لاہور : مریم نواز سے متعلق ایک طنزیہ ٹوئٹ کے جواب میں ن لیگ کے آفیشل ٹوئٹر اکاؤنٹ سے اداکارہ ارمینہ خان کی ٹرولنگ شروع کر دی گئی۔
تفصیلات کے مطابق اداکارہ ارمینہ خان کو مسلم لیگ ن کی چیف آرگنائزر مریم نواز پر تنقید مہنگی پڑ گئی، ن لیگ کے آفیشل ٹوئٹر اکاؤنٹ سے ارمینہ خان کی ٹرولنگ شروع کر دی گئی۔
ارمینہ خان کی بچے کو گود میں لیے تصویر پر کراس لگا دیا گیا اور ن لیگ کے آفیشل ٹوئٹراکاؤنٹ پر لکھا کہ بیمار ذہن کی یوتھیا آنے والی نسل کی کیا تربیت کرے گی ، ففتھ جنریشن یوتھیا پست سطح پر ہوں گے۔
سوشل میڈیا صارفین نے ن لیگ کے ٹویٹ کو گری ہوئی حرکت قرار دے کر ٹویٹ ڈیلیٹ کرنے کا مطالبہ کر دیا۔
یاد رہے مسلم لیگ ن کی چیف آرگنائزر مریم نواز کی فروٹ چاٹ بنانے کی ویڈیو وائرل ہوئی تھی ، مریم نواز نے خود بھی ویڈیو شیئر کی تھی اور پیغام میںلکھا کہ صرف سیاست نہیں کرتے ، فروٹ چاٹ کے بغیر افطار ہوتی ہی نہیں ہے۔
مریم نواز کے ویڈیو پر اداکارہ ارمینہ خان نے تنقید کرتے ہوئے اپنے ٹوئٹ میں لکھا تھا کہ سیاست ایک طرف لیکن جب آپ کے ملک میں لوگ مر رہے ہیں ایسے وقت میں آپ کھانا دکھا رہی ہیں۔
ارمینہ خان کا مزید کہنا تھا کہ سب سے پہلی بات یہ کہ مریم نواز نے فروٹ چاٹ تیار نہیں کی، چمچا ہلا لینا کھانا تیار کرنا نہیں ہوتا، کام کرنے سے آستینیں گندی ہوں گی۔
