اسلام آباد : وزیر خزانہ اسحاق ڈار نے چارٹر آف اکانومی کو وقت کی ضرورت قرار دیتے ہوئے کہا ٹیکس ٹو جی ڈی پی ریٹ بڑھانے کے سوا کوئی راستہ نہیں۔
تفصیلات کے وفاقی وزیر خزانہ اسحاق ڈار نے اسلام آباد میں سمینار سے خطاب کرتے ہوئے کہا کہ معیشت کو بہتر کرنے کی کوشش کررہےہیں، ٹیکسوں کی وصولی ہمیشہ ایک بڑا مسئلہ رہا ہے،
اسحاق ڈار کا کہنا تھا کہ برآمدات بڑھانے کیلئے اقدامات کررہےہیں، ٹیکسز کی وصولی ہمیشہ ایک بڑا مسئلہ رہاہے، کورونا کی وجہ سے بہت سے ملکوں نے ٹیکس ریٹ میں اضافہ کیا، ٹیکس ٹو جی ڈی پی ریٹ بڑھانے کے علاوہ کوئی دوسرا راستہ نہیں۔
وفاقی وزیر خزانہ نے کہا کہ ایف بی آر کے ٹریک اینڈ ٹریس سسٹم کی مکمل حمایت کرتا ہوں، بعض صنعتی شعبوں میں ٹیکس کی رپورٹنگ کا ایشو بھی ہے تاہم پاکستان کو ٹیکسز کا دائرہ کار بڑھانے کی ضرورت ہے
ان کا مزید کہنا تھا کہ پانچ سال قبل ہم کہاں تھے اور اب کہاں ہیں، گزشتہ 4سالوں میں اکنامک مینجمنٹ مکمل طور پر ناکام رہی ، میں بہت عرصے سے چارٹر آف اکانومی کا کہہ رہا ہوں۔
اسحاق ڈار نے بتایا کہ متعدد بڑے ممالک کا قرض ٹوجی ڈی پی پاکستان سے کہیں زیادہ ہے، کیا امریکا، جاپان، برطانیہ میں کہا جاتا ہے کہ ملک قرضوں میں پھنس گیا، اس لئے پاکستان کو بھی معیشت کو سیاست سے الگ کرنا ہوگا۔
وزیر خزانہ نے سوال کیا کیا بنگلادیش سمیت دیگرممالک کرنسی مارکیٹ میں مداخلت نہیں کررہے ،پاکستان کی حکومت کو بھی مارکیٹ میں مداخلت کرنا پڑتی ہے ، اسمگلرز اور ہنڈی مافیا نے ملکی معیشت کو یرغمال بنایا ہوا ہے۔
انھوں نے بتایا کہ چمن بارڈر پر یوریا اور بڑی مالیت کے ڈالرز کی اسمگلنگ ہو رہی ہے، اسمگلنگ کے خلاف حکومت نے آپریشن شروع کیا ہوا ہے۔
اسحاق ڈار نے کہا کہ کیوں اسٹیٹ بینک کو معاشی ترقی کا آپشن آخری آپشن کے طور پر اپنائے، غریب لوگوں کوسبسڈی دیناریاست کی ذمہ داری ہے، ہمارے ملک میں سبسڈی ٹارگٹڈ ہونی چاہیے۔
وفاقی وزیر کا کہنا تھا کہ ہم سوشل سیکیورٹی کیلئے جتنا خرچ کر سکتے ہیں ہمیں کرنا چاہیے، ہمیں ایکسپورٹس کو بڑھانا ہوگا، بیرونی قرضوں پر مزید انحصار نہیں کرسکتے۔
انھوں نے کہا کہ میں پاکستان کے بارے میں ہمیشہ جذباتی ہوجاتا ہوں، میں نے 5سال جلاوطنی کاٹی، میں نے پاکستان کیلئے جذباتی ہونے کی قیمت ادا کی۔
