اسرائیلی فوج کی جانب سے غزہ میں جنگی جرائم کا سلسلہ جاری ہے، جبکہ الشفا ء اسپتال پر بمباری کے باعث درجنوں نوزائیدہ بچے بھی موت کی نیند سو گئے ہیں۔
پاکستانی اداکارہ ارمینا خان نے فوٹو اور ویڈیو شیئرنگ ایپ انسٹاگرام پر ایک ویڈیو شیئر کی، جس میں وہ معصوم فلسطینی بچوں کی اموات پر بے اختیار رو رہی ہیں۔
انسٹاگرام پر شیئر کی گئی ویڈیو کے کیپشن میں اداکارہ ارمینا خان نے لکھا کہ ”قبل از وقت پیدا ہونے والے بچوں کے بارے سن کر میں اپنا دکھ بیان نہیں کرسکتی، انہوں نے کہا کہ ایسا محسوس ہورہا ہے کہ میری دنیا اچانک پلٹ گئی ہے اور میں کوئی ڈراؤنا خوب دیکھ رہی ہوں“۔
ارمینا خان نے مزید لکھا کہ ”میں ہر دن کسی کی مدد کرنے یا اچھا کام کرنے کی کوشش کرتی ہوں لیکن میری انسانیت سے امید ختم ہونا شروع ہوگئی ہے“۔
اداکارہ کا روتے ہوئے کہنا تھا کہ ”ایک انسان ہونے کے ناطے یہ سب دیکھ کر میں اندر سے ٹوٹ چکی ہوں،یہ سوچ کر بھی دل دہل جاتا ہے کہ ان روتے ہوئے بچوں کو تسلی دینے والا یا پیار کرنے والا کوئی نہیں ہے“۔
بچوں کے لیے دعا کرتے ہوئے اداکارہ نے کہا کہ’’کاش کوئی معجزہ ہوجائے، خدا کے لئے ان معصوم لوگوں کی مدد کریں، ان چھوٹے بچوں پر کچھ رحم کریں، انہوں نے کچھ غلط نہیں کیا، انہیں کس جرم کی سزا دی جارہی ہے“۔
