Tag: اروند کیجریوال

نئی دہلی کے وزیر اعلیٰ اروند کیجریوال نے منصب سے مستعفی ہونے کا اعلان کردیا۔

بھارتی میڈیا کے مطابق سپریم کورٹ سے ضمانت ملنے کے بعد جیل سے رہا ہونے والے دہلی کے وزیراعلیٰ اروند کیجریوال نے اعلان کیا ہے، وہ جلد وزارت اعلیٰ سے استعفیٰ دیکر کسی اور کو وزیراعلیٰ نامزد کریں گے اور دوبارہ الیکشن میں جائیں گے، اروند کیجریوال آئندہ 48 گھنٹوں میں باضابطہ طور پر عہدے سے مستعفی ہوسکتے ہیں۔

اروند کیجریوال کا کہنا ہے جب تک میں مقدمات سے بری نہیں ہوجاتا تب تک وزیراعلیٰ کے عہدے پر نہیں بیٹھوں گا، عدالت سے انصاف ملا، اب عوام کی عدالت سے انصاف کا منتظرہوں۔

انہوں نے کہا کہ عوام کے حکم کے بعد ہی وزارتِ اعلیٰ کی کرسی پر بیٹھوں گا، اگر میں نے نئی دہلی میں کام کیا ہے تو عوام ووٹ دے کر فیصلہ سنائیں۔

واضح رہے کہ نئی دہلی میں انتخابات آئندہ سال فروری میں شیڈول ہیں، اروند کیجریوال کو بھارتی سپریم کورٹ کے حکم پر دو دن پہلے تہاڑ جیل سے رہا کیا گیا تھا۔

یاد رہے کہ اروند کجریوال کو 6 ماہ قبل شراب پالیسی کیس میں گرفتار کیا گیا تھا اور ان کی ضمانت کی درخواست کئی بار مسترد کی گئی جس کے بعد 2 روز قبل بھارتی سپریم کورٹ نے انہیں ضمانت پر رہا کرنے کا حکم دیا۔

نئی دہلی: جیل سے رہا ہوتے ہی عوامی پاور شو کا مظاہرہ کرتے ہوئے عام آدمی پارٹی کے کنوینر اروند کیجریوال نے کہا اگر وہ دوبارہ جیل گئے تو مودی سرکار دہلی والوں کی مفت بجلی و پانی بند کر دے گی۔

بھارتی میڈیا رپورٹس کے مطابق دہلی کے وزیر اعلیٰ اروند کیجریوال نے اتوار کو ایک جلسے سے خطاب میں کہا کہ اگر وہ دوبارہ جیل گئے تو بی جے پی عوام کی مفت بجلی اور پانی بند کر دے گی اور سرکاری اسکولوں اور اسپتالوں کو تباہ کر دے گی۔

کیجریوال نے کہا مجھے اس لیے جیل میں ڈالا گیا کیوں کہ عوام کے لیے 24 گھنٹے مفت بجلی اور علاج کا انتظام کیا، ہم نے دہلی میں 500 اسکول بنائے، اگر ووٹرز جھاڑو کا بٹن دبائیں گے تو ہمیں جیل جانے کی ضرورت نہیں پڑے گی۔

انھوں نے کہا کہ اگر وزیر اعظم نریندر مودی ملک بھر میں 5 ہزار اسکول بھی بناتے تو بہت اچھا ہوتا، لیکن وہ غلط سیاست کر رہے ہیں، یہ آمریت ہے، اور ہم سب کو اس آمریت کے خلاف لڑنا ہے۔

اروند کیجریوال نے کہا کہ بی جے پی والے 400 سیٹیں مانگتے پھر رہے ہیں لیکن جب ان سے پوچھا جاتا ہے تو وہ کہتے ہیں کہ ہم ملک سے ریزرویشن ختم کر دیں گے، اگر آپ چاہتے ہیں کہ ملک میں ریزرویشن اور جمہوریت کا خاتمہ نہ ہو تو ہر شخص کو ووٹ ڈالنے کے لیے جانا چاہیے اور جھاڑو کا بٹن دبانا چاہیے۔

انھوں نے کہا جس طرح پیوٹن نے روس کا آئین تبدیل کیا اور اب وہاں انتخابات نہیں ہوتے، صرف پیوٹن کبھی وزیر اعظم اور کبھی صدر رہتے ہیں، اسی طرح بی جے پی حکومت ملک کا آئین بدلے گی اور الیکشن رکوائے گی۔

نئی دہلی: دہلی کے وزیر اعلیٰ نے جیل سے عوام کے لیے پیغام بھیجا ہے کہ وہ جلد باہر آ جائیں گے اور اپنا وعدہ پورا کریں گے۔

بھارتی میڈیا رپورٹس کے مطابق ایک عدالت نے جمعہ کو دہلی کے وزیر اعلیٰ اروند کیجریوال کو شراب پالیسی سے متعلق منی لانڈرنگ کیس میں 28 مارچ تک انفورسمنٹ ڈائریکٹوریٹ (ای ڈی) کی تحویل میں دے دیا ہے۔

اہلیہ سنیتا کیجریوال نے حراست میں ان سے ملاقات کے بعد ان کا پیغام لوگوں کو سنایا، وزیر اعلیٰ نے پیغام میں کہا ’’دہلی میں خواتین سوچ رہی ہوں گی کہ کیجریوال جیل کی سلاخوں کے پیچھے ہیں، پتا نہیں اب انھیں 1000 روپے ملیں گے یا نہیں۔‘‘

انھوں نے کہا ’’لیکن میں سب سے اپیل کرتا ہوں کہ وہ اپنے بھائی، اپنے بیٹے پر بھروسہ کریں، ایسی کوئی جیل نہیں جو مجھے زیادہ دیر تک سلاخوں کے پیچھے رکھ سکے، میں جلد باہر آؤں گا اور وعدہ پورا کروں گا۔‘‘

اروند کیجریوال کا پیغام پڑھتے ہوئے سنیتا نے کہا کہ میری عام آدمی پارٹی کے کارکنوں سے اپیل ہے کہ عوامی خدمت کا کام نہ رکے اور اس وجہ سے بی جے پی والوں سے نفرت نہ کریں، بی جے پی والے بھی ہمارے بھائی بہن ہیں، میں جلد واپس آؤں گا۔