اسلام آباد : ماہر معاشیات مزمل اسلم کا کہنا ہے کہ اسحاق ڈار نے بجلی اور گیس کی قیمت بڑھانے کی خبر دے دی۔
تفصیلات کے مطابق ماہر معاشیات مزمل اسلم نے وزیرخزانہ اسحاق ڈار کی پریس کانفرنس کے بعد اے آر وائی نیوز سے خصوصی گفتگو کرتے ہوئے کہا کہ اسحاق ڈار نے بجلی ،گیس کی قیمتوں میں اضافے کی خبر دے دی ہے۔
مزمل اسلم کا کہنا تھا کہ ہوسکتا ہے آج سے بجلی و گیس کی قیمتیں بڑھانے کا عمل شروع ہو جائے۔
ماہر معاشیات نے مزید کہا کہ زرمبادلہ ذخائر3ارب ڈالر سے نیچے آچکے ہیں، مارکیٹ 400 سے 500پوائنٹس تک ڈاؤن ہے۔
انھوں نے بتایا کہ ہمارا آئی ایم ایف پروگرام دسمبر میں ختم ہوجانا تھا لیکن مفتاح اسماعیل نے نیا پروگرام شروع کیا۔
یاد رہے وزیر خزانہ اسحاق ڈار نے پریس کانفرنس کرتے ہوئے کہا تھا کہ آئی ایم ایف سے معاہدے کے تحت حکومت پاکستان 170 ارب روپے کے ٹیکسزلگائے گی، بجلی اورگیس کی اصلاحات کابینہ کی منظوری سے کی جائیں گی۔
اسحاق ڈار کا کہنا تھا کہ بجلی اورگیس کے نقصانات ختم کریں گے، گیس کے سرکلر ڈیٹ میں بڑھانے کے فلو کو کنٹرول کرناہوگا، بجلی 3000 ارب کی بنتی ہے اور وصولی1200 ارب کی ہوتی ہے۔
وزیر خزانہ نے کہا کہ ڈیزل پر لیوی 50 روپے تک پہنچاناہے، مارچ میں ڈیزل پر لیوی 5 اوراپریل میں5 روپےبڑھائیں گے۔
