقبولیت ملک کے طول و عرض میں پھیل گئی ہے۔ اس زیور کو ماتھا پٹی کے نام سے کم، اور حلیمہ سلطان کا زیور کے نام سے زیادہ پکارا جا رہا ہے۔

    صرف خیبر پختونخواہ ہی نہیں بلکہ ملک بھر میں اس کی طلب میں بے حد اضافہ ہورہا ہے اور دکاندار اس کی بڑھتی طلب سے بے حد خوش ہیں۔

    ماتھا پٹی کی بڑھتی طلب کے باعث اس کے ڈیزائن اور بناوٹ میں تنوع بھی پیدا کیا جارہا ہے، علاوہ ازیں اس کی قیمت بھی مختلف رکھی جارہی ہے تاکہ ہر طبقے کی خواتین کی اس تک آسان پہنچ ہو۔

    دکانداروں کا کہنا ہے کہ اب جبکہ ملک بھر میں شادی بیاہ کا موسم عروج پر ہے، تو ماتھا پٹی کی طلب میں بے تحاشہ اضافہ ہوگیا ہے جو ہر عمر کی خواتین استعمال کرنا چاہتی ہیں۔