ملتان: گورنمںٹ ایم اے جناح اسکول ملتان کے طالب علم پر تشدد کرنے والے 2 اساتذہ کو معطل کردیا گیا۔
تفصیلات کے مطابق ملتان کے گورنمنٹ ایم اے جناح اسکول میں سالانہ تقریب کے لیے فنڈ نہ دینے پر طالب علم پر تشدد کرنے والے 2 اساتذہ کو معطل کردیا گیا، سی ای او ایجوکیشن نے اسکول پرنسپل کے خلاف بھی کارروائی کی سفارش کردی۔
طالب علم پر تشدد کی رپورٹ وزیراعلیٰ پنجاب عثمان بزدار اور ڈپٹی کمششنر کو بھجوادی گئی ہے۔
واضح رہے کہ گزشتہ روز ایم اے جناح اسکول ملتان کے اساتذہ نے میٹرک کے طالب علم احمر کو سالانہ تقریب کے لیے 500 روپے نہ دینے پر تشدد کا نشانہ بنایا تھا۔
مزید پڑھیں: ملتان، سالانہ تقریب کے لیے فنڈ نہ دینے پر اساتذہ کا طالب علم پر مبینہ تشدد
طالب علم احمر کا کہنا تھا کہ اساتذہ نے پیٹ میں لاتیں ماریں، تینوں اساتذہ کان پکڑوا کر ڈنڈے مارتے رہے جبکہ ساتھی طلباء کا کہنا تھا کہ احمر کو سالانہ تقریب کے لیے 500 روپے فنڈ نہ دینے پر مارا گیا، احمر کو ڈنڈوں، لاتوں، گھونسوں اور مکوں سے بہیمانہ تشدد کا نشانہ بنایا گیا۔
احمر کے والدین کا کہنا تھا کہ بیٹے کو باندھ کر بیہوشی کی حالت میں جھاڑیوں میں پھینک دیا گیا۔
ترجمان پنجاب حکومت شہباز گل نے کہا تھا کہ بچے پر تشدد کا واقعہ انتہائی افسوس ناک ہے، ملوث اساتذہ کے خلاف قانونی کارروائی کی جائے گی، ملوث اساتذہ کے خلاف مقدمہ بھی درج کیا جائے گا۔
ڈپٹی کمشنر مدثر ریاض ملک نے طالب علم پر تشدد کے مبینہ واقعے کا نوٹس لیتے ہوئے انکوائری کا حکم دیا تھا۔
