Tag: اسحٰق ڈار

اسلام آباد: سابق وزیر خزانہ اسحٰق ڈار کے خلاف آمدن سے زائد اثاثوں سے متعلق ریفرنس کی سماعت کے دوران ملزم سعید احمد کے وکیل نے عمرے پر جانے سے متعلق بتایا جس پر نیب پراسیکیوٹر نے کہا کہ یہ سب تاخیری حربے ہیں، کیس چلنے نہیں دیا جا رہا۔

تفصیلات کے مطابق احتساب عدالت میں سابق وزیر خزانہ اسحٰق ڈار کے خلاف آمدن سے زائد اثاثوں سے متعلق ریفرنس کی سماعت ہوئی۔

وکیل صفائی قاضی مصباح نے بینک الفلاح کے گواہ مسعود الغنی پر جرح کی جبکہ ریفرنس میں نامزد تینوں شریک ملزمان عدالت میں پیش ہوئے۔

ملزمان کے وکلا کی جانب سے تاخیری حربے بھی جاری ہیں۔ سعید احمد کے وکیل نے کہا کہ میں عمرے پر جانا چاہتا ہوں جس پر جج محمد بشیر نے کہا کہ اس مرحلے پر کیسے جا سکتے ہیں، ٹرائل جاری ہے۔ پہلے ہی سعید احمد کے سینئر وکیل حشمت حبیب نہیں آ رہے۔

معاون وکیل نے بتایا کہ حشمت حبیب بیمار ہیں، گزشتہ سماعت پر وہیل چیئر پر آئے تھے۔ جج نے کہا کہ ایک وکیل بیمار ہے، دوسرا عمرے پر جا رہا ہے۔ نیب پراسیکیوٹر عمران شفیق نے کہا کہ یہ سب تاخیری حربے ہیں، کیس کو چلنے نہیں دیا جا رہا۔

انہوں نے کہا کہ گزشتہ 4 سماعتوں پر صرف گواہ محمد عظیم پر جرح مکمل نہ ہوسکی۔ جج نے دریافت کیا کہ حشمت حبیب کب تک آئیں گے اور کب جرح کریں گے۔

معاون وکیل نے کہا کہ حشمت حبیب جیسے ہی بہتر ہوں گے آجائیں گے۔

دوسری جانب صدر نیشنل بینک سعید احمد کی جانب سے بریت کی درخواست دائر کر دی گئی۔ درخواست گزار کا کہنا ہے کہ ہمارے خلاف کوئی ثبوت نہیں۔ نہ کوئی بینک اکاؤنٹ کھلوائے نہ ہی کسی کو فائدہ پہنچایا۔

درخواست میں کہا گیا کہ فرانزک رپورٹ کے مطابق دستخط سعید احمد کے دستخط سے میچ نہیں کرتے۔ اب تک 4 گواہوں میں سے کسی نے سعید احمد کے خلاف کچھ نہیں کہا۔

درخواست میں استدعا کی گئی کہ عدالت اسحٰق ڈار ضمنی ریفرنس سے سعید احمد کو بری کرنے کا حکم جاری کرے۔

احتساب عدالت میں کیس کی سماعت جاری ہے۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

اسلام آباد: احتساب عدالت میں سابق وزیر خزانہ اسحٰق ڈار کے خلاف آمدن سے زائد اثاثوں سے متعلق ریفرنس کی سماعت جاری ہے۔

تفصیلات کے مطابق احتساب عدالت میں سابق وزیر خزانہ اسحٰق ڈار کے خلاف آمدن سے زائد اثاثوں سے متعلق ریفرنس کی سماعت ہوئی۔ سماعت احتساب عدالت کے جج محمد بشیر نے کی۔

سماعت کے دوران احتساب عدالت میں تینوں نامزد ملزمان موجود تھے۔ وکیل صفائی قاضی مصباح نے استغاثہ کے گواہ محمد عظیم پر جرح کی۔ سماعت کے دوران اسحٰق ڈار کی طرف سے ہجویری فاؤنڈیشن کو جاری چیکوں کی تفصیلات پیش کی گئی۔

گواہ کا کہنا تھا کہ اسحٰق ڈار نے ہجویری فاؤنڈیشن کے نام پر چیک جاری کیے۔ 15 اکتوبر 2005 کو ہجویری فاؤنڈیشن کے نام پر چیک جاری کیا گیا۔ 22 جنوری 2010 کو اسحٰق ڈار نے 4 لاکھ کا چیک جاری کیا۔

گواہ کے مطابق یکم مارچ 2010 کو 7 لاکھ کا چیک ہجویری فاؤنڈیشن کے نام پر جاری کیا۔ اسحٰق ڈار نے کل 6 کروڑ 53 لاکھ کے چیک ہجویری فاؤنڈیشن کو جاری کیے۔

سماعت کے دوران نیب پراسیکیوٹر نے کہا کہ سعید احمد یہ نہ سمجھیں کہ ان پر کوئی الزام نہیں۔ سعید احمد نے اسحٰق ڈار کے نام پر7 اکاؤنٹ کھولے۔ انہوں نے بتانا ہے وہ اکاؤنٹ کس کے کہنے پر کھولے گئے۔

پراسیکیوٹر نے کہا کہ کچھ اکاؤنٹ ان کے اپنے نام پر ہیں، ان کا استعمال اسحٰق ڈار کرتے ہیں۔ سعید احمد بتائیں اکاؤنٹ کون سے ہیں اور کتنی رقم موجود ہے۔

اسحٰق ڈار کے خلاف نیب ریفرنسز کی مزید سماعت 24 مئی تک ملتوی کردی گئی۔

اس سے قبل گزشتہ سماعت پر محمد عظیم نے بتایا تھا کہ تفتیشی افسر کے خط میں ٹرانزیکشن کی تفصیلات نہیں مانگی گئیں۔ تفتیشی افسر نے بینک ٹرانزیکشن کی تفصیلات زبانی مانگی تھیں۔ تفتیشی افسر نے 17 اگست 2017 کو زبانی تفصیلات دینے کا کہا۔ نیب کی تفتیشی افسر نے 16 اگست 2017 کو 2 خط لکھے۔

گواہ نے بتایا تھا کہ دونوں خطوط عدالتی ریکارڈ کا حصہ بنا دیے گئے۔ 6 نومبر 2003 کو لوکل بل سے 4 لاکھ 89 ہزار 100 اسحٰق ڈار کے اکاؤنٹ میں آئے۔ رقم بینک الفلاح ایل ڈی اے برانچ لاہور میں منتقل ہوئی۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔