اسلام آباد : سپریم کورٹ کا نو رکنی لارجر بنچ آج پنجاب اور خیبرپختونخوا میں انتخابات میں تاخیر کے معاملے پر از خود نوٹس کیس کی سماعت کرے گا۔
تفصیلات کے مطابق سپریم کورٹ میں پنجاب اور خیبرپختونخوا انتخابات میں تاخیر پر از خود نوٹس کیس کی سماعت آج دن دو بجے ہو گی۔
چیف جسٹس کی سربراہی میں 9 رکنی بینچ کیس کی سماعت کرے گا۔
سپریم کورٹ آف پاکستان کی جانب سے جاری اعلامیے میں کہا گیا کہ جسٹس اعجازالاحسن اور جسٹس مظاہرعلی اکبرنقوی نے از خود نوٹس کیلئے معاملہ چیف جسٹس کو بھیجا تھا، جس پر چیف جسٹس نے معاملے پر از خود نوٹس لیتے ہوئے 9 رکنی لارجر بینچ تشکیل دیا۔
چیف جسٹس کی سربراہی میں بننے والے بینچ میں جسٹس اعجاز الاحسن، جسٹس منصور علی شاہ، جسٹس منیب اختر، جسٹس یحییٰ آفریدی،جسٹس مظاہرعلی اکبرنقوی، جسٹس جمال خان مندوخیل، جسٹس محمد علی مظہراور جسٹس اطہر من اللہ شامل ہیں۔
انتخابات میں تاخیر کے حوالے سے اسلام آباد ہائیکورٹ بار ایسوسی ایشن کی درخواستیں بھی معاملے کے ساتھ ہی سنی جائیں گی۔
اعلامیے میں کہا گیا ہے کہ ازخودنوٹس میں دیکھا جائے گا کہ انتخابات کی تاریخ دینا کس کا اختیار ہے؟ دیکھاجائے گا کہ انتخابات کرانےکی آئینی ذمہ داری کس نے اورکب پوری کرنی ہے؟ دیکھاجائے گا کہ فیڈریشن اور صوبوں کی آئینی ذمہ داری کیا ہے؟
اعلامیے کے مطابق صدر اور الیکشن کمیشن کے درمیان خط و کتابت بھی ہوئی، کہا جارہا ہے صدر کو صوبائی الیکشن کی تاریخ دینے کا اختیارنہیں۔
سپریم کورٹ کا کہنا تھا کہ پنجاب اور کے پی اسمبلیاں 14 اور 17 جنوری کو تحلیل ہوئیں، آرٹیکل 224 دو کے تحت انتخابات اسمبلی کی تحلیل سے 90 روز میں ہونا ہوتے ہیں، آئین لازم قرار دیتا ہے کہ 90 دن میں انتخابات کرائے جائیں۔
