Tag: استحکام پاکستان پارٹی

اسلام آباد (یکم اگست 2025): استحکام پاکستان پارٹی کے انٹرا پارٹی انتخابات پر الیکشن کمیشن آف پاکستان کا فیصلہ آ گیا ہے۔

اے آر وائی نیوز کے مطابق الیکشن کمیشن نے استحکام پاکستان پارٹی کے انٹرا پارٹی الیکشن کو تسلیم کر لیا ہے اور پارٹی کا اس حوالے سے سرٹیفکیٹ اور نوٹیفکیشن بھی جاری کر دیا ہے۔

الیکشن کمیشن نے استحکام پاکستان پارٹی کے انٹرا پارٹی الیکشن کو تسلیم کرتے ہوئے وفاقی وزیر عبدالعلیم خان کو پارٹی کا صدر برقرار رکھا ہے۔

نوٹیفکیشن کے مطابق استحکام پاکستان پارٹی کے انٹرا پارٹی الیکشن 12 اور 13 جولائی 2025 کو منعقد ہوئے تھے۔

واضح رہے کہ گزشتہ سال عام انتخابات سے قبل الیکشن کمیشن پاکستان تحریک انصاف کے انٹرا پارٹی الیکشن کو کالعدم قرار دیتے ہوئے پارٹی سے اس کا انتخابی نشان بلا واپس لے لیا تھا۔

لاہور : استحکام پاکستان پارٹی کی سیکرٹری اطلاعات فردوس عاشق اعوان عہدے سے مستعفی ہوگئیں۔

تفصیلات کے مطابق استحکام پاکستان پارٹی کی سیکرٹری اطلاعات فردوس عاشق اعوان نے عہدے سے استعفیٰ دے دیا۔

مرکزی سیکرٹری اطلاعات نے صدر آئی پی پی عبدالعلیم خان کو اپنا استعفیٰ بھجوادیا ہے۔

آئی پی پی رہنما کا کہنا تھا کہ ذاتی مصروفیات اور صحت کے مسائل کے باعث عہدے پر کام جاری نہیں رکھ سکتی تاہم بطور ممبر استحکام پاکستان پارٹی خدمات انجام دیتی رہوں گی۔

خیال رہے فردوس عاشق استحکام پاکستان پارٹی میں سیکریٹری اطلاعات تھیں۔

یاد رہے ڈاکٹر فردوس عاشق دو دہائیوں پر محیط ایک وسیع سیاسی کیریئر کے ساتھ ایک تجربہ کار سیاستدان ہیں، آئی پی پی میں شامل ہونے سے پہلے، انھوں نے مختلف سیاسی جماعتوں میں کئی اہم کرداروں میں خدمات انجام دیں۔

انہوں نے اپنے سیاسی سفر کا آغاز پاکستان پیپلز پارٹی (پی پی پی) سے کیا اور 2008 سے 2011 تک وزیراعظم یوسف رضا گیلانی کے دور میں وفاقی وزیر برائے آبادی بہبود کے طور پر خدمات انجام دیں۔

سال 2011 میں انھوں نے پیپلز پارٹی سے علیحدگی اختیار کی اور پاکستان تحریک انصاف (پی ٹی آئی) میں شمولیت اختیار کی تھی اور وزیر اعظم کے معاون خصوصی برائے اطلاعات و نشریات کا اہم قلمدان سنبھالا۔

پی ٹی آئی سے علیحدگی کے بعد،ڈاکٹر اعوان نے استحکم پاکستان پارٹی کے ساتھ اتحاد کیا، جہاں انہیں مرکزی انفارمیشن سیکرٹری کا کردار سونپا گیا۔

استحکام پاکستان پارٹی نے عام انتخابات 2024 کے حوالے سے اپنا انتخابی منشور جاری کردیا ہے۔ منشور میں مزدورں کی تنخواں 50 ہزار روپے کرنے اور عوام کو 300 یونٹس تک مفت بجلی فراہم کرنے پر توجہ مرکوز کی گئی ہے۔

استحکام پاکستان پارٹی کا انتخابی منشور

• مزدور کی کم سے کم ماہانہ تنخواہ 50 ہزار روپے ماہوار
• 300 یونٹس تک بجلی مفت
• موٹر سائیکل سواروں کو پٹرول آدھی قیمت پر
• آزادانہ اور خودمختار خارجہ پالیسی
• اوورسیز پاکستانیوں کو ووٹ کا حق
• نوجوانوں اور خواتین کیلئے آسان شرائط پر بلاسود قرضے اور ملازمتیں
• ذہین طلبا و طالبات کے لیے یرون ملک اسکالر شپ کی فراہمی

لاہور : استحکام پاکستان پارٹی (آئی پی پی) اور ن لیگ میں الیکشن کیلئے سیٹ ایڈجسٹمنٹ پر حتمی مذاکرات جاری ہے، معاملات بدھ کو طے ہونے کا امکان ہے۔

تفصیلات کے مطابق استحکام پاکستان پارٹی اورن لیگ میں الیکشن کیلئے سیٹ ایڈجسٹمنٹ حتمی مراحل میں داخل ہوگئی ، بدھ کو دونوں جماعتوں کے درمیان معاملات طے ہونے کا امکان ہے۔

ذرائع نے بتایا ہے کہ پہلے مرحلے میں نون لیگ جہانگیر ترین کے لودھراں کے حلقے سے سیٹ ایڈجسٹمنٹ پر راضی ہے، علیم خان، عون چوہدری ، نعمان لنگڑیال اوراسحاق خاکوانی کے لیے مذاکرات جاری ہیں۔

علیم خان کیلئے این اے ایک سو سترہ لاہور سے معاملہ طے ہوئے کا امکان ہے، ن لیگ نےابتدائی طور پر لاہور اور ملتان میں آئی پی پی سےسیٹ ایڈجسٹمنٹ پررضامند ہے۔

نون لیگ کے مقامی رہنما صدیق بلوچ لودھراں میں سیٹ ایڈجسٹمنٹ پر راضی نہیں، لودھراں میں ن لیگی رہنما صدیق بلوچ کا آزاد الیکشن لڑنے کا امکان ہے، لودھراں کی وجہ سے مذاکرات میں ڈیڈ لاک پیدا ہوا۔

ن لیگ نے پارٹی پالیسی کی خلاف ورزی کرنےوالوں کوٹکٹ جاری نہ کرنے کاعندیہ دیا۔

لاہور : مسلم لیگ ن اور استحکام پاکستان پارٹی (آئی پی پی) کے درمیان ابتدائی طورپر کچھ نشستوں پراتفاق رائے ہوگیا، ن لیگ لاہورمیں علیم خان کوقومی اسمبلی کی نشست پر سپورٹ کرے گی۔

تفصیلات کے مطابق مسلم لیگ ن اور استحکام پاکستان پارٹی (آئی پی پی) میں مختلف نشستوں پر سیٹ ایڈجسٹمنٹ کیلئے پیش رفت سامنے آئی۔

ذرائع نے بتایا کہ مختلف نشستوں پر مذاکرات جاری ہے ، ابتدائی طورپر کچھ نشستوں پراتفاق رائے ہوگیا ہے۔

ذرائع کا کہنا تھا کہ ن لیگ لاہورمیں علیم خان کوقومی اسمبلی کی نشست پر سپورٹ کرےگی اور ساہیوال میں نعمان لنگڑیال کےمقابلے میں امیدوار کھڑا نہیں کرے گی۔

ن لیگ عون چوہدری اوراسحاق خاکوانی کےمقابلے میں بھی امیدوار نہیں لائے گی اور لودھراں میں بھی ایک قومی اورایک صوبائی نشست پر آئی پی پی کی حمایت کرے گی۔

ن لیگ کی کمیٹی چند روز میں نواز شریف کےسامنےآئی پی پی کےمطلوبہ حلقوں کی فہرست پیش کرے گی اور آئی پی پی کو دی جانے والی نشستوں کا حتمی فیصلہ نواز شریف کریں گے۔

کامونکی: استحکام پاکستان پارٹی کے رہنما علیم خان نے اعلان کرتے ہوئے کہا کہ ہماری حکومت آئی تو 300موٹرسائیکل والوں کے لیے پیٹرول کی قیمت آدھی ہوگی اور 300 یونٹ تک بجلی مفت دیں گے۔

تفصیلات کے مطابق کامونکی میں استحکام پاکستان پارٹی کے رہنما علیم خان نے ورکرکنونشن سے خطاب کرتے ہوئے کہا کہ الیکشن میں کچھ لوگ آئیں گے اورعوام کو تسلیاں دیں گے،ع ان لوگوں نے7،7 مرتبہ باریاں لیں،40سال حکومت کی، جولوگ باریاں لیتے رہےہیں ان کوانجام تک پہنچائیں گے۔

علیم خان کا کہنا تھا کہ چیئرمین پی ٹی آئی نےلوگوں کی امیدکوتوڑا،ملکی نظام سےاعتماداٹھ گیا، اس ملک میں سب کچھ ہےصرف اچھے لیڈروں کی کمی ہے۔

رہنما استحکام پاکستان پارٹی نے تنقید کرتے ہوئے کہا کہ سندھ میں ایک گاؤں کی تصویردیکھی ،ندی سے ایک کتااوربچہ پانی پی رہے تھے، عوام کی حالت اس لیئے ایسی ہے کیونکہ حکمران چور ہیں۔

ان کا کہنا تھا کہ اس ملک کو لوٹا ہے، جن کوہم ایماندارسمجھتے تھے، ان کےکرتوت آپ سب پڑھ رہے ہوں گے۔

علیم خان نے اعلان کیا کہ امیروں کی بجلی کی قیمت ڈبل کریں گے اورغریبوں کومفت دیں گے ،300 یونٹ تک بجلی مفت دیں گے، غریبوں کو ملنے والی مفت بجلی کی قیمت امیراداکریں گے۔

رہنما آئی پی پی نے کہا کہ موٹرسائیکل والوں کےلیے پیٹرول کی قیمت آدھی ہوگی اور بڑی گاڑیوں والوں کےلیے پیٹرول کی قیمت دگنی ہوگی۔

ان کا مزید کہنا تھا کہ ہماری حکومت آئی توہریونین کونسل میں ایک ڈسپنری قائم کریں گے ،چھوٹی چھوٹی بیماریوں کےلیے عوام کو اسپتال نہیں جانا پڑے گا جبکہ ہماری حکومت آئی تومزدوروں کی ماہانہ تنخواہ 50ہزارمقررکریں گے،نوجوانوں کونوکریاں ملیں گی، بلاسود قرضے دیےجائیں گے۔

لاہور : استحکام پاکستان پارٹی کا 28 اکتوبر سے 9 دسمبر تک جلسوں کا شیڈول جاری کردیا گیا، کل خانیوال کے جہانیاں اسٹیڈیم میں سیاسی طاقت کامظاہر ہ کرے گی۔

تفصیلات کے مطابق استحکام پاکستان پارٹی سیاسی طاقت کا مظاہر ہ کرنے کے لئے تیار ہیں ، استحکام پاکستان پارٹی کا 28 اکتوبر سے 9 دسمبر تک جلسوں کا شیڈول جاری کردیا گیا۔

آئی پی پی کل خانیوال کے جہانیاں اسٹیڈیم میں سیاسی طاقت کامظاہر ہ کرے گی ، جہاں جہانگیر ترین، عبدالعلیم خان،فردوس عاشق،عون چوہدری ودیگر جلسے سے خطاب کریں گے۔

استحکام پاکستان پارٹی کی جانب سے پہلے مرحلے میں 9اضلاع میں جلسے ہوں گے ، 3 نومبر کو حافظ آباد ، 9 نومبر کو نارووال میں جلسہ کرے گی۔

اس کے علاوہ 12نومبر کو لیہ اور 17نومبر کو قصور , 20نومبر گوجرانوالہ، 24نومبر جھنگ میں سیاسی میدان لگائے گی جبکہ 2دسمبر کو ساہیوال ،9دسمبر کو فیصل آباد میں جلسے ہوں گے۔

دوسرے مرحلے میں ملتان، راولپنڈی، شیخوپورہ، سیالکوٹ اور بہاولپور میں جلسے منعقد کئے جائیں گے۔